Asay ‘Xiskkuwaappe Beegottanaadan’ Maadda

“Xiskkuwaappe intte beegottiyo saatee ha77i gakkido gishshau, ha wodiyaa akeekite.”—ROM. 13:11.

QONCCISSANA DANDDAYAY?

Kiristtaaneti ayyaanaaban beegotti uttiyoogee keehi koshshiyoy aybissee?

Haggaazuwaaban beegottidaageeti haasayissiyo uri yootiyoobaa ezggananne xomoosi xeellana koshshiyoy aybissee?

Nuuni haggaazuwan keha gidana koshshiyoy aybissee?

1, 2. Daroti beegottana koshshiyoy ayba hanotaanee?

 XISKKOY ayfiyaa galjjissin woy ubba xiskkiiddi kaamiyaa laaggiyo gishshau, layttan layttan shaˈan qoodettiya asay hayqqees. Harati oosuwau gakkanau xiskkuwaappe denddana koshshiyo saatiyan denddenna gishshau woy oottiiddi xiskkiyo gishshau, oosuwaappe yedetettoosona. SHin ayyaanaaban xiskkuwan galjjiyoogee hegaappekka aaruwan qohana danddayees. Geeshsha Maxaafay, “Xiskkennan ba maayuwaa maayidi naagiya urai anjjettidaagaa” yaagiyoy ha keehi koshshiyaabaara gayttidaagaana.—Ajj. 16:14-16.

² Yihoowa gita gallassay mati mati biyo wode, asaa naatuppe daroti ayyaanaaban xiskkoosona. Kiristtaane giyo haymaanooteta kaalettiya issoti issotikka bantta wudiyaa ‘xiskkiyaageeta’ yaagidosona. Ayyaanaabaa xiskkoy aybee? Tumu Kiristtaaneti beegotti uttiyoogee keehi koshshiyoy aybissee? Harati hegaa mala xiskkuwaappe beegottanaadan waati maaddana danddayiyoo?

AYYAANAABAA XISKKOY AYBEE?

3. Ayyaanaaban beegottibeenna uraa ayba ogiyan qonccissuutii?

³ Asay xiskkiiddi ooso oottenna. Hegaappe dumma hanotan, ayyaanaaban xiskkiyaageeti ayyaanaabaana gidana xayikkonne, oosoy daridoogeeta. Eti deˈuwau galla galla hirggiyoogan woykko ufayssaa, wogotettaa woy duretettaa keehi koyiyoogan, keehippe unˈˈettana danddayoosona. Eti he ubbabaa oottiyo gishshau, ayyaanaaban banttau koshshiyaabau aynne qoppokkona. SHin ayyaanaaban beegottidaageeti nuuni “wodiyaa wurssettan” deˈiyoogaa akeekiyo gishshau, banttau danddayettida ubban Xoossay koyiyoobaa oottoosona.—2 PHe. 3:3, 4; Luq. 21:34-36.

4. “Nuuni harati xiskkiyoogaadan xiskkanau bessenna” giya zoriyaa waanna qofay aybee?

⁴ Koyro Tasalonqqe 5:4-8 nabbaba. Ha xiqisiyan, kiitettida PHauloosi ba mala Kiristtaaneti “harati xiskkiyoogaadan”  xiskkennaadan zoriis. I giidobaa birshshettay aybee? Nuuni ‘xiskkana’ danddayiyo issi ogee, Yihooway kessido kandduwaa maaraa sheneho giyoogaa. Hara ogee qassi, Yihooway baassi goynnennaageeta xayssiyo wodee matidoogaa xaasayi xeelliyoogaa. Xoossau goynnenna hegaa mala asati eta ogiyaanne eta qofaa kaallanaadan nuna suganaadan paqqadana bessenna.

5. Ayyaanaaban xiskkiyaageeta shaakki erissiya xeelay awugee?

⁵ Issoti issoti bantta oychiya Xoossi baynnabadan qoppoosona. (Maz. 53:1) Haraati Xoossay asaassi qoppenna gishshau, nuunikka abaa qoppana koshshenna giidi qoppoosona. Harati qassi issi haymaanootiyaa kaalliyoogee Xoossaa dabbo oottees giidi qoppoosona. He asati ubbay ayyaanaaban xiskkidosona. Eti beegottana bessees. Nuuni eta maaddana danddayiyoy ayba ogiyaanee?

NUUNI BEEGOTTI UTTANA BESSEES

6. Kiristtaaneti ayyaanaaban beegotti deˈanau baaxetana bessiyoy aybissee?

⁶ Harati beegottanaadan maaddanau, nuuni beegottana bessees. Yaatin nuuni beegotti uttana danddayiyoy ayba ogiyaanee? Xoossaa Qaalay ayyaanaabaa xiskkoy ‘xumaa oosuwaara,’ giishin yettaara, mattuwaara, shaaramuxiyoogaara, shaaramuxanau qaaqqatiyoogaara, palamaaranne qanaatiyaara gayttidaba gidiyoogaa yootees. (Roome 13:11-14 nabbaba.) Hegaa mala oosuwaappe haakkiyoogee, metana danddayees. Beegottiyoogee keehi koshshiyaaba. Laaggiiddi xiskkiyoogee gattiyo daafabaa xaasayi xeelliya, kaamiyaa laaggiya uri ba shemppuwaa daafaban yeggana danddayees. Issi Kiristtaanee ayyaanaabaa xiskkoy woriyaaba gidiyoogaa akeekiyoogee keehippe koshshiyaaba!

7. Asay qoppiyo bala qofay nuna qohana danddayiyoy ayba ogiyaanee?

⁷ Leemisuwau, issi Kiristtaanee ba moottan deˈiya asay ubbay mishiraachuwaa awudenne ekkenna giidi qoppana danddayees. (Lee. 6:10, 11) I, ‘Ooninne siyennaba gidikko, asau yootanau woy eta maaddanau minni oottana koshshiyoy aybissee?’ giidi qoppana danddayees. Daroti ayyaanaaban xiskkana danddayoosona, shin eta hanotaynne eta qofay laamettana danddayiyoogee tuma. Issoti issoti ayyaanaaban beegottidi, tumaa siyoosona. Kawotettaa kiitaa ufayssiya ogiyan asau yootanau kase goˈettibeenna hiillaa mali beˈiyoogaa malaban beegottidaageeta gidikko, eta maaddana danddayoos. Nuuni beegotti uttiyoogee, nu haggaazoy keehi koshshiyoy aybissakko hassayiyoogaa gujjees.

NU HAGGAAZUWAA KEEHIPPE KOSHSHIYAABA OOTTIYAABAY AYBEE?

8. Nu haggaazoy keehippe koshshiyoy aybissee?

⁸ Ha wodiyan asaa zaaroy aybanne gido, nuuni sabbakiyoogee Yihoowa bonchissiyoogaa, qassi nu oosoy Yihoowa halchoy polettiyoogaara gayttidaagan oosettiyaaba gidiyoogaa hassaya. Matan, wonggeliyaa mishiraachuwau azazettennaageetu bolli Xoossay pirddana. Asau pirdday pirddettiyoy, nuuni sabbakiyo wode eti immiyo zaaruwaadaana. (2 Tas. 1:8, 9) Hegaa bollikka, issi Kiristtaanee “worddoikka xilloikka haiquwaappe” denddiyo gishshau minni sabbakiyoogee koshshiyaaba gidenna, giidi qoppiyoogee bala. (Oos. 24:15) ‘Deeshshata’ giidi pirddiyoogeeti “merinaa qaxxayuwau” baanaagaa Xoossaa Qaalan xaafettidabaappe akeekoos. Nuuni sabbakiyoogee Xoossaa maarotaa qonccissees; ayssi giikko, asay laamettidi ‘merinaa deˈuwaa’ demmanaadan ogiyaa dooyees. (Maa. 25:32, 41, 46; Roo. 10:13-15) Nuuni sabbakana xayikko, asay deˈuwaa demissiya kiitaa waati siyana danddayii?

9. Sabbakiyoogee nenakka haratakka maaddidoy ayba ogiyaanee?

⁹ Mishiraachuwaa sabbakiyoogee nunakka maaddees. (1 Ximootiyoosa 4:16 nabbaba.) Yihoowabaanne a Kawotettaa hidootaabaa asau yootiyoogee ne ammanuwaa minttiyoogaanne neeni Xoossaa keehi siiqanaadan maaddiyoogaa akeekabeykkii? Kiristtaanetuppe koyettiya eeshshaa neeni  qonccissana mala hegee maaddibeennee? Haggaaziyoogan Xoossau aqidoogaa bessiyoogee neeni ufayttanaadan oottennee? Harata tumaa tamaarissiyo maataa demmida daroti Xoossaa ayyaanay he asati laamettanaadan maaddiyoogaa beˈiyoogan ufayttidosona.

XOMOOSA XEELLA

10, 11. (a) Yesuusinne PHauloosi xomoosi xeelliyaageeta gidiyoogaa bessidoy ayba ogiyaanee? (b) Xomoosi xeelliyoogee kaseegaappe loˈˈo hanotan haggaazanau ayba ogiyan maaddiyaakko qonccissa.

¹⁰ Dumma dumma asay mishiraachuwaa ekkanau koyanaadan denttettiyaabay dumma dummaba. Hegaa gishshau, Kiristtaaneti xomoosi xeelliyaageeta gidana bessees. Yesuusi nuuyyo loˈˈo leemiso. I polo gidiyoogaadan, issi parisaawee ba wozanan yiillotidoogaa, issi nagarancha maccaasiyaa wozanappe ba nagaraappe simmidoogaa, qassi issi amˈˈiyaa ba goˈˈaa agga bayidoogaa akeekiis. (Luq. 7:37-50; 21:1-4) Yesuusi ubba asau ayyaanaaban koshshiyaabaa kunttana danddayees. Gidikkokka, Xoossau oottiya uri issibaa xomoosi xeellanau polo gidana koshshenna. Kiitettida PHauloosi hegau loˈˈo leemiso. I dumma dumma xeelay deˈiyo asau eta hanotaadan ufayssiya ogiyan yootiis.—Oos. 17:22, 23, 34; 1 Qor. 9:19-23.

¹¹ Yesuusaagaadaaninne PHauloosaagaadan xomoosi xeellanau baaxetiyo wode, nuuni haggaazuwan demmiyo asatu koshshaa denttettanau waatin loˈˈokko akeekana danddayoos. Leemisuwau, issi ura haasayissiyo wode, a biittaa wogaa, a koshshaa woy a so asaa hanotaa qonccissiyaabaa akeekanau mala. Geella he uri oottiiddi deˈiyoobaa akeekada, hegaara gayttidabaa ashkketettan yootiyoogan haasayaa doommana danddayaasa.

12. Nuuni haggaaziyo wode, issoy issuwaara haasayiyoobaara gayttidaagan naagettana koshshiyoy aybissee?

¹² Xomoosi xeelliya uri ba qofay shaahettanaadan oottiyaabaappe naagettees. Haggaazuwan nunaara oottiya uraara haasayiyoogee minttettana danddayees. Gidikkokka, nuuni haggaazuwau kiyiyoy haraatussi sabbakanaassa gidiyoogaa hassayana bessees. (Era. 3:1, 7) Yaatiyo gishshau, issi keettappe hara keetta biyo wode haasayiyoobay nu haggaazuwaa xubbennaadan naagettana koshshees. Koshshay deˈiyoogeetussi yootanabaa tobbiyoogee nu halchidoban qofaa wottiyo loˈˈo oge. Qassi, moobaylee issi issitoo nu haggaazuwan goˈˈana danddayikkokka, keettaawaara haasayiyo wode xubbennaadan, cenggurssaa sissennaadan oottana koshshees.

ASAU QOPPIYOOGAA BESSA

13, 14. (a) Issi ura ufayssiyaabay aybakko waatidi akeekana danddayiyoo? (b) Asay ayyaanaabaa koyanaadan denttettana danddayiyay aybee?

¹³ Haggaazuwaaban beegottidaageeti haasayissiyo uri yootiyoobaa akeekan ezggoosona. Ne haggaazo moottan demmiyo uri bau siyettiyaabaa yootanaadan woygada oychana danddayay? Haymaanootee daridoogee, heeran haniya danobay woy kawotettati oottana bessiyaabaa oottennaagee a qofissii? Deˈon deˈiyaabay maalaalissiya ogiyan giigidoogaa woykko Geeshsha Maxaafaa zoree keehi goˈˈiyoogaa yootiyoogan, issi uri ayyaanaabaa koyanaadan denttettana danddayay? Ubba wogan diccidaageeti, Xoossi baa giya issi issi asatikka gidin, woosaabaa eranau koyoosona. Daroti woosaa siyiya uri deˈiishsha giidi qoppoosona. Harata kaallidi deˈiya oyshati qofissoosona: Xoossay woosa ubbaa siyii? Hegee xayikko, Xoossay siyanaadan nuuni ay oottana koshshii?

¹⁴ Aassiyoogan kaymidaageeti oottiyoobaa xomoosiyoogan haasayaa waatidi doommanaakko darobaa tamaarana danddayoos. Eti qoridi oychiyaaba milatennaadan naagettiyoy ayba ogiyaanakko akeeka. Keettaawaa qofaa akeekanau koyiyoogaa bantta somˈˈuwaaninne bantta cenggurssan waatidi qonccissiyoonaa?—Lee. 15:13.

KEHATETTAANNE HIILLAA

15. Nuuni kehatettan sabbakana koshshiyoy aybissee?

¹⁵ Neeni xiskkuwaa kayridaashin asi denttanaadan  koyay? Dirbbanttidi denttiyo wode daroti yiillotoosona. Darotoo koshshiyay loddaara denttiyoogaa. Asaa ayyaanaaban xiskkuwaappe denttanau oottiyoobaykka hegaa mala. Leemisuwau, issi uri neeni haasayissiyo wode yiillotikko, darotoo keehippe loˈˈo gidiyay waatiyoogee? Ayyo siyettidabaa akeekiyoogaa kehatettan yoota, i bau siyettidabaa qonccissido gishshau galata, qassi yiillotennan aggada ba. (Lee. 15:1; 17:14; 2 Xim. 2:24) Ne kehatettay, hara Yihoowa Markkay haasayissiyo wode he uri siyanaadan denttettana danddayees.

16, 17. Nu haggaazuwan akeekancha gidiyoogaa ayba ogiyan bessana danddayiyoo?

¹⁶ Hara hanotan, asay siyanau koyenna wodekka eta haasayissana danddayaasa. Haasayennaadan diggiyo oge milatiyo gishshau, issoti issoti, “Akkay, taani kaalliyo haymaanootee deˈees” woykko “Taani koyikke” gaana danddayoosona. Gidikkokka, hiillaaninne kehatettan haasayiyoogan, he uraa ayyaanaabaa koshshaa denttettanau i qoppanaadan oottiya oyshaa oychana danddayaasa.—Qolasiyaasa 4:6 nabbaba.

¹⁷ Issi issitoo, nu yootiyoobaa siyanau banttau wodee baynnabadan siyettiyo asata haggaazuwan demmiyo wode, eta hanotaa akeekidoogaa yootidi aggidi biyoogee loˈˈo. SHin issi issitoo, goˈˈiyaabaa qanttan yootana danddayiyoogaa akeekana danddayaasa. Issi issi ishati issi daqiiqappe guuxxiya wodiyan, qoppanaadan oottiya issi xiqisiyaa Geeshsha Maxaafaappe nabbabidi, haroode zaarana issi oyshaa keettaawaa oychidi boosona. Eti qanttan yootiyoobay keettaaway guuttabaa siyanau bau wodee deˈiyaabadan qoppanaadan oottiyoogan, issi issitoo keettaawaa koshshaa denttettees. Danddayettiyo wode, aybissi hegaadan oottikkii?

18. Haggaazuwaa kiyennan muruta ogiyan sabbakanau ay oottana danddayiyoo?

¹⁸ Haggaazuwaa kiyennan markkattanau giigettidaageeta gidikko, galla galla oosuwan asaa demmiyoode, eti mishiraachuwaa siyanaadan denttettana danddayoos. Daro ishatinne michoti amarida xuufeta bantta kiisiyan woy issiban yeggidi boosona. Eti hanotay injjetiyaaba gidikko haratuyyo nabbabana mala, issi xiqisiyaa kasetidi qoppanakka danddayoosona. Hegaadan oottanau waatada giigettanaakko, haggaazuwaa bollaara xeelliya ishaara woykko ne gubaaˈiyaa aqinyetuura tobbana danddayaasa.

NU DABBOTA KEHATETTAN DENTTETTIYOOGAA

19. Nu dabbota maaddanau baaxetiyoogaa aggana koshshennay aybissee?

¹⁹ Nuuni nu dabboti mishiraachuwaa siyanaadan maaddanau koyiyoogee wottin deˈiyaaba. (Yaa. 2:13; Oos. 10:24, 48; 16:31, 32) Nuuni etau koyro yootiyo wode eti ixxis giyaaba gidikko, hegee nuuni hara wode yootanau koyennaadan oottana danddayees. Nuuni eta qofaa laammanau aynne oottana woy yootana danddayennabadan qoppana danddayoos. Gidikkokka, ne dabbuwaa gakkidabay a deˈuwaanne qofaa laammana danddayees. Woykko neeni kaseegaappe loˈˈo ogiyan haratuyyo tumaa yootana danddayiyo gishshau, haˈˈi loˈˈo ayfiyaa demmana danddayaasa.

20. Dabbotuyyo markkattiyo wode, hiillay keehippe koshshiyoy aybissee?

 ²⁰ Nu dabbotuyyo siyettiyaabay nuna qofissana koshshees. (Roo. 2:4) Haggaazuwan demmiyo asaa haasayissiyoogaadan eta kehatettan haasayissana koshshennee? Eta ashkketettaaninne bonchuwan haasayissa. Ne dabbotuyyo ubbatoo tumaabaa yootiyoogee koshshennan aggana danddayees. Tumay nena waati maaddidaakko neeni oottiyooban bessana danddayaasa. (Efi. 4:23, 24) Yihooway ‘nena maaddiyaabaa tamaarissidi,’ ne deˈuwaa waatidi anjjidaakko qoncci beettanaadan ootta. (Isi. 48:17) Ne dabboti neeni issi Kiristtaaniyaappe koyettiyaagaadan deˈiyoogaa akeekanaadan ootta.

21, 22. Nu dabbota ayyaanaaban ubbatoo maaddiyoogaa goˈˈaa qonccissiya issi hanidabaa yoota.

²¹ Issi michiyaa haasayiyoobaaninne oottiyooban ba 13 ishatussinne michotussi ubbatoo markkattidoogaa xaafaasu. A layttan layttan etau ubbau dabddaabbiyaa xaafausu. Eta son 30 layttaa giddon Yihoowa Markki i xalla.

²² Ha michiyaa issi gallassi haahosan deˈiya ba micheeyyo silkkiyaa dawalaasu. I michiyaa ba woosa keettaa sabaakee bana Geeshsha Maxaafaa xannaˈissanaadan oychin i xannaˈissibeennaagaa nu micheessi yootaasu. Geeshsha Maxaafaa xannaˈanaadan o maaddiyoogee bana ufayssiyoogaa nu michiyaa yootin, i michiyaa hagaadan gaasu: “Ero loˈˈo, shin taani neeyyo yootiyoobaa siya: Taani awudenne Yihoowa Markka gidikke.” A ba micheeyyo Tumuppe Geeshsha Maxaafay Tamaarissiyoy Aybee? giya maxaafaa kiittada, guutta gallassaa takka takkada iyyo silkkiyaa dawalausu; shin i michiyaa he maxaafaa mule nabbababeykku. Nu michiyaa gujjadakka hagaadan gaasu: “Wurssettan, a ba maxaafaa oyqqanaadan yootaas; yaatin, he maxaafan qofay xaafettido xiqisetuppe amaridaageeta silkkiyan 15 daqiiqa gidiya wodiyau nabbabidi tobbida. Hegaadan silkkiyaa guutta wodiyau dawala simmin, a 15 daqiiqappe dariya wodiyau xannaˈanau koyaasu. Hegaappe simmin, issi issitoo ubba guuran taani hiixaappe denddennan, qassi issi issitoo gallassan naaˈˈutoo xannaˈanau silkkiyaa tau dawaliyoogaa doommaasu. A kaalliya layttan xammaqettaasu, qassi hegaappe kaalliya layttan aqinye gidada oottiyoogaa doommaasu.”

23. Asay ayyaanaabaa xiskkuwaappe beegottanaadan maaddanau nuuni salettana koshshennay aybissee?

²³ Asay ayyaanaabaa xiskkuwaappe beegottanaadan nuuni hiillan, qassi aggennan maaddana koshshees. Ashkke asati daroti haˈˈikka mishiraachuwaa siyoosona. Amakaayiyan aginan aginan 20,000ppe dariya asay xammaqettidi Yihoowa Markka gidees. Hegaa gishshau, PHauloosi koyro xeetu layttan deˈida, ishaa Arkkipoosa, “Godai neeyyo immido oosuwaa polanaagaa dogoppa” yaagidi zorido zoriyaa wozanan wottoos. (Qol. 4:17) Kaalliya huuphe yohoy eesotiyoogaa bessiya hanotan sabbakiyoogee woygiyoogaakko nuuni ubbay akeekanaadan maaddees.

[Oyshata]

[Sinttaa 13n deʼiyaagaa qonccissuwaa]

NEENI BEEGOTTA UTTANA DANDDAYIYO OGIYAA

[Sinttaa 13n deʼiya misiliyaa qonccissuwaa]

▪ Xoossaa sheniyaa oottiyoogan oosoy daridoogaa gida

▪ Xumaa oosuwaappe haakka

▪ Ayyaanaabaa xiskkoy kaalettiyo daafabaa akeeka

▪ Ne moottan deˈiya asaa ubbatoo loˈˈo ayfiyan xeella

▪ Asau sabbakanau kase goˈettabeenna hiillaa mala beˈa

▪ Nu haggaazoy keehi koshshiyoogaa hassaya