Ha Wodiyan Kiristtaaneti Waatana Koshshii?

TUMU Kiristtaaneti ha wodiyan polotikan gelokkona. Aybissi? Eti Yesuusa leemisuwaa kaalliyo gishshataassa. Yesuusi i ‘saˈaassa gidennaagaa’ yootiis. Bana kaalliyaageeta xeelliyaagan, “Intte sa7aabaa gidekketa” yaagiis. (Yoh. 15:19; 17:14) Kiristtaaneti polotikan gelana koshshenna issi issi gaasoti aybakko ane beˈoos.

1. Asaa naatu abbee asha. Asaa naati banttana banttarkka ayssanau etau eraynne maatay baynnaagaa Geeshsha Maxaafay yootees. Hananabaa yootiya Ermmaasi, “ba hemetaa suurissanaagee aawu shene gidennaagaa” yootiis.—Erm. 10:23.

Asaa naati aybanne goˈettennan kafuwaadan paallanau merettibeennaagaadan, banttana banttarkka ayssanaadankka merettibookkona. Asaa naatu kawotettau abbee asha gidiyoogaa xeelliyaagan taarikiyaa eranchaa Devid Fromkini, “Kawotettatun ayssiyaageeti asaa naata; yaatiyo gishshau, eti baloosona, qassi eti giidobay polettanaagee ammanttenna. Etau wolqqay deˈikkonne asha” yaagiis. (Zi Kuweschin of Gavernment) Geeshsha Maxaafay nuuni asan ammanettennaadan akeekissiyoogee garamissenna!—Maz. 146:3.

2. Iita ayyaana wolqqati ha wodiyan asaa haaroosona. Alamiyaa haaranaadan Seexaanay Yesuusa shoobbido wode, alamiyaa kawotettata ubbaa ayyo immanau Dabloosau maatay deˈiyoogaa Yesuusi kashi gibeenna. Yesuusi guyyeppe, Seexaanay ‘saˈaa haariyaagaa’ gidiyoogaa yootiis. Amarida layttaappe guyyiyan kiitettida PHauloosi, Seexaanay ‘ha saˈaa xoossaa’ gidiyoogaa yootiis. (Yoh. 14:30; 2 Qor. 4:4) PHauloosi ba mala Kiristtaanetuyyo, “Nuuni saluwaa sohuwan de7iya iita  ayyaana wolqqatuura, haariyaageetuura, godatettai de7iyoogeetuuranne ha xuma biittaa haariyaageetuura [olettoos]” yaagidi xaafiis. (Efi. 6:12) Alamiyaa geeman haariyaageeti iita ayyaana wolqqata. Hegaa eriyoogee nuuni polotikaa ayba ogiyan xeellanaadan oottii?

Ane ha leemisuwaa qoppa: guutta wolwolota abbaa beetay sugidi efiyoogaadan, asaa naatu haaruwaa wolqqaama ayyaana meretati bantta koyidoogaadan oottoosona. He wolwolota laaggiyaageeti abbaa beetay woppu gaanaadan oottana danddayennaagaadan, biittaa haariyaageeti iita ayyaana wolqqati bantta koyidoogaadan oottennaadan teqqana danddayokkona. He iita ayyaana wolqqati giigana danddayenna hanotan asay maara xayanaadan oottanaunne saˈaa bolli iita metuwaa gattanau murttidosona. (Ajj. 12:12) Yaatiyo gishshau, tumuppe hanotaa laammana danddayiyay Seexaanaappenne daydanttatuppe keehi wolqqaama gidida ura xalla. Hegaa mala wolqqay deˈiyoy Xoossaa Yihoowa.—Maz. 83:18; Erm. 10:7, 10.

3. Tumu Kiristtaaneti Xoossaa Kawotettaa xallau exatoosona. Yesuusinne i erissiyo ashkkarati, kumetta saˈaa haarana kawotettaa Xoossay ba keerido wodiyan saluwan essanaagaa eroosona. Geeshsha Maxaafay he haaruwaa Xoossaa Kawotettaa yaagees; qassi Yesuus Kiristtoosi he Kawotettaa Kawo gidanaadan sunttettidoogaa qonccissees. (Ajj. 11:15) He Kawotettay asaa naata ubbaa goˈˈiyo gishshau, Yesuusi tamaarissido waannabay “Xoossaa kawotettaa wonggeliyaa mishiraachchuwaa.” (Luq. 4:43) I ba erissiyo ashkkarati, “Ne kawotettai yo” yaagidi woossanaadankka tamaarissiis. Aybissi giikko, he Kawotettay haariyo wode, Xoossaa shenee saluwan hanidoogaadan saˈankka hanana.—Maa. 6:9, 10.

Yaatin, asa haaroy waananee? Geeshsha Maxaafay ‘saˈaa kawotettati ubbay’ xayanaagaa yootees. (Ajj. 16:14; 19:19-21) Issi uri Xoossaa Kawotettay asa haaro ubbaa xayssana haniyoogaa ammaniyaaba gidikko, he kawotettatuyyo exatennaagee bessiyaaba. I xayanau deˈiya asa kawotettau exatiyaaba gidikko, Xoossaa Kawotettaa morkke.

Tumu Kiristtaaneti polotikan gelennaagee, eti bantta deˈiyo heeran issi issibaa giigissanau koyokkona giyoogee? Hegaa zaaruwaa kaalliya huuphe yohuwan beˈana.

[Sinttaa 6n deʼiya misiliyaa qonccissuwaa]

Yihoowa Markkati Xoossaa Kawotettau exatoosonappe attin, polotikaara gayttidabaa laammanau baaxetokkona