Yesuusi Woygi Zaaranee?

Haymaanootiyaa kaalliya daroti haymaanootee polotikaara walahettana koshshees goosona. Eti asaa naatu bolli gakkiya metuwaa xayssanau haymaanootee maaddana danddayees giidi qoppoosona. Gidoppe attin, haymaanootiyaa kaalliya harati qassi haymaanooteenne polotikay walahettana koshshenna giidi qoppoosona. Haymaanootee polotikaara walahettiyoogaa xeelliyaagan ne qofay aybee? He naaˈˈu wolqqaama dirijjiteti issippe oottana koshshii?

YESUUS KIRISTTOOSI “asaa naatu haymaanootiyaa taarikiyan keehi goˈˈiyaabaa oottida asa” geetettiis. Yaatiyo gishshau, nuuni Yesuusa, Haymaanootee polotikaara walahettana koshshii? giidi oychana danddayiyaabadan qoppa. I woygidi zaaranee? I saˈan deˈiyo wode, tamaarissidobaaninne oottidoban he oyshaa zaariis. Leemisuwau, keehippe erettida Deriyaa Bolla Timirttiyan, Yesuusi bana kaalliyaageeti bantta deˈiyo deretettan ay oottana koshshiyaakko akeekanau maaddiya, kaaleto gidiyaabaa yootiis. He timirttiyaappe amarida qofaa ane beˈoos.

Harata Eta Deˈuwan Goˈˈiyaabaa Oottoosona

Yesuusi bana kaalliyaageeti alamiyaa waatidi xeellana koshshiyaakko qonccissiis. I hagaadan giis: “Asa ubbaassi intte maxine mala; shin maxinee laqilaqana xayikko, naa77antto a waatidi laqilaqissanee? Kare olin, asi a yedhdhi hemettanaappe attin, wodeppe ainne go77enna. Sa7au intte poo7o mala; . . . asi intte oottiyo lo77o oosuwaa be7idi, saluwan de7iya intte Aawaa galatana mala, intte poo7oi asa sinttan poo7o.” (Maa. 5:13-16) Yesuusi bana kaalliyaageeta maxiniyaaninne pooˈuwan leemisidoy aybissee?

Yesuusi yootidobay, bana kaalliyaageeti guutta asa xallaassi gidennan, asaa naatu ubbaassi maxine mala gidiyoogaa bessees. Eti amaridaageetussi gidennan, geeshshidi xeellana koyiya ubbaassi pooˈo mala. Yesuusi he leemisota goˈettiyoogan, bana kaalliyaageeti deretettaappe muleera shaahettidi deˈanaadan i koyennaagaa qonccissiis. Eti shaahettana koshshennay aybissee?

Kaallidi deˈiyaagaa akeeka: Maxiniyaa qumaara walakkana xayikko, qumay moorettennaadan maaddana danddayenna. Xomppiyaa issi kifiliyan wottana xayikko, he kifiliyau pooˈissana danddayenna. Yaatiyo gishshau, ammaniya asay deretettaappe shaahettidi haahosan banttarkka deˈanaadan, Yesuusi bana kaalliyaageeta azazibeennay aybissakko akeekanau metenna. Qassi bana kaalliyaageeti asaappe shaahettidi haymaanoote dirijjitiyaa keettan deˈanaadankka minttettibeenna. Hegaappe dumma hanotan Kiristtaaneti, maxiniyaa qumaara walakkana, qassi xomppiyaa xuma sohuwan wottana koshshiyoogaadan, harata eta deˈuwan goˈˈiyaabaa oottanau etaara issippe deˈana koshshees.

“Sa7aassa Gidokkona”

Gidoppe attin, Yesuusi bana kaalliyaageeti asaara gayttana koshshiyoogaa yootidoogee, issi Kiristtaanee polotikaa xeelliyo ogiyaara gayttidaban oyshay denddanaadan oottees. Aybissi? Yesuusi hayqqanaappe guuttaa kasetidi bana kaalliyaageetu gishshaa hagaadan giidi Xoossaa woossiis: “Neeni xalahiyaappe eta naagana mala woossiyoogaappe attin, sa7aappe kessana mala woossikke. Taani sa7aassa gidennaagaadan, etikka sa7aassa gidokkona.” (Yoh. 17:15, 16) Yaatin, Kiristtaaneti deretettaara walahettidi deˈiiddi saˈaassa gidennan aggana danddayiyoy ayba ogiyaanee? Hegaa akeekanau, ane hara heezzu oyshata beˈoos:

• Yesuusi polotikaa ayba ogiyan xeellidee?

• Ha wodiyan Kiristtaaneti waatana koshshii?

• Kiristtaaneti tamaarissiyoobay deretettaa goˈˈiyoy ayba ogiyaanee?