Oyshaa 1: Ta Deˈuwau Halchidobi Deˈii?
INGGILIZE biittan diccida Raazilinda eraa demmanau keehi koyiya asa. A asaa maaddanaukka koyiyo gishshau, keetti baynnaageeta, bollay tilla gidennaageetanne tamaariyoobaa eesuwan akeekennaageeta maaddiyaabaa oottawusu. Xoqqa timirttiyaa wurssa simmada, keehi bonchissiya oosuwaa oyqqaasu; shin a ufayssiya ooso oottiyaabanne ishalo deˈo deˈiyaaba gidikkokka, “Daro layttau, ‘Nuuni deˈiyoy aybissee?’ qassi ‘Deˈuwau halchidobi aybee?’ yaagada qoppaas” yaagaasu.
He oyshaa oychiyoogee bessiyaaba gididoy aybissee?
Asaa naati qoppenna mehe mala gidokkona. Nuuni kasebaappe tamaaranau, sintta wodiyau halchanau, qassi ufayttidi deˈanau koyana danddayoos.
Issoti issoti he oyshaa zaaruwaa woygiyoonaa?
Daroti deˈuwau waanna halchoy duretiyoogan woy hayttatiyoogan ufayssaa demmiyoogaa giidi qoppoosona.
He zaaroy ay qonccissii?
Nu deˈuwan kaseyana koshshiyaabaa kuuyiyay nuna. Nuuni koyiyoobay Xoossaa sheniyaappe aadhees.
Geeshsha Maxaafay ay tamaarissii?
Kawuwaa Solomoni duretidi naaniis; qassi ufayssaa demmanau bichaariis; shin hegee i ufayttidi deˈanaadan oottibeenaagaa akeekiis. I deˈuwan tumuppe ufayttanaadan oottiyaabaa hagaadan giis: “Hekko ubbabai odettiis; hegaa gishshau, ubbabau kuushshai hagaa: Xoossaassi yayya; a azazuwaa naaga. Aissi giikko, hegee asassi waanna ooso.” (Era. 12:13) Xoossaa azazuwaa naaganau nuuppe koyettiyaabay aybee?
Nuuni deˈuwan ufayttiyoogee Xoossay halchidobaappe issuwaa. Solomoni hagaadan xaafiis: “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa. He ufaissaikka qassi Xoossaa kushiyaappe imettidabaa gidiyoogaa taani akeekaas.”—Era. 2:24.
Nuuni nu soo asaa siiqanaadaaninne etau qoppanaadankka Xoossay koyees. So asa ubbau imettida kaaletoy aybakko akeeka.
-
“Azinai ba maccaasiyo ba bollaadan siiqanau bessees.”—Efi. 5:28.
-
“Maccaasa ubbaikka bantta azinaa azinaa bonchchanau bessees.”—Efi. 5:33.
-
“Naatoo, inttena yelidaageetuyyo . . . azazettite.”—Efi. 6:1.
Geeshsha Maxaafay yootiyo ha maaraa kaallikko, nuuni ufayttananne woppu gaana danddayoos. SHin nuuni oottana koshshiya waannabay, danddayido keena ubban nuna Medhidaagaabaa tamaariyoogaa, a nu dabbo oottiyoogaanne akko shiiqiyoogaa. Geeshsha Maxaafay nuuni ‘Xoossaakko shiiqanaadan’ shoobbees. Qassi, “Ikka inttekko shiiqana” yaagidi yootees. (Yaaq. 4:8) Neeni ha shoobiyaa ekkiyaaba gidikko, ne deˈuwan tumuppe ufayttana.
