YIHOOWAY i ufayttiyo ogiyan goynnanau koyiyaageetuppe ay koyii? I nuuni polo gidanaadan koyii? Hegaadaana gidiyaakko, nagarancha gidida asay a mule ufayssana danddayenna. Hara baggaara qassi, i awunkko nuuni oottana danddayiyooba xallaa koyii? Nuuni Xoossau oottiyoogan ufayttanau koyikko, he oyshatu zaaruwaa eriyoogee keehi koshshiyaaba. Hananabaa yootiya Mikiyaasi Xoossay nuuppe koyiyoobaa waati qonccissidaakko ane beˈoos.—Mikiyaasa 6:8 nabbaba.

“GODAI neeyyo lo77obaa odi wottiisttenne.” Xoossay nuuppe ay koyii giidi malan qoppana koshshenna. I nuuppe koyiyoobaa Ba Qaalan geeshshidi yootiis. Xoossay nuuppe “lo77obaa” xallaa koyees. “Xoossai siiqo” gidiyo gishshau, i nuuppe koyiyoobay nuna maaddiyaaba. (1 Yoh. 4:8; 5:3) I nuuppe koyiyoobaa poliyoogee a ufayssiyoogaa xalla gidennan, nunakka maaddees.—Zaa. 10:12, 13.

“GODAI neeppe koyiyoogee aibee?” Xoossay nuuppe aybanne koyana bessii? Ee, koyana bessees! I deˈuwaa Pultto, qassi deˈuwan deˈanau koshshiyaabaa kunttiyaagaa gidiyo gishshau, nuuni au azazettana koshshees. (Maz. 36:9) Yaatin, i nuuppe koyiyoy aybee? Mikiyaasi Xoossay nuuppe koyiyo heezzubaa yootiis. Hegeetuppe naaˈˈati nuuni harata oyqqiyo ogiyaara gayttidaba; heezzanttoy qassi nuuyyo Xoossaara deˈiya dabbotaara gayttidaba.

‘Suurebaa oottanaadaana.’ Issi xuufee yootiyoogaadan, “suurebaa” geetettida Ibraysxxe qaalay “harata maara, qassi bessiya ogiyan oyqqiyoogaa qonccissees.” Xoossay nuuni a sinttan suurenne bessiya ogiyan harata oyqqanaadan koyees. Harata oyqqiyo ogiyan oonanne yuuˈennaageeta, qassi xillobaanne tumubaa haniyaageeta gidiyoogan suurebaa oottoos. (Wog. 19:15; Isi. 1:17; Ibr. 13:18) Nuuni harata suure ogiyan oyqqiyo wode, etikka nuna hegaadan oyqqana danddayoosona.—Maa. 7:12.

‘Aggenna siiquwaa bessanaadaana.’ Ha xiqisiyan “aggenna siiquwaa” geetettidaagaa xeelliyaagan Geeshsha Maxaafaa eranchaa issoy hagaadan giis: “Siiquwaa, maarotettaanne kehatettaa giidi birshshiyoogee hegaa loytti qonccissenna. . . . Hageetuppe issuwaa xallay gidennan, ubbay issippe he qaalaa qonccissoosona.” Xoossay nuuni aggenna siiquwaa bessanaadan koyees. Nuuni nu dosan hegaa bessana koshshees; qassi maadoy koshshiyoogeeta maaddiyoogan ufayttana bessees. Yaatiyaaba gidikko, immiyoogan ufayttoos.—Oos. 20:35.

‘Ashkketettan ne Xoossaara hemettanaadaana.’ Geeshsha Maxaafan, “hemettiyoogaa” giya qaalay “issibaa oottiyo maaraa kaalliyoogaa” bessiyaaba. Xoossay Geeshsha Maxaafan yootido deˈuwaa maaraa kaalliyoogan, nuuni aara hemettoos. Nuuni hegaadan hemettiyo wode ‘ashkke’ gidana koshshees. Waanidi? Nuuni Xoossaa sinttan ashkke gidikko, aara geeddarssiyo wode nuuni keehi guuttanne nagarancha gidiyoogaa, qassi nu abbee laafa gidiyoogaa akeekoos. Hegaa gishshau, Xoossaara “ashkketettan hemettiyoogee” i nuuppe koyiyoobaanne nuuni ayyo immana danddayiyoobaa xeelliyaagan suurebaa qoppiyoogaa giyoogaa.

Yihooway nu wolqqaappe aadhiyaabaa nuuppe mule koyenna. Nuuni ayyo oottanau wozanappe baaxetiyoogee a ufayssees. (Qol. 3:23) I nu abbee laafa gidiyoogaa akeekees. (Maz. 103:14) Nuuni ashkke gididi nu abbee laafa gidiyoogaa akeekikko, aara hemettiyo wode ufayttana danddayoos. Xoossaara hemettiyoogaa waatada doommana danddayiyaakko ayssi tamaarikkii? Hegaadan hemettikko appe daro anjjuwaa demmaasa.—Lee. 10:22.