Yihoowa Markkati Bantta Haggaazuwa Polanaadan Waani Loohiyonaa?

KAASSA

Yihoowa Markkati haraatussi mishiraachchuwa yootiyo ogiyabaa gujjin, bantta Kiristtaane deꞌo macaraa ubban ubbatoo loohoosona. Eta haggaazoy Yesuusi bana kaalliyageeti oottanaadan azazido, hegeekka, Kawotettaa mishiraachchuwa haratuyyo markkattiyonne tamaarissiyo ooso. (Maatiyosa 24:14; 28:19, 20) Hegawu maaddiya loohissuwa saaminttan saaminttan shiiqiyo shiiqotuppenne layttan layttan shiiqiyo killiliyanne woradaa shiiqotuppe demmoos. Yihoowa Markkatu giddoppe qassi galchchan woy dirijjitiyan etawu aawatettay deꞌiyogeeti loohiyo hara gujo Geeshsha Maxaafaa timirtte keettati deꞌoosona.

Ha huuphe yohuwan

Yihoowa Markkati ayba loohissuwa demmiyonaa?

Galchchaa shiiqota. Shiiquwa Addaraasha geetettiya nu goynno sohuwan saaminttan saaminttan naaꞌꞌu shiiqota shiiqoos. Issuwa, saaminttawu gidduwan shiiqoos, haraa qassi saaminttaa wurssettan shiiqoos. Ooninne shiiqana danddayees, qassi hegawu miishshaa qanxxissokko.

Saaminttawu gidduwan shiiqiyo shiiquwa. Nuuni nabbabiyogan, asaara haasayiyogan, deressi shiiqiya haasayaa haasayiyogan, qassi markkattiyogaaninne tamaarissiyogan kaseegaappe aaruwan qara gidana danddayiyo ogiyabaa ha shiiquwan tamaaroos. He loohissoy haasayan, issippe tobbiyoban, ootti-besuwaninne biiduwan giigiis. He loohissoy nuuni haraatuura Geeshsha Maxaafaabaa tobbiyo wodenne xannaꞌanawu koyiyageeta Geeshsha Maxaafaa xannaꞌissiyo wode, kaseegaappe aaruwan qara gidanaadan nuna maaddees. He shiiquwa shiiqiya ubbay hegaappe goꞌettees. Ubbaappe aaruwan, nu shiiqoti Xoossan nu ammaniyo ammanoynne Xoossaanne nu mala Kiristtaaneta siiqiyo siiqoy minnanaadan oottees.
Saaminttaa wurssettan shiiqiyo shiiquwa. Naaꞌꞌu shaahoy deꞌiyo ha shiiqoy Geeshsha Maxaafaabaa eranawu koyiya asatussi qoppidi giissido dere haasayan doommees. Hegaappe kaalliya shiiqoy xannaꞌanawu giigida Wochchiyo Keelaappe a ekettida issi huuphe yohuwa oyshaaninne zaaruwan tobbiyoba. He huuphe yohoti nuuni haggaazuwaninne nu galla galla deꞌuwan nuna maaddiya Geeshsha Maxaafaappe ekettida huuphe yohotanne maarata qonccissoosona.

Killiliyanne woradaa shiiqota. Layttan layttan daro galchchati issippe shiiqiyo heezzu gita shiiqoti nuussi deꞌoosona. Keehi ufayssiya ha shiiqoti issi Geeshsha Maxaafaa huuphe yohuwa baaso oottidi giigiyabaa gidishin, haasayati, ootti-besoti, oysha-zaarotinne biidoti deꞌoosona. Nu galchchaa shiiqotuugaadan, killilenne woradaa shiiqotun tamaariyobaykka Geeshsha Maxaafaa nuuni kaseegaappe aaruwan eranaadaaninne mishiraachchuwa yootiyogan kaseegaappe aaruwan qara gidanaadan maaddees. Ha gita shiiqotunkka oonikka shiiqana danddayees, qassi shiiqanawu miishsha qanxxissokko.

Yihoowa Markkatussi giigida Geeshsha Maxaafaa timirtte keettata

Gujo loohissuwa demmanaadan issi issi Yihoowa Markkati dumma dumma Geeshsha Maxaafaa timirtte keettatun tamaaranaadan shoobettoosona. He timirtte keettati awugeetee? Eta halchchoy aybee, qassi ay keena wodiya ekkiyonaa? Qassi ooni tamaarana danddayii?

Aqinyetu Timirtte Keettaa

Halchchuwa: Mishiraachchuwa markkattiyonne tamaarissiyo oosuwan kaseegaappe aaruwan qara gidanaadan aqinyeta b geetettiya ubba wode haggaaziyageeta loohissiyogaa. He timirtte keettan issippe tobbiyo kifileti, ooti-besoti, haasayati, qassi tamaareti oottiyobati deꞌoosona.
Takkiyo wodiya: Usuppun gallassa.
Tamaarana danddayiyageeti: Aqinye gididi issi layttawu haggaazidaageeti he timirtte keettan tamaaranaadan shoobettoosona. Aqinye gididi daro layttawu haggaazida, qassi aadhdhida ichchashu layttaa giddon tamaaribeennaageeti zaarettidi shoobettoosona.

Kawotettaa Mishiraachchuwa Yootiyageetu Timirtte Keettaa

Halchchuwa: Meezee deꞌiyo ubba wode haggaaziyageeta dumma ogiyan loohissiyogaa. He timirtte keettan tamaariyageeti markkattiyogaaninne tamaarissiyogan kaseegaappe aaruwan qara gidoosona, qassi Geeshsha Maxaafaa huuphe yohota loytti xannaꞌoosona. Daroti Kawotettaa mishiraachchuwa yootiyageeti keehi koshshiyosan haggaazanaadan maddabettoosona.
Takkiyo wodiya: Naaꞌꞌu agina.
Tamaarana danddayiyageeti: Hegawu gidaa kunttiyanne aassiyageeti keehi koshshiyosa biidi haggaazana danddayiya aqinyeti tamaaranawu qitsiya kunttana danddayoosona.

Galchchaa Cimati Tamaariyo Timirtte Keettaa

Halchchuwa: Galchchan cimati c etawu imettida aawatettaa, hegeekka tamaarissiyonne heemmiyo aawatettaa loytti polanaadaaninne Xoossaanne bantta mala Kiristtaaneta kaseegaappe aaruwan siiqanaadan eta maaddanaassa.—1 PHeexiroosa 5:2,⁠3.
Takkiyo wodiya: Ichashu gallassa.
Tamaarana danddayiyageeti: Ooratti sunttettida cimatinne he timirtte keettaa aadhdhida ichchashu layttatun tamaaribeenna, meeze deꞌiyo cimatikka shoobettoosona.

Woradaa Xomoosiyageetinne Eta Machchoti Tamaariyo Timirtte Keettaa

Halchchuwa: Issi sohuwappe hara sohuwa biidi xomoosiya woradaa xomoosiyageeti, d bantta oosuwa loytti polanaadan maaddanaassa. (1 Ximootiyoosa 5:17) He loohissoy xomoosiyageetinne eta machchoti Geeshsha Maxaafaa kaseegaappe aaruwan loytti akeekanaadankka maaddanaassa.
Takkiyo wodiya: Issi agina.
Tamaarana danddayiyageeti: Woradaa Xomoosiyageeta gididi haggaazanaadan ooratti sunttettidaageetinne eta machchoti issi layttaa haggaazi simmin shoobettoosona. Hegaappe simmin, ichchasha gidiya layttaappe simmin tamaaranaadan zaarettidi shoobettoosona.

Kawotettaa Haggaazuwa Timirtte Keettaa

Halchchuwa: Galchchaa cimatinne galchchawu oottiyageeti e galchchan etawu imettida aawatettaa ha wodiya hanotaadaaninne asaa koshshaadan bessiya ogiyan loytti polanaadan maaddanaassa. (2 Ximootiyoosa 3:⁠1) He timirtte keettay amarida layttatun giigees.
Takkiyo wodiya: Dumma dumma gidikkonne, darotoo issi gallassan wurees.
Tamaarana danddayiyageeti: Woradaa xomoosiyageeti, galchchaa cimatinne galchchawu oottiyageeti shoobettoosona.

Beeteele Haggaazuwa Timirtte Keettaa

Halchchuwa: Beeteele f so asay bantta oosuwan kaseegaappe qara gidanaadaaninne Xoossaanne harata siiqiyo siiqoy kaseegaappe aaruwan minnanaadan maaddanaassa.
Takkiyo wodiya: Ichchashanne bagga gallassa.
Tamaarana danddayiyageeti: Beeteele ooratti gelidaageeti tamaaranaadan shoobettoosona. Daro layttawu beeteelen haggaazidaageeta gididi, ichchashu layttaa giddon he timirtte keettan tamaaribeennaageeti zaarettidi tamaaranaadan shoobettana danddayoosona.

Giiliyaade Geeshsha Maxaafaa Timirtte Keettaa

Halchchuwa: Tamaareti Geeshsha Maxaafaa kaseegaappe aaruwan nashshanaadaaninne eti tamaaridobaa oosuwan peeshshanaadan maaddanaassa. (1 Tasalonqqe 2:13) Giiliyaade timirtte keettan tamaariya ayyaanaaban kayma gidida ishanttinne michchontti Yihoowa dirijjitiyaninne kumetta saꞌan oottiyo Geeshsha Maxaafaa tamaarissiyo oosuwan keehi maaddoosona. Tamaaridi anjjettiyageeti bantta biittaa woy hara biittaa macaraa biiruwan haggaazanaadan, ubbaa wode haggaaziyageeta gidanaadan, woy misooneta gididi haggaazanaadan maddabettoosona.
Takkiyo wodiya: Ichchashu agina.
Tamaarana danddayiyageeti: Ubba wode haggaaziyageetuppe macaraa biiroy dooridi qitsiya kunttanaadan shoobbees. He timirtte keettay deꞌiyo sohoy Amarkkan, Niwu Yorken, Pattersenen deꞌiya Wochtawur Ejjukeeshinal Sentter giyosaana.

Macara Biiruwa Konttiya Yaratinne Eta Machchoti Tamaariyo Timirtte Keettaa

Halchchuwa: Macaraa Biiruwa Kontte Yarati g bantta macaraa biiruwan oosettiya oosuwa loytti polanaadan, qassi bantta biittan woy bantta biittaa aawatettaa garssan deꞌiya hara macaraa biiruwan deꞌiya Yihoowa Markkatu ayyaanaabaa oosuwa kaalettanaadan eta loohissiyogaa.
Takkiyo wodiya: Naaꞌꞌu agina.
Tamaarana danddayiyageeti: Doorettida Macaraa Biiruwa Kontte Yaratinne eta machchoti Amarkkan, Niwu Yorken, Pattersenen deꞌiya Wochtawur Ejjukeeshinal Sentter giyosan deꞌiya timirtte keettan tamaaranaadan Yihoowa Markkatu Waanna Biiroy eta shoobbees.

Yihoowa Markkati loohiyo timirtte keettatussi baasoy aybee?

Yihoowa Markkati loohiyo timirtte keettatussi baasoy Geeshsha Maxaafaa. Geeshsha Maxaafay Xoossaa ayyaanaa kaaletuwan xaafettidoogaanne nu Kiristtaane deꞌuwa ubbaa ginan nuna keehi maaddiya kaaletuwa oyqqidoogaa ammanoos.—2 Ximootiyoosa 3:16,⁠17.

Yihoowa Markkati eti demmiyo loohissuwawu miishshaa qanxxiyonaa?

Chii. He timirtteti miishshaa qanxxennan tamaariyobaa. Yihoowa Markkatu oosoy asay ba dosan immiyo miishshaa oosettees.—2 Qoronttoosa 9:7.

a Geeshsha Maxaafaynne Geeshsha Maxaafaa xannaꞌanawu maaddiya biidota gujjin darobati jw.org nu sayttiyan deꞌoosona.

b Aginan aginan haraata Geeshsha Maxaafaa xannaꞌissiyogan amarida saatiya haggaazanawu koyiya, haattan muukettida haratussi leemiso gidiya Yihoowa Markkay aqinye geetettees.

c Galchchaa cimati Geeshsha Maxaafaappe harata tamaarissiya, ayyanaaban kaymida Kiristtaane attuma asata, qassi eti Yihoowa asata maaddiyogaaninne minttettiyogan eta heemmoosona. Eti oottiyobawu miishshi qanxxettenna.

d Woradaa xomoosiyagee, saaminttan saaminttan ba woradan deꞌiya dumma dumma galchchata xomoosiya ubba wode haggaaziyagaa. I Geeshsha Maxaafaappe haasayaa haasayiyogaaninne etaara haggaaziyogan ba ayyaanaa ishanttanne michchontta minttettees.

e Galchchawu oottiyageeti, bantta ishanttanne michchontta maaddiya dumma dumma oosota oottoosona. Hegaappe denddidaagan, galchchaa cimati harata tamaarissanawunne heemmanawu maaddiya gujo wodiya demmoosona.

f Beeteelee, Yihoowa Markkatu macaraa biiruwawu imettida sunttaa. Yan deꞌiya ubba wode haggaaziyageeti bantta macaraa biiruwan deꞌiya Yihoowa Markkatu oosuwa maaddoosona.

g Macaraa Biiruwa Kontteti, heezzu woy hegaappe daro gidida, ayyaanaaban kaymida attuma asata.

Yihoowa Markkati eti demmiyo loohissuwappe waani goꞌettidonaa?

“Taani keehi dungguuxa gidiyo gishshawu, erenna asaara Geeshsha Maxaafaabaa haasayiyogee tana keehi metiis. Shin saaminttawu gidduwan shiiqiyo shiiquwan taani demmido loohissoy xala gidanaadaaninne tamaarissiyogan kaseegaappe aaruwan qara gidanaadan maaddiis. Taani haꞌꞌi galchchan deꞌiya haraatuurakka ta ooso sohuwan deꞌiyageetuurakka loꞌꞌo ogiyan haasayays.”—Natasho, Amarkka.
“Kawotettaa Mishiraachchuwa Yootiyageetu Timirtte Keettan tamaaridoogee taani Yihoowa milatanaadaaninne kaseegaappe aaruwan siiqiyagaa, danddayanchchanne keha gidanaadan maaddiis. Hegaappe denddidaagan, taani loꞌꞌo Kiristtaane, loꞌꞌo laggenne shooro gidaas. Taani Geeshsha Maxaafaa waata pilgganaakko, qassi haratu wozana denttettiya ogiyan Xoossaa Qaalaa waata qonccissanaakkokka he timirtte keettaappe tamaaraas.”—Stefena, Nayjeeriya.
“Taani cima gidada haggaaziyo wode kaseegaappe aaruwan ta huuphiya ziqqi oottana koshshiyogaa akeekanaadan, Galchchaa Cimati Tamaariyo Timirtte Keettay tana maaddiis. Imettida haasayati taani Yesuusa leemisuwa kaallana koshshiyogaa qonccissidosona.”—Luka, Xaaliya.
“Kawotettaa Haggaazuwa Timirtte Keettay taani haraati taakko shiiqanawu deexxenna asa, kehanne pashkka asa gidana bessiyogaa akeekanaadan maaddiis. Taani haratussi issibaa oottiyo wode, hegaa oottiyoy saxaa gattanawu gidennan, siiqoy tana denttettin oottana bessiyogaa akeekaas.”—Samuyele, Ingglize.
“Giiliyaade timirtte keettay, heregan leemisettida Xoossaa Qaalaa goꞌettidi nuuni nuna qoranaadan maaddiis. (Yaaqooba 1:⁠22-25) Yaatiyo gishshawu, nuuni laammana koshshiyo nu oonatettaynne Yihoowawu haggaaziyo ogee awugaakko akeekida. Nuuni nubaappe aaruwan haratubaa qoppana koshshiyogaa, qassi nu haasayiyonne issibaa oottiyo wode, nuna denttettana bessiyay siiqo gidana koshshiyogaakka tamaarida.”—Elnatananne Prinseso, Pilippinsse.