Piaichiap kinha nii kaimenaimen pidian, kaimenaꞌu nii piaichipan kanum yxaꞌapatnii naa naꞌik naꞌapam yxaꞌapatinhan ydubtan dun kaxaꞌapannaa kidiaꞌu. Naꞌap kapam, piaichipaꞌazun dun kaimenaimen Tuminkery, marii kiz piaichipan kanum yxaꞌapatnii naa. Panaadun tyykiaꞌu nii pidiꞌitinpen piaichipan dun Tuminkery xaꞌapatnii naa dirib aimeakan wamaxaap kinha nii kunaykii kai naꞌik diinheꞌitiꞌi.

Yewah yryy Ymanawynyꞌu Tuminkery, naꞌik ‘ytuman diꞌikiꞌu amazada tyryy yaichiapkau kaimenaimen, ytumini kid tykapkau idiaꞌan, ymatykapakayzkau pyꞌy padamat’. (Romans [Romanos] 1:20) Tuminkery Karichian kian “Yryy tumaꞌu imiꞌi baara pamaꞌuzkan idiaꞌan, yryy tumaꞌu amazada baara pidian pauwap kinha nii naꞌikim ytumini aukaz pa aichipaban idiaꞌan”. (Jeremiah [Jeremias] 10:12) Ykarichian kuwad ykadyz kid daꞌy, kunaynam kidiaꞌu aimeakan daꞌy ytumini naꞌikim ykuwad kapam ytaapnii ipei waynau baydap baydap kid.

Kunaynymaꞌu naꞌapam Yewah tuman waynau, ytumini waynau “paygary kawynyꞌu”. (Genesis [Gênesis] 1:27) Yryy id, tyryy wa aidyan ykadyz kid waxaꞌapatinhan idiaꞌan naꞌik tyryy wa aichipan naꞌiauram sakichipaꞌu naꞌik naꞌiauram panaꞌitiꞌu. Watiweitinhan dun waxaꞌapatinhan Tuminkery kakinhauri kawan at, wamaxaapan nii kaimen naꞌik kunaykii. Naꞌik, Tuminkery tuman waynau waminhaydaꞌychap kiz yryy.

Wadiꞌichipan dun ipei aimeakan kainhaꞌuraz imiꞌi baaraꞌa, watykap Tuminkery marainhapnii waynau. Apóstolo Paulo kian Tuminkery daꞌy ‘karikeunan ytykap kidian pakainhaꞌan in at pakamynyn kidian idiaꞌan indyan. Atii diꞌi, ydiyd wyn ynau pauribe kid kaaka kinhaa nii, naꞌik ytaa pabiꞌinaak kid ywanhikynyy nii. Naꞌik ytaa kunaykii kinhei ynhikynyy it’. (Acts [Atos] 14:17) Tuminkery taa aimeakan kid aunaa suu wakakyp kinha nii man. Ytumini dirib naꞌik pabiꞌinaak kidiaꞌu aimeakan kunaykikidiaꞌu nii waynau. Yryy idiaꞌan wa aichipan naꞌapam yaipen wamaxaapan.

Yewah tuman imiꞌi baara yaipen id karikeunan pidiannau maxaapan ibaaraꞌa. Ykarichian kian: “Ytaan imiꞌi baara pidiannau dainhau at”; “aunaa ytuman madiweitpaka, mazan ytuman imiꞌi baara pidiannau maxaap kiz nii”. (Psalm [Salmo] 115:16; Isaiah [Isaías] 45:18) Mazan xaꞌapauran kadyz pidiannau maxaapan nii imiꞌi baaraꞌa naꞌik naꞌapam nii ytuminikin inmaxaapan naꞌii? Tuminkery Karichian kian: “Taakary nii kaimenainhau pidiannau at imiꞌi baara in idiway nii naꞌik karikeunanyꞌu nii inmaxaapan ibaaraꞌa.” — Psalm (Salmo) 37:29.

Yewah tuman id imiꞌi baara pidiannau maxaap kiz nii, ykayꞌan ytuman kiwiichipaꞌu daunaiura naꞌik  zyna, Adão naꞌik Eva inmaxaap kiz imiꞌi baaraꞌa, kunaynymaꞌu pauribeibau diꞌii, ‘marii kiz inpauwinhan naꞌik intaap kiz wyryy pauribeibau’. (Genesis [Gênesis] 2:8, 15) Tuminkery diyd inxaꞌaptan ymanawynyꞌu aimeakan: “Ytum ydainhau nii, naꞌik ydiriben, ypaidhiad kiz ipei imiꞌi baara.” (Genesis [Gênesis] 1:28) Tuminkery tuman dun Adão naꞌik Eva, yaiapnii karikeunanyꞌu inmaxaapan imiꞌi baaraꞌa. Mazan, pa aipenat indikinchipan Tuminkery. Yryy id, aunaa inzamatkau “kaimenainhau pidiannau nii” ‘maxaapaꞌu nii imiꞌi baaraꞌa’ diinheꞌitiꞌi. Adão naꞌik Eva uian, mazan aunaa Yewah panadan padiꞌitinpen paxaꞌapatazunii daꞌy imiꞌi baaraꞌa. Aizii watuminpen nii bauran aimeakan Tuminkery xaꞌapatnii waꞌat.

Ipei saadinpeꞌu Tuminkery paradan kidiaz, Tuminkery diꞌikiꞌu paꞌidiwery wyryy. Kandii nii Yewah Tuminkery taan paKarichian waꞌat? Yxaꞌapanym kayꞌan yaipen wa aichipan paygary. (Proverbs [Provérbios] 2:1-5) Aunaa Tuminkery kuwadan ipei daynyydaꞌy wa aichipazunii padaꞌy paKarichian idiaꞌa. Aunaa naꞌapam ysaadkau ipei daynyydaꞌy ydaꞌy karichi idiaꞌa. (Ecclesiastes [Eclesiastes] 3:11) Mazan ipei aimeakan Tuminkery Karichian idiaꞌaꞌuraz kaminkeꞌyt wa aichipan kaimenaimen ydaꞌy. Ykarichian kuwad waꞌat naꞌapam Tuminkery taapan pidiannau, xaꞌapauran kadyz pidiannau ynaydap naꞌik aunaꞌuraz ynaydpan. (Psalm [Salmo] 15:1-5) Tuminkery Karichian tuminhapkid naꞌapam kiz watuminkerychipan yryy, naꞌiauram sakichipaꞌu naꞌik panaꞌitiꞌu, pyraata daꞌy naꞌik pidian kaxaꞌapayzin daꞌy. Naꞌikim Ykarichian kuwad ydan Disu daꞌy, kanum yxaꞌapatnii naꞌik ytuminhapkidnii daꞌy, naꞌik tyryy watuminpen kaimenaimen Yewah Tuminkery kadyz kid daꞌy kapam. — John (João) 14:9.

Yewah taan paKarichian waꞌat kaminkeꞌytaꞌu nii wamaxaapan kaimen naꞌikim kunaykii. Pakarichian idiaꞌa, Yewah kuwad kanum kiz waxaꞌapat wamaxaap kinha nii kaimen wairibennau tym, wakunaykikid kiz aimeakan kid kainhaꞌuraz wa idiaꞌa naꞌik wa aichiap kinha nii naꞌapam waxaꞌapatinhan wanhikynyy dupian dun. Naꞌik watuminpen nii zii, Tuminkery Karichian kuwad waꞌat ymanawyn kidiaꞌu aimeakan wa aichiap kiz, diuraz kid kawynyꞌu: Kandii nii kainhaꞌa baitinkery? Kanumaꞌu nii xaꞌap diinheꞌitiꞌi? Naꞌik kanum Tuminkery xaꞌapatnii naa kaminkeꞌyt kinha nii pidiannau maxaapan imiꞌi baara naꞌap yaipeyzun kawan?

Aizii watuminpen nii kandii nii Tuminkery Karichian panaꞌaꞌu ipei bauran karichinhau ai. Tuminkery Karichian saadkau 1.600 wyn ytuminikin, 40 daunaiuranau saadanyz. Mazan ypyꞌy baydapaꞌu ykywaa. Yxaꞌapanym kayꞌan ysaadkau Tuminkery aipen kawan at. (2 Timothy [2 Timóteo] 3:16) Tuminkery Karichian panaꞌaꞌu bauran karichi kid ai, yxaꞌapanym kayꞌan aunaa ykywaa panadkau, ykutyaꞌikin pyꞌy ysaadkau, dirib kutyaꞌu karichi kid Tuminkery diꞌikiꞌu aidyan aunaa ykywaa panadkau. Naꞌik dirib pidiannau intiween pamaxaad kidian Ykarichian saadkau bauran paradakary kid idiaꞌan, aunaa in aipen Tuminkery Karichian taakau pidiannau at naꞌik yaichiakau. Mazan ypyꞌy, kainhaꞌa Tuminkery Karichian atii kai, ytaakau pidiannau at naꞌik ysaadkau bauran paradakary idiaꞌan pauwaꞌa zii bauran karichi kid ai. Yryy idiaꞌan, ytykapkau “WaTuminkeryn paradan karikeunanyꞌu nii ynaꞌan”. — Isaiah (Isaías) 40:8.

Kainhaꞌa bauran aimeakan Tuminkery xaꞌapatnii pidiannau at. Watuminhapnii, Tuminkery aiapnii karikeunanyꞌu pidiannau maxaapan imiꞌi baaraꞌa. Mazan Adão dikinchipan id Tuminkery, yuian, yryy id, Adão naꞌik ipei ytakaandainhau inwaziween karikeunanyꞌu kakypkary. Tuminkery Karichian kian: ‘Baydapaꞌu pidian, Adão, dikinchipan id Tuminkery, ipei pidiannau uian. Naꞌik yxaꞌaptan id uiaꞌu, ipei pidian maukayzu paꞌidiwery. Yxaꞌapanym kayꞌan, Adão xaꞌaptan dun uiaꞌu, ikudazu nii ipei ytakaandainhau wyryꞌy xaꞌaptaꞌuraz uiaꞌu.’ (Romans [Romanos] 5:12) Adão dikinchipan id, panaadun dirib pidiannau diꞌitinpen aunaꞌu nii naa pauwaꞌa Tuminkery xaꞌaptan paxaꞌapatazunii pidiannau at naꞌik imiꞌi baara at. Mazan naꞌapam Yewah xaꞌapatinhan?

Yewah xaꞌapatinhan pakadyz kid kawan at. Yxaꞌaptan sakichipaꞌu idiaꞌan, ykian id Adão naꞌik Eva wyryy uiaꞌuraz. Yewah aidyan pakamarainpenyn ykaminkeꞌytan dun ipei pidiannau waꞌatiꞌuraz Adão naꞌik Eva diꞌik. Naꞌik Yewah aidyan pa aichipaban, ykuwadan id kadimenaꞌu idiaꞌan naꞌapam nii ysaabaan ipei  aimeakan pauwaꞌa it. (Genesis [Gênesis] 3:15) Tuminkery kazannaatan nii ipei pidiannau uiaꞌu ai naꞌik mauwakary ai paydan Disu idiaꞌan. Naꞌapam nii Yewah xaꞌapatinhan?

Yewah diyd paydan Disu imiꞌi baara at, ykazannaat kinha nii pidiannau uii kidiaꞌuraz ai, Adão tumaniaz pauian id. Ykayꞌan, Disu tuminhapkid pidiannau kanum kiz inxaꞌapat in ikud kinha nii karikeunanyꞌu kakypkary naꞌik ywaꞌatin imiꞌi baara at “ykazannaatan nan pidiannau pauian ai ymaukan idiaꞌan”. a (Matthew [Mateus] 20:28; John [João] 14:6) Disu kaimenaꞌu yryy, aunaa uiaꞌu nii y idiaꞌa, Adão kawanyꞌu ytumkau dun, yryy id tyryy ytaan pananaa wa dikin ii. Mazan Disu panaꞌaꞌu wyryy Adão ai, Disu karikeunanyꞌu yizuꞌutiyzun Tuminkery, atii pamaukan diꞌit. Aunaa kandii nii yzuiikeu yxaꞌapanym kayꞌan aunaa yxaꞌaptan uiaꞌu, yryy id, Yewah kadixitkidian yryy ykiu kiz pauwaꞌa it aukaz it. Disu maukan idiaꞌan, tyryy pidiannau zamtan aimeakan Adão waziudnii: karikeunanyꞌu kakypkary. Tuminkery Karichian kian: “Tuminkery dakutan kawan ipei pidiannau, uiaꞌu pidiannau nii, baydapaꞌu pidian dikinchipan id, ykayꞌan naꞌap kapam ydakutan irib pidiannau, kaimenaꞌu pidiannau nii, baydapaꞌu pidian izuꞌutin id paygary.” (Romans [Romanos] 5:19) Disu maukan idiaꞌan, Tuminkery xaꞌaptan nii paxaꞌapatazunii — tyryy pidiannau maxaapan karikeunanyꞌu nii imiꞌi baaraꞌa naꞌap yaipeyzun kawan.

Tyryy watuminpen pauwaꞌa zii Yewah daꞌy, naꞌapam yxaꞌapatinhan Adão dikinchipan dun. Aunaa kanum tyryy maxaad kidian Yewah yipei kiz pasakadaniaz. Karikeunan yparadan mixinhan. (Isaiah [Isaías] 55:11) Naꞌik watuminpen, tyykii Yewah marainpen waynau. Tuminkery Karichian kian: “Kaikepaꞌa Tuminkery aidyan naꞌapam pamarainpen pidiannau: Ydiyydan paydan baydapayzun imiꞌi baara at, yryy idiaꞌan wa ikudan karikeunanyꞌu kakypkary. Kaikepaꞌu wyryꞌy kamarainpenkaryz: Aunaa waynau marainpen kadyz man Tuminkery, mazan Tuminkery marainpen kadyz paꞌan waynau. Yryy id ydiyydan payDan maukan waynau dikin ii, tyryy kiz wauian kid mainhaabatkau.” — 1 John (1 João) 4:9, 10.

“Aunaa Tuminkery marainhan paydan patakaꞌytkau, mazan ytaapad pidiannau zuian yryy ipei waynau dikin ii, ytaan id payDan, wa aichiap, ykamarainpenyn idiaꞌan, ytaan nii ipei aimeakan” ykuwadaniaz pataan nii waꞌat. (Romans [Romanos] 8:32) Kanum Tuminkery kuwadan ytaan nii waꞌat? Pytykpan nii bauran tuminhapkary diꞌii ydaꞌy, diuraz karichi idiaꞌaꞌu.