Han Enero 7, 2020, an Puerto Rico ginbay-og hin magnitude 6.4 nga linog, nga ginsundan pa hin ginatos nga maghinay nga linog. Ha aga han Enero 11, nagkaada magnitude 5.9 nga linog ha isla.

Damu han apektado nga mga lugar an waray pa gihapon koryente ngan damu an naukoy ha gawas han ira mga balay. Ginkompirma han sanga nga opisina ha Estados Unidos nga waray han aton kabugtoan an nasamaran o namatay. Pero, 248 an kinahanglan bumaya ha ira mga balay. Labot pa hito, 8 nga balay han mga magwarali an nabungkag ngan 70 nga mga balay an naguba. Napulo liwat nga Kingdom Hall an naguba. Usa nga Disaster Relief Committee, upod an mga paramangno han sirkito didto, an nanginginano ha pagtagana hin relief ngan pagbisita ha mga magwarali nga naapektohan.

Bisan pa hinin makuri nga sitwasyon, an aton kabugtoan didto padayon ha ira pag-alagad kan Jehova. Hi Bugto Robert Hendriks, nga nanginginano han buruhaton han Public Information Desk ha sanga nga opisina ha United States, nagsiring: “An sugad hini nga trahedya diri komon ha Puerto Rico, salit ini nga mga linog nakahatag gud hin kabaraka ha aton kabugtoan. Pero, makaparig-on gud makita nga waray hira manluya. Tubtob nga posible, padayon hira ha ira pagkatirok ngan pagsangyaw bisan waray koryente o tubig. Ginhihimo han mga tigurang an ira makakaya para mabisita, madasig, ngan masuportahan an ngatanan nga nanginginahanglan.”

Nadadasig kita ha iginpapakita nga apresasyon han aton kabugtoan ha espirituwal nga mga butang samtang hira nabangon ha distroso nga dara hinin natural nga kalamidad. Nag-aampo kita nga padayon hira tagan ni Jehova hin murayaw nga hunahuna.​—Salmo 119:165.