Usahay, naghuhunahuna an pipira nga magsiringba han Dios kon may pulos ba an pagkinabuhi uyon ha mga suruklan han Biblia. (Salmo 73:2, 3) Bangin testingan nira nga magbuhat hin mga butang nga diri uyon ha mga balaud ni Jehova ngan katapos itatago nira ha iba nga kabugtoan ha kongregasyon an ira maraot nga ginbubuhat.

 Ini nga artikulo gindisenyo para hadton may-ada doble nga pagkinabuhi nga naruruyag nga iundang ito.

Hini nga artikulo

•  Ano an doble nga pagkinabuhi?

•  An pagkaada ba doble nga pagkinabuhi nagpapasabot nga maraot ako nga tawo?

•  Paonan-o ko maiuundang an doble nga pagkinabuhi?

•  An ginsisiring han imo mga igkasi-batan-on

 An pagkaada doble nga pagkinabuhi nagpapasabot nga kon kaupod mo an imo mga igkasi-batan-on nga diri nasugot kan Jehova, nagbubuhat ka han mga butang nga maaram ka nga sayop; pero kon kaupod mo an kabugtoan ha kongregasyon, nagios ka nga baga hin karuyag mo nga mag-alagad kan Jehova. Sugad ito han may-ada ka duha nga pagkinabuhi, ngan an tagsa hito nagsusul-ot ka hin maskara tungod kay may gintatago ka.

 “Kon doble an imo pagkinabuhi, may igintatago ka ha kabugtoan ngan ha mga diri alagad ni Jehova, salit waray bisan hin-o nga maaram kon hin-o ka gud. Ha pagkatinuod, kon doble an imo pagkinabuhi ginlilimbongan mo la an ngatanan.”—Erin.

 Maaram ka ba? An doble nga pagkinabuhi mahimo mag-upod hin pagbuhat hin mga butang ha tago nga maaram ka nga diri gin-uuyonan ni Jehova.

 “Han 14 anyos ako, nagtikang ako pagkita hin maglaw-ay nga piktyur ngan video ha Internet. Kon kaupod ko an iba, nagpapakunokuno ako nga ginkakangalasan ko an pornograpiya, pero maaram ako nga diri ito tinuod.”—Nolan.

 Prinsipyo ha Biblia: “Waray tawo nga mahimo magpauripon ha duha nga agaron; kay kangangalasan niya an usa ngan hihigugmaon an usa, o uunongan niya an usa ngan tatamayon an usa.”—Mateo 6:24.

 Diri man. Oo, may pipira nga tawo nga nadiri pagkinabuhi uyon ha mga suruklan han Biblia. Pero sugad ka ba hito? O may iba nga rason sugad han:

•   Naaawod ka nga mapaiba ha imo kasangkayan.

•   Napapansin mo nga mas nagkakauyon kamo han imo mga kaeskwela kay han imo mga kakongregasyon.

•   Para ha imo, diri mo kaya sundon an ngatanan nga sugo han Dios.

 “Pagkita ko, an pipira nga batan-on nga may doble nga pagkinabuhi mas karuyag nga makaupod an mga tawo nga diri natoo han ira mga gintotoohan sugad nga Kristiano tungod kay diri nira karuyag nga mapaiba hira, basta may magin sangkay la hira.”—David.

 Syempre, waray bisan hain hini an makakaghatag ha aton hin maopay nga rason nga magkaada doble nga pagkinabuhi. Pero, iginsusumat hito nga bisan an mag-opay nga tawo puydi magsayop. Kon ito an nahitabo ha imo, ano an puydi mo buhaton?

1.  1. Usisaha an imo pagkinabuhi yana. Pakianhi an imo kalugaringon: ‘Ini ba an klase han pagkatawo nga karuyag ko? Kon magpapadayon ako nga sugad hini, ano an magigin resulta?’

    Prinsipyo ha Biblia: “An maaramon nga tawo nakakakita han peligro . . . , pero an mga waray eksperyensya nagpapadayon la ngan nag-aantos han mga resulta.”—Proberbios 27:12.

2.  2. Magin tangkod. Ipakiistorya an imo sitwasyon ha imo mga kag-anak o ha usa nga hamtong nga sangkay nga nasunod ha mga balaud ni Jehova. Sigurado nga malilipay hira nga nagpabulig ka ha ira. Ngan magigin proud hira ha imo tungod kay karuyag mo buhaton an husto!

    “An pagsumat ha iba han akon mga sayop usa han pinakamakuri nga akon ginbuhat, pero han ginhimo ko ito, naggaan gud an akon pag-abat.”—Nolan.

    Prinsipyo ha Biblia: “An nagtatabon han iya mga pagtalapas diri maglalampos,pero an bisan hin-o nga nagsusumat ngan nabaya hito kakaloy-an.”—Proberbios 28:13.

3.  3. Karawata an mga resulta. Hinumdumi, kon may igintago ka ha imo mga kag-anak o ha kabugtoan ha kongregasyon, bangin nawara mo an ira pagtapod. Salit, bangin tagan ka hin pipira nga restriksyon han imo mga kag-anak o han mga tigurang ha kongregasyon. Karawata ito ngan magin determinado nga magin “tangkod ha ngatanan nga butang” tikang yana.—Hebreo 13:18.

    Prinsipyo ha Biblia: “Pamati ha sagdon ngan karawata an disiplina, basi magin maaramon ka ha imo tidaraon.”—Proberbios 19:20.

4.  4. Magin kombinsido nga hinigugma ka han Dios. Tungod kay hinigugma kita ni Jehova, maaram gud hiya han ngatanan naton nga ginbubuhat. Amo nga maaram hiya kon may-ada ka doble nga pagkinabuhi, ngan nasusubo hiya hito. Pero, tungod ‘kay nagtatagad hiya ha imo,’ karuyag niya nga buligan ka nga buhaton an husto.—1 Pedro 5:7.

    Prinsipyo ha Biblia: “An mga mata ni Jehova nagkikita ngadto-nganhi ha bug-os nga tuna basi ipakita an iya kusog para hadton bug-os an kasingkasing ngadto ha iya.”—2 Cronicas 16:9.