Para ha pipira, waray na mas boring pa kay ha panahon nga diri ka nakakagawas ha iyo balay tungod kay mauran, diin waray ka nahihimo ngan waray ka nakakadtoan. “Ha sugad hito nga mga panahon,” siring han batan-on nga hi Robert, “nagliliningkod la ako ngan diri ako maaram han akon bubuhaton.”

 Inabat mo na ba ito? Kon oo, mabubuligan ka hini nga artikulo!

•  An kinahanglan mo hibaroan

•  An puydi mo himoon

•  An ginsisiring han iba nga batan-on

•   Bangin diri makabulig an paggamit hin gadyet.

   An pag-ininternet mahimo nga usa nga paagi ha pagpalabay han oras, pero makakapugong ito han imo pagin creative, salit mas mabu-boring ka la. “Mari-realize mo nga nagtitinutok ka la ha screen, pero diri nagana an imo hunahuna,” siring ni Jeremy, 21 anyos.

   Nauyon hito an batan-on nga hi Elena. “Limitado la an imo mahihimo ha imo gadyet,” siring niya. “Iginpapahirayo ka hito ha reyalidad, salit kon diri ka na nagamit han imo gadyet, mas nabu-boring ka la!”

•   Importante nga may-ada ka husto nga disposisyon.

   Kon damu an imo ginbubuhat, diri ka ba mabu-boring? Depende ito kon ano ka kainteresado ha imo ginbubuhat. Pananglitan, an batan-on nga hi Karen nagsiring: “Nabu-boring gud ako pag-eskwela, bisan kon damu an akon ginbubuhat ha bug-os nga adlaw. Kinahanglan magin interesado ka ha imo ginhihimo basi diri ka ma-boring.”

 Maaram ka ba? “An pagin waray nahihimo” diri usa nga ulang, lugod usa nga oportunidad—pariho ito hin matambok nga tuna, diin puydi magtubo an imo pagin creative.

 Magin interesado ha iba-iba nga butang. Magkaada bag-o nga kasangkayan. Magkaada bag-o nga hobby. Pag-research hin bag-o nga mga topiko. An mga tawo nga interesado ha iba-iba nga butang kaurogan na nga diri nabu-boring kon nag-uusahan la hira—ngan posible liwat nga diri hira boring nga kaupod!

 Prinsipyo ha Biblia: “Anoman an mabubuhat han imo kamot, buhata ito ha bug-os mo nga kusog.”—Eclesiastes 9:10.

 “Bag-o pa la ako nga nag-aaram han Mandarin Chinese, ngan tungod kay adlaw-adlaw ko ito nga ginpapraktis, na-realize ko nga na-miss ko an sugad nga klase hin pag-aram. Karuyag ko nga pirme ako may ginbubuhat kay nagana hito an akon hunahuna ngan nabulig ito ha akon nga magamit ko an akon panahon ha mas mapulsanon nga mga butang.”—Melinda.

 Pagpokus ha imo tumong. Kon nasasabtan mo kon kay ano nga ginbubuhat mo an usa nga butang, mas magigin interesado ka hito. Diri ka mabu-boring bisan ha mga buruhaton ha eskwelahan kon nasasabtan mo an katuyoan hito.

 Prinsipyo ha Biblia: “Waray na mas maopay pa para ha tawo kay han . . . malipay ha iya ginpinanigurohan pagtrabaho.”—Eclesiastes 2:24.

 “Han hirani na matapos an amon klase, nag-aaram ako hin walo ka oras kada adlaw kay kinahanglan ko makalanat han amon leksyon. Boring? Diri, kay determinado ako nga mahimo ito. Nagpokus ako ha amon graduation—ngan ito an nakaaghat ha akon.”—Hannah.

 Akseptara an diri mo mababag-o. Bisan an pinakaeksayting nga mga buruhaton mahimo magin boring kon pauroutro mo na la ito nga ginhihimo. Ngan usahay, ginka-cancel bisan han pinakaduok mo nga kasangkayan an iyo mga plano, ngan tungod hito waray ka na hihimoon. Imbes nga masubo ngan magin negatibo ha imo sitwasyon, pangalimbasugi nga magin positibo.

 Prinsipyo ha Biblia: “An tawo nga may malipayon nga kasingkasing nagpapadayon ha pagpiyesta.”—Proberbios 15:15.

 “Ginsidngan ako han usa ko nga sangkay nga ig-enjoy ko an panahon nga nag-uusahan la ako. Nagsiring hiya nga kinahanglan kita ngatanan mahibaro nga magin balanse, ig-enjoy naton an panahon nga kaupod naton an iba ngan ig-enjoy liwat naton an panahon nga nag-uusahan la kita.”—Ivy.