An antikristo diri la basta usa nga indibiduwal o partikular nga grupo tungod kay an Biblia nasiring nga ‘damu [an] antikristo.’ (1 Juan 2:18) Lugod, an pulong nga “antikristo,” nga tikang ha Griego nga pulong nga nangangahulogan “kontra (o kasaliwan han) Kristo,” nagtutudlok ha bisan hin-o nga nagbubuhat han masunod:

•   Nagninigar nga hi Jesus amo an Kristo (Mesias) o nagninigar nga hiya an Anak han Dios.—1 Juan 2:22.

•   Nakontra ha Kristo, an Usa nga Dinihogan han Dios.—Salmo 2:1, 2; Lucas 11:23.

•   Nagpapakunokuno nga hiya an Kristo.—Mateo 24:24.

•   Nagtitimaraot ha mga sumurunod han Kristo, tungod kay para kan Jesus, an ginbubuhat nira ha iya mga sumurunod sugad hin ginbubuhat liwat ha iya.—Buhat 9:5.

•   Nasiring nga Kristiano kuno hiya pero nagbubuhat hin pagkamatinalapason o panlimbong.—Mateo 7:22, 23; 2 Corinto 11:13.

 Labot la nga gintatawag an mga indibiduwal nga nagbubuhat hito sugad nga mga antikristo, gintatawag liwat hira han Biblia ha kabug-osan sugad nga “an antikristo.” (2 Juan 7) Siyahan nga nagkaada antikristo ha panahon han mga apostol, ngan tubtob yana, may-ada la gihapon antikristo. Igintagna han Biblia nga mahitatabo gud ito.—1 Juan 4:3.

•   Nagtututdo hira hin buwa nga mga ideya may kalabotan kan Jesus. (Mateo 24:9, 11) Pananglitan, adton nagtututdo han trinidad o nga hi Jesus an Dios nga Makagarahum-ha-ngatanan, ha pagkamatuod, nakontra han mga katutdoan ni Jesus, nga nagsiring: “An Amay mas labaw kay ha akon.”—Juan 14:28.

•   Diri ginkakarawat han mga antikristo an ginsiring ni Jesus mahitungod ha kon paonan-o nagios an Ginhadian han Dios. Pananglitan, an pipira nga relihiyoso nga mga lider nasiring nga ginagamit han Kristo an mga gobyerno han tawo. Pero ini nga katutdoan nakontra hini nga ginsiring ni Jesus: “An akon Ginhadian diri bahin hini nga kalibotan.”—Juan 18:36.

•   Nasiring hira nga hi Jesus an ira Ginoo, pero diri nira ginsusugot an iya mga sugo, upod na an pagsangyaw han maopay nga sumat han Ginhadian.—Mateo 28:19, 20; Lucas 6:46; Buhat 10:42.