Hin-o an Makadto ha Langit?

I-PLAY

Hin-o an Makadto ha Langit?

An baton han Biblia

An Dios nagpipili hin limitado nga kadamu han matinumanon nga mga Kristiano, nga katapos mamatay, babanhawon ngadto ha kinabuhi ha langit. (1 Pedro 1:3, 4) Kon napili na hira, kinahanglan padayon nga tipigan nira an ira marig-on nga pagtoo ngan an ira limpyo nga panggawi basi diri mawara ha ira an ira langitnon nga panurundon.—Efeso 5:5; Filipos 3:12-14.

Ano an ira bubuhaton ha langit?

Mag-aalagad hira kaupod ni Jesus sugad nga mga hadi ngan saserdote ha sulod hin 1,000 ka tuig. (Pahayag 5:9, 10; 20:6) Hira an magkukompwesto han “bag-o nga mga langit,” o langitnon nga gobyerno, nga magmamando ha “bag-o nga tuna,” o ha mga tawo dinhi ha tuna. Ito nga mga magmarando ha langit mabulig ha mga tawo nga maibalik ha ira perpekto nga kahimtang sugad han orihinal nga katuyoan han Dios.—Isaias 65:17; 2 Pedro 3:13.

Pira an babanhawon ngadto ha langit?

Iginpapakita han Biblia nga 144,000 nga tawo an babanhawon ngadto ha kinabuhi ha langit. (Pahayag 7:4) Ha bisyon nga nakarekord ha Pahayag 14:1-3, nakita ni apostol Juan nga an “an Kordero natindog ha Bukid Zion, ngan kaupod niya an 144,000.” Hini nga bisyon, “an Kordero” nagrirepresentar ha ginbanhaw nga hi Jesus. (Juan 1:29; 1 Pedro 1:19) An “Bukid Zion” nagrirepresentar ha importante nga posisyon ni Jesus ngan han 144,000 nga kaupod niya ha pagmando ha langit—Salmo 2:6; Hebreo 12:22.

Adton mga “tinawag ngan pinili” basi magmando kaupod han Kristo ha Ginhadian gintatawag nga “gutiay nga panon.” (Pahayag 17:14; Lucas 12:32) Iginpapakita hini nga an ira kadamu mas gutiay gud kompara ha kabug-osan nga kadamu han mga karnero ni Jesus.—Juan 10:16.

Sayop nga mga ideya mahitungod hadton makadto ha langit

Sayop nga ideya: An ngatanan nga maopay nga tawo makadto ha langit.

Kamatuoran: An Dios nagsasaad nga an kadam-an nga maopay nga tawo mabubuhi dinhi ha tuna ha waray kataposan.—Salmo 37:11, 29, 34.

● Hi Jesus nagsiring: “Waray tawo nga sinaka ha langit.” (Juan 3:13) Iginpapakita hini nga iya ginsiring nga an mag-opay nga tawo nga namatay antes ha iya, sugad kanda Abraham, Moises, Job, ngan David waray kumadto ha langit. (Buhat 2:29, 34) Lugod, may paglaom hira nga mabanhaw basi mabuhi dinhi ha tuna.—Job 14:13-15.

● An pagkabanhaw ngadto ha kinabuhi ha langit gintatawag nga “siyahan nga pagkabanhaw.” (Pahayag 20:6) Iginpapakita hini nga magkakaada iba pa nga pagkabanhaw. Ito an pagkabanhaw para ha kinabuhi dinhi ha tuna.

● Igintututdo han Biblia nga ha pagmando han Ginhadian han Dios, “mawawara na an kamatayon.” (Pahayag 21:3, 4) Ini nga saad dinhi gud ha tuna mahitatabo kay waray kamatayon ha langit.

Sayop nga ideya: An tagsa nga tawo an nagpipili kon diin niya karuyag mabuhi, kon ha langit ba o ha tuna.

Kamatuoran: An Dios an nagdidesisyon kon hin-o nga matinumanon nga mga Kristiano an makakakarawat han “premyo nga langitnon nga pagtawag,” nga amo an paglaom nga mabuhi ha langit. (Filipos 3:14) Diri ito nakadepende ha hingyap o ambisyon han usa nga tawo.—Mateo 20:20-23.

Sayop nga ideya: An paglaom nga kinabuhi nga waray kataposan dinhi ha tuna mas minos, iginhahatag la ito hadton diri angayan kumadto ha langit.

Kamatuoran: An mga makakakarawat hin kinabuhi nga waray kataposan dinhi ha tuna gintatawag han Dios nga “akon katawohan,” “akon mga pinili,” ngan “mga binendisyonan ni Jehova.” (Isaias 65:21-23) Magkakaada hira pribilehiyo nga tumanon an orihinal nga katuyoan han Dios para ha mga tawo—an mabuhi ha waray kataposan ha perpekto nga kahimtang ha paraiso nga tuna.—Genesis 1:28; Salmo 115:16; Isaias 45:18.

Sayop nga ideya: An numero nga 144,000 nga gin-unabi ha Pahayag simboliko la, diri literal.

Kamatuoran: Bisan kon ha Pahayag may mababasa nga simboliko nga mga numero, an pipira nga numero nga gin-gagamit hito mga literal. Pananglitan, nag-uunabi ito han “12 nga ngaran han 12 nga apostol han Kordero.” (Pahayag 21:14) Tagda an ebidensya kon kay ano nga angay liwat sabuton hin literal an numero nga 144,000.

An Pahayag 7:4 nag-uunabi han “kadamu han mga ginselyohan [o, ginkompirma nga makadto ha langit] 144,000.” Ha konteksto hini nga bersikulo, may gin-unabi nga ikaduha nga grupo: “usa nga daku nga grupo, nga waray tawo nga makaihap.” An mga kaapi hiton “daku nga grupo” makakakarawat liwat hin katalwasan tikang ha Dios. (Pahayag 7:9, 10) Kon an numero nga 144,000 simboliko la ngan nagtutudlok ha usa nga grupo nga waray espisipiko nga kadamu, magigin waray pulos an magkaiba nga pagkahulagway hito nga duha nga grupo. a

a Sugad man, hi Propesor Robert L. Thomas nagsurat may kalabotan ha numero nga 144,000 nga gin-unabi ha Pahayag 7:4: “Usa ito nga espisipiko nga kadamu kompara ha diri espisipiko nga kadamu ha 7:9. Kon sasabton ito hin simboliko, waray numero ha libro nga mahimo sabuton hin literal.”—Revelation 1-7: An Exegetical Commentary, pahina 474.

Dugang pa, an 144,000 gin-uunabi sugad nga “ginpalit tikang ha katawohan sugad nga siyahan nga mga bunga.” (Pahayag 14:4) An mga pulong nga “siyahan nga mga bunga” nagtutudlok ha pipira la nga mga pinili. Angayan la nga naghuhulagway ini hadton makakaupod han Kristo ha langit nga magmamando ha waray espisipiko nga kadamu hin mga sakop dinhi ha tuna.—Pahayag 5:10.