Igin-aaghat han Biblia an paghatag nga boluntaryo ngan may tama nga motibo. Iginpapakita hito nga an sugad nga paghatag nakakapalipay diri la ha nakarawat kondi pati ha naghahatag. (Proberbios 11:25; Lucas 6:38) Hi Jesus nagsiring: “Mas daku an kalipay ha paghatag kay ha pagkarawat.”—Buhat 20:35.

• Ano nga paghatag an nakakapalipay ha Dios?

• Ano nga paghatag an diri angayan?

• Mga teksto ha Biblia mahitungod ha paghatag

 An paghatag nakakapalipay ha Dios kon boluntaryo nga ginbubuhat ito. “Buhaton han kada tagsa an uyon ha nagin desisyon han iya kasingkasing,” siring han Biblia, “nga diri nag-aalang o napipiritan, kay an Dios nahigugma ha malipayon nga nahatag.”—2 Corinto 9:7, footnote.

 An kinasingkasing nga paghatag bahin han “pagsingba” nga gin-uuyonan han Dios. (Santiago 1:27) An mahinatagon nga tawo nga nabulig ha mga nanginginahanglan nakakapalipay ha Dios, ngan para ha Dios ito nga pagkamahinatagon pagpautang ha iya. (Proberbios 19:17) Igintututdo han Biblia nga an Dios mismo an magbabalos ha naghatag.—Lucas 14:12-14.

 Kon ginbubuhat ito nga may sayop nga motibo. Pananglitan:

•   Basi magpaimpres ha iba.—Mateo 6:2.

•   Basi makakarawat hin kabalyo.—Lucas 14:12-14.

•   Basi matalwas.—Salmo 49:6, 7.

 Kon an iginhatag ginagamit ha mga butang nga ginkakangalasan han Dios. Pananglitan, sayop an paghatag hin kwarta ha usa para magamit niya ha paghuygo, pagdroga, o paghubog. (1 Corinto 6:9, 10; 2 Corinto 7:1) Diri liwat angayan an paghatag ha usa nga kaya suportaran an iya kalugaringon pero nadiri pagtrabaho.—2 Tesalonica 3:10.

 Kon napapabay-an na han usa an mga responsabilidad nga iginhatag ha iya han Dios. Igintututdo han Biblia nga kinahanglan itagana han ulo han pamilya an mga panginahanglan han iya panimalay. (1 Timoteo 5:8) Diri tama nga an ulo han pamilya sobra-sobra nga maghahatag ha iba nga tungod hito nagkukuri na lugod an iya pamilya. Ginkondenar ni Jesus adton nagdumiri pagtagana para ha ira lagas na nga kag-anak kay nasiring hira nga an ira mga panag-iya “igindedikar na ha Dios sugad nga regalo.”—Marcos 7:9-13.