Diri, diri parapriho an ngatanan nga relihiyon. Ha Biblia, damu an mga ehemplo han relihiyon nga nakakapasubo ha Dios. May-ada ini duha nga nangunguna nga kategoriya.

Kategoriya 1: Nagsisingba ha buwa nga mga dios

 Gin-gagamit han Biblia an mga pulong sugad han “buwa la,” ‘waray-pulos,’ ngan “waray gamit” sugad nga diskripsyon ha pagsingba ha buwa nga mga dios. (Jeremias 10:3-5; 16:19, 20) Hi Jehova a nga Dios nagsugo ha kadaan nga nasud han Israel: “Ayaw pagkaada hin iba nga mga dios labot ha akon.” (Exodo 20:3, 23; 23:24) Han an mga Israelita nagsingba ha iba nga mga dios, “hi Jehova nasina hinduro.”—Numeros 25:3; Levitico 20:2; Hukom 2:13, 14.

 Yana, pariho la gihapon an inaabat han Dios mahitungod ha pagsingba ha “gintatawag nga mga dios.” (1 Corinto 8:5, 6; Galacia 4:8) Ginsusugo niya adton karuyag magsingba ha iya nga diri na makig-upod hadton nagbubuhat han buwa nga relihiyon. Hiya nagsiring: “Gawas kamo tikang ha ira, ngan bulag kamo.” (2 Corinto 6:14-17) Kon an ngatanan nga relihiyon parapriho la ngan naggigiya ha mga tawo ngadto ha Dios, kay ano nga maghahatag pa an Dios hin sugad nga sugo?

Kategoriya 2: Nagsisingba ha tinuod nga Dios ha paagi nga diri niya inuuyonan

 May mga panahon nga an mga Israelita nagsingba ha Dios pinaagi han mga gintotoohan ngan mga buruhaton tikang ha pagsingba ha buwa nga mga dios. Pero iginsalikway hira ni Jehova han ginhalo nira an tinuod ngan an buwa nga relihiyon. (Exodo 32:8; Deuteronomio 12:2-4) Ginkondenar ni Jesus an mga lider han relihiyon ha iya panahon tungod han ira paagi ha pagsingba ha Dios; iginpapakita nira nga kunohay mga relihiyoso hira, pero mga hipokrito hira kay “ginbabalewaray [nira] an mas importante nga mga butang han Balaud, sugad han hustisya, kalooy, ngan pagkamatinumanon.”—Mateo 23:23.

 Sugad man yana, an relihiyon la nga iginbase ha kamatuoran an naggigiya ha mga tawo ngadto ha Dios. Ini nga kamatuoran makikita ha Biblia. (Juan 4:24; 17:17; 2 Timoteo 3:16, 17) An mga relihiyon nga an mga katutdoan nakontra ha Biblia, ha pagkamatuod, ira iginpapahirayo an mga tawo tikang ha Dios. Damu nga katutdoan nga ginhuhunahuna han mga tawo nga tikang ha Biblia—upod na an Trinidad, imortal nga kalag, ngan waray kataposan nga pagpasakit—an nagtikang ha mga tawo nga nagsisingba ha buwa nga mga dios. An pagsingba nga nag-aaghat han sugad nga mga katutdoan “waray pulos,” o waray gamit, kay ginliliwanan hito an mga sugo han Dios hin relihiyoso nga mga tradisyon.—Marcos 7:7, 8.

 Mangil-ad gud ha Dios an pagin hipokrito han mga relihiyon. (Tito 1:16) An tinuod nga relihiyon nabulig ha mga tawo nga magin duok ha Dios, diri la ito kay usa nga rituwal o pormalidad, kondi nakakaapekto ito ha ira mga desisyon ngan ha ngatanan nga ira ginbubuhat. Pananglitan, an Biblia nasiring: “Kon an bisan hin-o nga tawo naghuhunahuna nga relihiyoso hiya pero diri ginkukontrol an iya dila, ginlilimbongan niya an iya kasingkasing, ngan waray pulos an iya pagsingba. An relihiyon nga limpyo ngan waray hugaw ha pagkita han aton Dios ngan Amay amo ini: an pagmangno ha mga ilo ngan mga balo nga babaye ha ira kasakitan, ngan an pagtipig ha kalugaringon nga waray buring tikang ha kalibotan.” (Santiago 1:26, 27; mga footnote) Gin-gamit han An Baraan nga Kasuratan nga hubad an mga pulong nga “relihiyon nga putli” para hini nga limpyo ngan diri hipokrito nga pagsingba.