Maiha na nga naobserbaran han mga syentista nga nag-aaram han mga hayop an abilidad han sisi ha pagpilit ha mga bato, piyer, ngan ha kasko han mga barko. An glue han sisi ginsisiring nga amo an pinakamaopay nga pandukot kay ha bisan ano nga artipisyal nga produkto. Pero hinin bag-o la nahibaroan kon paonan-o an mga sisi napilit ha hulos nga butang.

 Tagda ini: Iginpapakita han mga pag-aram nga an usa nga larva han sisi nga nakakalangoy na nag-uusisa hin iba-iba nga dapit antes ito magpili hin mapipilitan. Kon nakabiling na ito hin dapit nga pipilitan, nagpapagawas ito hin duha nga substansya. An siyahan amo an maasyete nga likido nga nabulig basi diri dumukot an tubig ha napili nga dapit. Gin-aandam liwat hito nga likido an napili nga dapit para ha ikaduha nga substansya, nga ginkukompwesto hin mga protina nga gintatawag nga phosphoproteins.

 Ito nga duha nga substansya nagpuporma hin marig-on nga glue o pandukot nga diri nadadaot bisan han bakterya. Importante gud nga marig-on ito nga pandukot kay an sisi magpapabilin nga napilit hito nga dapit ha bug-os nga kinabuhi hito.

 An proseso han paghimo han glue han sisi mas komplikado gud kay han ginhuhunahuna hadto han mga syentista. An usa nga membro han grupo nga nakadiskobre hito nga proseso nagsiring: “Maopay gud ngan natural ito nga solusyon hini nga problema kon paonan-o makakapapilit ha mahulos nga dapit.” Ito nga nadiskobrehan mahimo makabulig ha mga parasaliksik nga makahimo hin mga glue o pandukot nga magagamit ha ilarom han tubig, pati hin artipisyal nga mga pandukot nga hinimo tikang ha natural nga mga substansya nga magagamit ha electronics ngan mga medical implant.

 Ano ha imo panhunahuna? An glue ba han sisi produkto han ebolusyon, o may nagdisenyo hito?