An Baraan nga Biblia sinurat nga paagi han pakigkomunikar han Dios ha aton ngatanan. Kinahanglan naton ito pag-adman basi makilala an Awtor hito. (Juan 17:3; 2 Timoteo 3:16) Dida hito, iginpapahayag ni Jehova nga Dios an iya katuyoan para ha katawohan ngan para ha ira urukyan nga tuna.—Genesis 3:15; Pahayag 21:3, 4.

Waray iba nga libro nga may daku gud nga epekto ha kinabuhi han mga tawo. An Biblia nag-aaghat ha aton nga ipakita an mga kalidad ni Jehova nga gugma, kalooy, ngan pagpaid. Naghahatag ito hin paglaom, nga nabulig ha mga tawo nga mailob bisan an pinakagrabe nga pag-antos. Ngan padayon nga iginbubuhayhag hito an mga elemento hini nga kalibotan nga diri uyon ha hingpit nga kaburut-on han Dios.—Salmo 119:105; Hebreo 4:12; 1 Juan 2:15-17.

An Biblia orihinal nga iginsurat ha Hebreo, Aramaico, ngan Griego. Iginhubad an kabug-osan o an bahin hito ha sobra 3,000 nga yinaknan. Ito an pinakadamu nga naihubad ngan naipanaltag nga libro ha kasaysayan. Ito gud an sadang naton laoman. An tagna han Biblia nasiring: “Inin maopay nga sumat han Ginhadian [an nangunguna nga mensahe nga aada ha Biblia] isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan katapos hito maabot an kataposan.”—Mateo 24:14.

Tungod kay ginkikilala namon an pagkaimportante han mensahe han Biblia, tumong namon nga magkaada hin hubad nga diri la kay nasunod ha orihinal nga kasuratan kondi klaro liwat ngan masayon basahon. An mga artikulo ha Apendise nga “Mga Prinsipyo ha Paghubad han Biblia,” “Mga Bahin Hini nga Edisyon,” ngan “Kon Paonan-o Nakaabot ha Aton an Biblia” naghihisgot han pipira nga prinsipyo ha paghubad nga ginsunod, sugad man han pipira nga pagsaysay han mga bahin hini nga edisyon.

An mga nahigugma kan Jehova nga Dios ngan nagsisingba ha iya naghihingyap hin husto ngan masayon masabtan nga hubad han Pulong han Dios. (1 Timoteo 2:4) Tungod hito, ginhimo namon ini nga edisyon ha Waray-Waray, uyon ha amon katuyoan nga maihubad an New World Translation ha damu gud nga yinaknan tubtob nga posible. Naglalaom kami ngan nag-aampo, amon hinigugma nga magbarasa, nga magpahimulos ka hini nga edisyon han Baraan nga Kasuratan samtang nangangalimbasog ka nga ‘pamilngon an Dios ngan mahiagian gud hiya.’—Buhat 17:27.