An Siyahan nga Surat ha mga Taga-Corinto 13:1-13
-
Gugma—pinakamaopay nga paagi (1-13)
13 Kon nagyayakan ako han mga pinulongan han mga tawo ngan han mga anghel pero waray ako gugma, nagin sugad ako hin nagtitinagungtong nga gong o hin nagtitinagingting nga simbal.
2 Ngan kon may regalo ako ha pagtagna ngan may pagsabot han ngatanan nga sagrado nga tinago ngan han ngatanan nga kahibaro,+ ngan kon may marig-on ako nga pagtoo nga makakabalhin hin mga bukid, pero waray ako gugma, waray ako pulos.*+
3 Ngan kon ihatag ko an ngatanan ko nga panag-iya basi pakaunon an iba,+ ngan kon ihatag ko an akon lawas basi makapanhambog ako, pero waray ako gugma,+ waray gud ito kapulsanan ha akon.
4 An gugma+ pasensyoso*+ ngan buotan.+ An gugma diri maabugho.+ Diri ito naghahambog, diri nagpapahitaas,+
5 diri nagawi hin diri desente,*+ diri nagbibiling han kalugaringon la nga kaopayan,+ ngan diri naaaghat nga masina.+ Diri ito nag-iihap han karat-an.*+
6 Diri ito nalilipay ha pagkadiri-matadong,+ kondi nalilipay ha kamatuoran.
7 Nag-aantos ito ha ngatanan nga butang,+ natuod ha ngatanan nga butang,+ naglalaom ha ngatanan nga butang,+ nagpapailob ha ngatanan nga butang.+
8 An gugma diri gud napapakyas. Pero kon may mga regalo ha pagtagna, wawad-on ito; kon may mga pinulongan,* matatapos ito; kon may kahibaro, wawad-on ito.
9 Kay diri kompleto an aton kahibaro+ ngan diri kompleto an aton pagtagna,
10 pero kon umabot na an kompleto, wawad-on na an diri kompleto.
11 Han bata pa ako, nagyayakan ako sugad hin bata, naghuhunahuna sugad hin bata, nangangatadongan sugad hin bata; kondi yana nga daku na ako, ginwara ko na an mga kinaiya han usa nga bata.
12 Kay yana diri klaro nga dagway* an aton nakikita pinaagi han metal nga espiho, pero ha urhi makikita ito hin klaro nga sugad hin magkaatubang. Ha presente, diri kompleto an akon hinbabaroan, pero ha urhi mahibabaro ako han husto,* sugad la han husto nga pagkakilala ha akon.
13 Pero yana, ini nga tulo magpapabilin: an pagtoo, paglaom, gugma; kondi an pinakaimportante hini amo an gugma.+
Mga footnote
^ O “waray ako gamit.”
^ O “hilawig an pagpailob.”
^ O “han mga sayop.”
^ O “diri bastos.”
^ Karuyag sidngon, milagroso nga pagyakan hin iba nga mga yinaknan.
^ O “diri matin-aw.”
^ O “hin bug-os.”
