An Siyahan nga Libro han mga Cronicas 15:1-29
15 Ngan padayon hiya nga nagtukod hin mga balay para ha iya ha Syudad ni David, ngan nag-andam hiya hin lugar para ha Arka han tinuod nga Dios ngan nagtindog hin tolda para hito.+
2 Hito nga panahon hi David nagsiring: “Waray bisan hin-o nga magdadara han Arka han tinuod nga Dios labot la han mga Levita, kay ginpili hira ni Jehova basi magdara han Arka ni Jehova ngan basi magserbi pirme ha iya.”+
3 Katapos, gintirok ni David an bug-os nga Israel ha Jerusalem basi dad-on an Arka ni Jehova ngadto ha lugar nga iya gin-andam para hito.+
4 Gintirok ni David an katulinan ni Aaron+ ngan an mga Levita:+
5 tikang ha mga Kohatita, hi Uriel nga lider ngan 120 han iya kabugtoan;
6 tikang ha mga Merarita, hi Asaias+ nga lider ngan 220 han iya kabugtoan;
7 tikang ha mga Gersomita, hi Joel+ nga lider ngan 130 han iya kabugtoan;
8 tikang ha katulinan ni Elizapan,+ hi Semaias nga lider ngan 200 han iya kabugtoan;
9 tikang ha katulinan ni Hebron, hi Eliel nga lider ngan 80 han iya kabugtoan;
10 tikang ha katulinan ni Uziel,+ hi Aminadab nga lider ngan 112 han iya kabugtoan.
11 Dugang pa, gintawag ni David an mga saserdote nga hira Zadok+ ngan Abiatar+ ngan an mga Levita nga hira Uriel, Asaias, Joel, Semaias, Eliel, ngan Aminadab,
12 ngan hiya nagsiring ha ira: “Kamo an mga ulo han mga panimalay* han mga Levita. Baraana an iyo kalugaringon, kamo ngan an iyo kabugtoan, ngan dad-a an Arka ni Jehova nga Dios han Israel ngadto ha lugar nga akon gin-andam para hito.
13 Tungod kay diri kamo an nagdara hito han siyahan nga higayon,+ an kasina ni Jehova nga aton Dios naglarab kontra ha aton,+ kay waray naton sunda an husto nga proseso.”+
14 Salit an mga saserdote ngan an mga Levita nagbaraan han ira kalugaringon basi dad-on an Arka ni Jehova nga Dios han Israel.
15 Katapos, ginpas-an han mga Levita an Arka han tinuod nga Dios pinaagi hin mga bayawan,+ sugad han iginsugo ni Moises uyon ha pulong ni Jehova.
16 Katapos, ginsidngan ni David an mga lider han mga Levita nga tokahan an ira kabugtoan nga mga parakanta nga malipayon nga magkanta nga ginduduyogan hin mga instrumento ha musika: mga instrumento nga may kwerdas, mga arpa,+ ngan mga simbal.+
17 Salit gintokahan han mga Levita hi Heman+ nga anak nga lalaki ni Joel ngan, ha iya kabugtoan, hi Asap+ nga anak nga lalaki ni Berekias ngan, ha mga Merarita nga ira kabugtoan, hi Ethan+ nga anak nga lalaki ni Kusaias.
18 Kaupod nira an ira kabugtoan ha ikaduha nga dibisyon,+ hira Zacarias, Ben, Jaaziel, Semiramot, Jehiel, Uni, Eliab, Benaias, Maaseias, Matitias, Elifelehu, ngan hira Mikneias ngan Obed-edom ngan Jeiel nga mga parabantay han ganghaan.
19 An mga parakanta nga hira Heman,+ Asap,+ ngan Ethan amo an magtutokar han mga simbal nga tumbaga;*+
20 ngan hira Zacarias, Aziel, Semiramot, Jehiel, Uni, Eliab, Maaseias, ngan Benaias nagpatokar han mga instrumento nga may kwerdas nga igintono ha Alamot;*+
21 ngan hira Matitias,+ Elifelehu, Mikneias, Obed-edom, Jeiel, ngan Azazias nagpatokar hin mga arpa nga igintono ha Seminit,*+ ngan amo an nagdumara sugad nga mga direktor.
22 Hi Kenanias+ nga lider han mga Levita amo an nagdumara han pagdara han arka, kay eksperto hiya,
23 ngan hira Berekias ngan Elkana amo an mga parabantay han ganghaan para ha Arka.
24 An mga saserdote nga hira Sebanias, Josafat, Netanel, Amasai, Zacarias, Benaias, ngan Eliezer nagpatunog hin makusog han mga trumpeta ha atubangan han Arka han tinuod nga Dios,+ ngan hira Obed-edom ngan Jehias amo an mga parabantay han ganghaan para ha Arka.
25 Katapos, hi David ngan an mga tigurang ha Israel ngan an mga lider han kada 1,000 nagbaktas basi kuhaon an arka han kasabotan ni Jehova tikang ha balay ni Obed-edom+ nga may pagrayhak.+
26 Han ginbuligan han tinuod nga Dios an mga Levita nga nagdadara han arka han kasabotan ni Jehova, naghalad hira hin pito nga turilyo nga baka ngan pito nga karnero nga lalakí.+
27 Hi David nakasul-ot hin bado nga waray pako nga maopay nga klase an tela, sugad man an ngatanan nga Levita nga nagdadara han Arka, an mga parakanta, ngan hi Kenanias nga nagdudumara han pagdara han arka ngan han mga parakanta; hi David nakasul-ot liwat hin lino nga epod.+
28 An ngatanan nga Israelita malipayon nga nan-gugugliat,+ nagpapatunog han sungay, han mga trumpeta,+ han mga simbal, nagpapatokar hin makusog han mga instrumento nga may kwerdas ngan mga arpa+ samtang ira gindadara an arka han kasabotan ni Jehova.
29 Kondi pag-abot han arka han kasabotan ni Jehova ha Syudad ni David,+ an anak ni Saul nga hi Mical+ nagkita tikang ha bintana ngan iya nakita hi Hadi David nga nagluluksolukso ngan nagsiselebrar; ngan nagtikang hiya pagtamay kan David ha iya kasingkasing.+
Mga footnote
^ Ha Ingles, copper.
