An Siyahan nga Libro han mga Cronicas 5:1-26
5 Ini an mga anak nga lalaki ni Ruben,+ an suhag ni Israel. Hiya an suhag, pero tungod kay iya ginhugawan* an higdaan han iya tatay,+ an iya katungod sugad nga suhag iginhatag ha mga anak nga lalaki ni Jose+ nga anak ni Israel, salit ha lista han katulinan, diri hiya an may katungod sugad nga suhag.
2 Bisan kon hi Juda+ mas labaw kay ha iya kabugtoan ngan tikang ha iya an magigin lider,+ an katungod sugad nga suhag nakarawat ni Jose.
3 An mga anak nga lalaki ni Ruben nga suhag ni Israel amo hira Hanok, Palu, Hezron, ngan Carmi.+
4 An mga anak nga lalaki ni Joel amo hira Semaias, nga an anak hi Gog, nga an anak hi Simei,
5 nga an anak hi Micas, nga an anak hi Reaias, nga an anak hi Baal,
6 nga an anak hi Beerah, nga igindistyero ni Hadi Tilgat-pilneser+ han Asirya; hiya an lider han mga Rubenita.
7 An iya kabugtoan uyon ha lista han katulinan han ira mga pamilya amo hi Jeiel sugad nga ulo, hi Zacarias,
8 ngan hi Bela nga anak ni Azaz nga anak ni Sema nga anak ni Joel, nga naukoy ha rehiyon tikang ha Aroer+ tubtob ha Nebo ngan Baal-meon.+
9 Inukoy hiya ha este nga dapit tubtob ha tinikangan han kamingawan ha Salog Eufrates,+ kay an ira mga hayop nagdamu ha tuna han Gilead.+
10 Ha mga adlaw ni Saul, nakiggirra hira ha mga Hagrita, nga napirde ha ira atubangan, salit nag-ukoy hira ha ira mga tolda ha bug-os nga teritoryo ha este han Gilead.
11 An katulinan ni Gad inukoy ha ira sapit ha tuna han Basan tubtob ha Saleca.+
12 Ha Basan, hi Joel an lider, hi Safam an ikaduha, ngan aada liwat hira Janai ngan Safat.
13 Ngan an ira mga paryente nga kaupod han mga ulo han ira mga panimalay* amo hira Miguel, Mesulam, Sheba, Jorai, Jacan, Zia, ngan Eber, pito ngatanan.
14 Ini an mga anak nga lalaki ni Abihail nga anak ni Huri nga anak ni Jaroa nga anak ni Gilead nga anak ni Miguel nga anak ni Jesisai nga anak ni Jado nga anak ni Buz.
15 Hi Ahi nga anak ni Abdiel nga anak ni Guni amo an ulo han ira panimalay.*
16 Inukoy hira ha Gilead,+ ha Basan+ ngan ha mga bungto nga sakop* hito, ngan ha ngatanan nga panabsaban han Saron tubtob ha tubtoban hito.
17 Iginlista hira ngatanan ha lista han katulinan ha mga adlaw ni Hadi Jotam+ han Juda ngan ha mga adlaw ni Hadi Jeroboam*+ han Israel.
18 An mga Rubenita, an mga Gadita, ngan an katunga han tribo ni Manases may-ada 44,760 nga magkusog nga girriro ha ira kasundalohan nga nagdadara hin mga taming ngan mga espada ngan armado hin mga pana,* ngan binansay hira ha pakiggirra.
19 Nakiggirra hira ha mga Hagrita,+ kanda Jetur, Nafis,+ ngan Nodab.
20 Ngan ginbuligan hira ha pakiggirra ha ira, salit an mga Hagrita ngan an ngatanan nga dinapig ha ira igintubyan ha ira kamot, kay nangaro hira ha Dios hin bulig ha pakiggirra, ngan iya ginbaton an ira pakimalooy kay sinarig hira ha iya.+
21 Ira ginpandakop an ira mga hayop—50,000 nga kamelyo, 250,000 nga karnero, ngan 2,000 nga asno—sugad man an 100,000 nga tawo.*
22 Damu an nagkamatay, kay an tinuod nga Dios an nakiggirra.+ Ngan hira an sinaliwan pag-ukoy ha ira lugar tubtob ha panahon han pagkadistyero.+
23 An katulinan han katunga han tribo ni Manases+ inukoy ha tuna tikang ha Basan tubtob ha Baal-hermon ngan Senir ngan Bukid Hermon.+ Damu hinduro hira.
24 Ini an mga ulo han ira mga panimalay: hira Efer, Isi, Eliel, Azriel, Jeremias, Hodavias, ngan Jadiel; magkusog hira nga mga girriro, mga lalaki nga bantogan, ngan mga ulo han ira mga panimalay.*
25 Pero waray hira magmatinumanon ha Dios han ira mga kaapoy-apoyan ngan nagbuhat hira hin imoralidad pinaagi ha pagsingba ha mga dios han mga katawohan han tuna,+ nga ginpoo han Dios ha ira atubangan.
26 Salit ginpagios han Dios han Israel an espiritu ni Hadi Pul han Asirya+ (karuyag sidngon, hi Hadi Tilgat-pilneser+ han Asirya) basi igdistyero niya an mga Rubenita, an mga Gadita, ngan an katunga han tribo ni Manases ngan gindara hira ngadto ha Hala, Habor, Hara, ngan ha salog han Gozan,+ diin aadto hira tubtob hini nga adlaw.
Mga footnote
^ O “ginpasiparahan.”
^ O “nakapalibot.”
^ Karuyag sidngon, hi Jeroboam II.
^ Lit., “ngan nagtataod han higot han bawog.”
^ O “mga kalag nga tawo.”
