Ezra 1:1-11
1 Ha siyahan nga tuig ni Hadi Ciro+ han Persia, basi matuman an pulong ni Jehova nga iginyakan pinaagi kan Jeremias,+ ginpagios ni Jehova an espiritu ni Hadi Ciro han Persia nga magpasamwak hin mensahe ha bug-os niya nga ginhadian, nga iya liwat iginsurat,+ nga nasiring:
2 “Ini an siring ni Hadi Ciro han Persia, ‘Iginhatag ha akon ni Jehova nga Dios han langit an ngatanan nga ginhadian ha tuna,+ ngan iya ako ginsugo nga magtukod hin balay para ha iya ha Jerusalem,+ nga nahimumutang ha Juda.
3 An bisan hin-o ha iyo nga bahin han iya katawohan, hinaot an iya Dios umupod ha iya, ngan pasagkaha hiya ngadto ha Jerusalem, nga nahimumutang ha Juda, ngan ipatukod utro ha iya an balay ni Jehova nga Dios han Israel—hiya an tinuod nga Dios—nga an balay nakadto ha Jerusalem.*
4 An bisan hin-o nga naukoy sugad nga dayo,+ hain man hiya, pabuliga ha iya an iya mga amyaw* pinaagi ha paghatag nira ha iya hin silber ngan bulawan, mga panag-iya ngan inataman nga mga hayop, upod an boluntaryo nga halad para ha balay han tinuod nga Dios,+ nga nakadto ha Jerusalem.’”
5 Katapos, an mga ulo han mga panimalay* han Juda ngan han Benjamin ngan an mga saserdote ngan an mga Levita—an ngatanan nga an espiritu ginpagios han tinuod nga Dios—nangandam ha pagsagka ngan pagtukod utro han balay ni Jehova, nga nakadto ha Jerusalem.
6 An ngatanan ha palibot nira nagsuporta ha ira pinaagi ha paghatag ha ira hin* mga garamiton nga silber ngan bulawan, mga panag-iya, inataman nga mga hayop, ngan birilhon nga mga butang, labot pa han ngatanan nga boluntaryo nga halad.
7 Igin-gawas liwat ni Hadi Ciro an mga garamiton ha balay ni Jehova nga ginkuha ni Nabucodonosor tikang ha Jerusalem ngan ginbutang ha balay han iya dios.+
8 Igin-gawas ito ni Hadi Ciro han Persia ilarom han pagdumara ni Mitredat nga paratipig hin bahandi, nga nag-imbentaryo hito para kan Sesbazar*+ nga lider han Juda.
9 Yana ini an imbentaryo: 30 nga surudlan nga bulawan nga basket an kurti, 1,000 nga surudlan nga silber nga basket an kurti, 29 nga kasaliwan nga surudlan,
10 30 nga gudti nga yahong* nga bulawan, 410 nga gudti nga yahong nga silber, 1,000 nga iba pa nga garamiton.
11 An ngatanan nga garamiton nga bulawan ngan silber inabot hin 5,400. Ini ngatanan gindara ni Sesbazar han an mga distyero+ igin-gawas tikang ha Babilonya ngadto ha Jerusalem.
Mga footnote
^ O posible nga “nga aadto ha Jerusalem.”
^ Lit., “an kalalakin-an ha iya lugar.”
^ Lit., “nagparig-on han ira mga kamot pinaagi hin.”
^ Ha iba nga lugar, “makaong; uhataw.”
