Ezra 3:1-13
3 Han inabot an ikapito ka bulan+ ngan an mga Israelita* nakadto na ha ira mga syudad, nagtirirok hira nga urosa ha Jerusalem.
2 Hi Jesua+ nga anak nga lalaki ni Jehozadak ngan an iya mga igkasi-saserdote ngan hi Zerubabel+ nga anak nga lalaki ni Sealtiel+ ngan an iya mga bugto nga lalaki binuhát ngan naghimo han halaran han Dios han Israel, basi makaghalad hira dida hito hin mga halad nga sinunog, sugad han nahisurat ha Balaud ni Moises+ nga surugoon han tinuod nga Dios.
3 Salit gintindog nira an halaran ha hinmumutangan hito hadto, bisan kon nahahadlok hira ha mga katawohan ha nakapalibot nga katunaan,+ ngan nagtikang hira paghatag kan Jehova hin mga halad nga sinunog dida hito, an mga halad nga sinunog ha aga ngan ha pagsirom.+
4 Katapos, ginselebrar nira an Piyesta han mga Payag* uyon ha nahisurat,+ ngan kada adlaw iginhahalad nira an espisipiko nga kadamu han mga halad nga sinunog nga ginkikinahanglan kada adlaw.+
5 Katapos, iginhatag nira an regular nga halad nga sinunog+ ngan an mga halad durante han mga dulom+ ngan an mga halad durante han ngatanan nga ginbaraan nga panahon han piyesta+ ni Jehova, pati na adton tikang ha ngatanan nga kinaburut-on nga naghalad hin boluntaryo nga halad+ kan Jehova.
6 Tikang ha siyahan nga adlaw han ikapito ka bulan+ nagtikang hira paghatag kan Jehova hin mga halad nga sinunog, bisan kon an pundasyon han templo ni Jehova waray pa maipahamutang.
7 Naghatag hira hin kwarta ha mga paratabas hin bato+ ngan ha mga eksperto nga parahimo,+ ngan hin pagkaon ngan irimnon ngan lana ha mga taga-Sidon ngan ha mga taga-Tiro tungod han pagdara hin mga kahoy nga sedro nga iginpaagi ha dagat tikang ha Lebanon ngadto ha Jope,+ uyon ha awtorisasyon nga iginhatag ha ira ni Hadi Ciro han Persia.+
8 Ha ikaduha ka tuig tikang han pag-abot nira ha balay han tinuod nga Dios ha Jerusalem, ha ikaduha ka bulan, nagtikang pagtrabaho hi Zerubabel nga anak ni Sealtiel, hi Jesua nga anak ni Jehozadak ngan an iba pa nira nga kabugtoan nga lalaki, an mga saserdote ngan an mga Levita, ngan an ngatanan nga inabot ha Jerusalem tikang ha pagkabihag;+ gintokahan nira an mga Levita nga 20 anyos tipaigbaw basi magdumara han buruhaton ha balay ni Jehova.
9 Salit hi Jesua, an iya mga anak nga lalaki ngan an iya kabugtoan nga lalaki, ngan hi Kadmiel ngan an iya mga anak nga lalaki, nga mga anak ni Juda, urosa nga nagdumara ha mga nagtatrabaho ha buruhaton ha balay han tinuod nga Dios, upod an mga anak nga lalaki ni Henadad,+ an ira mga anak nga lalaki ngan an ira kabugtoan nga lalaki, nga mga Levita.
10 Han iginpahamutang han mga magturukod an pundasyon han templo ni Jehova,+ an mga saserdote nga nakasul-ot hin opisyal nga bado, dara an mga trumpeta,+ ngan an mga Levita, nga mga anak nga lalaki ni Asap, dara an mga simbal, nanindog basi dayawon hi Jehova uyon ha sugo ni Hadi David han Israel.+
11 Ngan nagtikang hira pagbaton-batonay hin kanta+ pinaagi han pagdayaw ngan pagpasalamat kan Jehova, “kay hiya maopay; an iya maunungon nga gugma ha Israel nagpapabilin ha kadayonan.”+ Katapos, an ngatanan nga katawohan nan-gugliat hin makusog nga guliat han pagdayaw kan Jehova kay an pundasyon han balay ni Jehova naipahamutang na.
12 Damu han mga saserdote, han mga Levita, ngan han mga ulo han mga panimalay*—an lagas nga kalalakin-an nga nakakita han balay hadto+—an nanangis hin makusog han ira nakita nga iginpapahamutang an pundasyon hini nga balay, samtang damu han iba pa an nan-gugugliat hin malipayon ha pinakamakusog nira nga tingog.+
13 Salit an katawohan diri na nakilala han kaibahan han aringasa han malipayon nga pan-gugliat ngan han aringasa han pagtangis, kay makusog gud an pan-gugliat han katawohan salit an aringasa nababatian tubtob ha hirayo nga distansya.
