Genesis 33:1-20
33 Yana siniplat hi Jacob ngan iya nakita nga tiabot hi Esau, ngan may kaupod hiya nga 400 nga lalaki.+ Salit ginbahin-bahin ni Jacob an kabataan ngadto kanda Leah, Raquel, ngan ha duha nga surugoon nga babaye.+
2 Iya iginpwesto ha prente an mga surugoon nga babaye ngan an ira mga anak,+ sunod ha ira hi Leah ngan an iya mga anak,+ ngan ha ira luyo hira Raquel+ ngan Jose.
3 Katapos, nag-una hiya ha ira ngan yinukbo ha tuna hin pito ka beses samtang nadaop hiya ha iya bugto.
4 Pero hi Esau dinalagan basi tapoon hiya, ngan iya ginhangkopan hiya ngan ginharokan hiya, ngan nagtinangis hira.
5 Han siniplat hiya ngan nakita an mga babaye ngan an kabataan, hiya nagsiring: “Hin-o ini nga imo mga kaupod?” binaton hiya: “An kabataan nga iginhatag han Dios ha imo surugoon.”+
6 Katapos, hinirani an mga surugoon nga babaye pati an ira mga anak ngan nanyukbo,
7 ngan hinirani liwat hi Leah pati an iya mga anak, ngan nanyukbo hira. Katapos, hinirani hira Jose ngan Raquel, ngan nanyukbo hira.+
8 Hi Esau nagsiring: “Kay ano nga nagpadara ka hini ngatanan nga grupo han mga biyahero nga akon iginkatapo?”+ Hiya binaton: “Basi pakitaan ako hin pag-uyon han akon ginoo.”+
9 Katapos, hi Esau nagsiring: “Damu hinduro an akon panag-iya, bugto ko.+ Tipigi na la kon ano an imo.”
10 Pero hi Jacob nagsiring: “Alayon, ayaw pagbaribad. Kon nakakarawat ako han imo pag-uyon, kakarawaton mo an akon regalo, kay gindara ko ito basi makita ko an imo nawong. Ngan nakita ko an imo nawong nga sugad hin nakita ko an nawong han Dios, kay malipayon nga imo ako ginkarawat.+
11 Alayon karawata an regalo* nga akon gindara ha imo,+ kay ginpakitaan ako han Dios hin pag-uyon ngan may-ada ako han ngatanan nga akon ginkikinahanglan.”+ Ngan padayon nga iya ginkombinse hiya, salit iya ito ginkarawat.
12 Ha urhi hi Esau nagsiring: “Lakat na kita ngan padayon nga magbiyahe, ngan tuguti nga ako an mag-una ha imo.”
13 Pero hiya nagsiring ha iya: “An akon ginoo maaram nga an kabataan gudti pa+ ngan may-ada ako gin-aataman nga mga karnero ngan mga baka nga nagpapasuso han mga nati hito. Kon paaapurahon hira pagbiyahe hin usa ka adlaw, an bug-os nga panon magkakamatay.
14 Alayon mag-una na la an akon ginoo ha iya surugoon, pero ako padayon nga magbibiyahe hin mahurohinay depende ha kalaksihon han akon mga hayop ngan han kabataan tubtob nga makaabot ako ha akon ginoo didto ha Seir.”+
15 Katapos, hi Esau nagsiring: “Alayon, tuguti ako nga ipaupod ha imo an pipira han akon mga tawo.” Binaton hiya: “Kay ano nga bubuhaton mo ito? Igo na para ha akon nga makarawat ko an pag-uyon han akon ginoo.”
16 Salit hito nga adlaw hi Esau nagbiyahe tipabalik ngadto ha Seir.
17 Ngan hi Jacob nagbiyahe ngadto ha Sucot,+ ngan nagtukod hiya hin kalugaringon nga balay ngan naghimo hiya hin mga sirongan para ha iya panon. Ito an hinungdan nga ginngaranan niya an lugar hin Sucot.*
18 Katapos magbiyahe tikang ha Padan-aram,+ hi Jacob talwas nga inabot ha syudad han Sikem+ ha tuna han Canaan,+ ngan nagkampo hiya hirani ha syudad.
19 Ngan nakapalit hiya hin usa ka bahin han tuna nga iya gintindogan han iya tolda tikang ha mga anak nga lalaki ni Hamor nga tatay ni Sikem, nga nagkantidad hin 100 ka bug-os nga kwarta.+
20 Nagtindog hiya didto hin halaran ngan gintawag ito nga Dios, an Dios ni Israel.+
