Jeremias 23:1-40
23 “Kairo han mga paraataman hin panon nga nagbubungkag ngan nagpapahinabo nga magpatsarang an mga karnero han akon panabsaban!” nasiring hi Jehova.+
2 Salit ini an siring ni Jehova nga Dios han Israel kontra ha mga paraataman hin panon nga nag-aataman han akon katawohan: “Iyo iginsarang an akon mga karnero; padayon niyo hira nga iginpatlaag, ngan waray niyo hira atamana.”+
“Salit sisirotan ko kamo tungod han iyo magraot nga mga binuhatan,” nasiring hi Jehova.
3 “Katapos, titirukon ko an nanhibilin han akon mga karnero tikang ha ngatanan nga katunaan diin ko hira iginpatlaag,+ ngan ibabalik ko hira ha ira panabsaban,+ ngan manganganak hira ngan magdadamu.+
4 Ngan maghahatag ako ha ira hin mga paraataman hin panon nga mag-aataman gud ha ira.+ Diri na hira mahahadlok o malilisang, ngan waray bisan usa nga mawawara,” nasiring hi Jehova.
5 “Kitaa! Maabot an mga adlaw,” nasiring hi Jehova, “nga magbabangon ako hin matadong nga saha* tikang ha tulin ni David.+ Ngan usa nga hadi an magmamando+ ngan magpapakita hin hilarom nga pagsabot ngan magpapadapat hin hustisya ngan katadongan ha tuna.+
6 Ha iya mga adlaw an Juda matatalwas,+ ngan an Israel maukoy nga may seguridad.+ Ngan ini an ngaran nga itatawag ha iya: Hi Jehova an Aton Katadongan.”+
7 “Kondi maabot an mga adlaw,” nasiring hi Jehova, “nga diri na hira masiring, ‘Sugad nga buhi hi Jehova, nga naggawas han katawohan han Israel tikang ha tuna han Ehipto!’+
8 kondi lugod, ‘Sugad nga buhi hi Jehova, nga naggawas ngan nagbalik han katulinan han panimalay ni Israel tikang ha tuna ha norte ngan tikang ha ngatanan nga katunaan diin ko hira iginpatlaag,’ ngan maukoy hira ha ira kalugaringon nga tuna.”+
9 Mahitungod han mga propeta:
An akon kasingkasing nasusubo gud.
An ngatanan ko nga tul-an nangungurog.
Pariho ako hin tawo nga hubogNgan pariho hin tawo nga nasobrahan hin bino,Tungod kan Jehova ngan tungod han iya baraan nga mga pulong.
10 Kay an tuna puno hin mga nag-aadulteryo;+Tungod han sumpa an tuna nabibido+Ngan an mga panabsaban ha kamingawan nauga.+
Maraot an ira pagkinabuhi, ngan gin-aabuso nira an ira gahum.
11 “An propeta ngan an saserdote pariho mahugaw.*+
Bisan ha akon mismo balay nakita ko an ira karaotan,”+ nasiring hi Jehova.
12 “Salit an ira aragian magigin madalunot ngan masirom;+Iduduso hira ngan matutumba.
Kay magpapadapat ako ha ira hin kabungkaganHa tuig han pagsirot ha ira,” nasiring hi Jehova.
13 “Ngan ha mga propeta han Samaria+ nakita ko an mangil-ad nga mga butang.
Nananagna hira ha ngaran ni Baal,Ngan ira iginsisimang an Israel nga akon katawohan.
14 Ngan ha mga propeta han Jerusalem nakita ko an makangingirhat nga mga butang.
Nag-aadulteryo+ hira ngan naglalakat ha kabuwaan;+Ira gin-aaghat an* mga magburuhat hin maraot,Ngan diri hira nabaya ha ira karaotan.
Para ha akon hira ngatanan pariho han Sodoma,+Ngan an mga naukoy ha iya pariho han Gomorra.”+
15 Salit ini an siring ni Jehova han mga hugpo kontra ha mga propeta:
“Kitaa, pakakaunon ko hira hin mapait nga tanomNgan paiinumon hira hin tubig nga may hilo.+
Kay tungod han mga propeta han Jerusalem nagin kalyap an apostasya ha bug-os nga tuna.”
16 Ini an siring ni Jehova han mga hugpo:
“Ayaw kamo pamati ha mga pulong han mga propeta nga nananagna ha iyo.+
Ginlilimbongan nira kamo.*
An bisyon nga ira ginyayakan tikang ha ira kalugaringon nga kasingkasing,+Diri tikang ha baba ni Jehova.+
17 Pauroutro hira nga nasiring ha mga diri narespeto ha akon,‘Hi Jehova nagsiring: “Magkakaada kamo kamurayawan.”’+
Ngan ha kada tagsa nga nasunod ha iya mismo matig-a nga kasingkasing nasiring hira,‘Waray kadaot nga maabot ha iyo.’+
18 Kay hin-o an tinindog upod han mga tawo nga duok kan JehovaBasi makita ngan mabatian an iya pulong?
Hin-o an naghatag hin atensyon ha iya pulong basi mabatian ito?
19 Kitaa! An bagyo tikang kan Jehova tigda nga magawas nga may kapungot;Pariho hin buhawi magbibirik-birik ito ha ulo han magraot.+
20 An kasina ni Jehova diri mawawaraTubtob nga diri pa niya mabuhat ngan matuman an karuyag han iya kasingkasing.
Ha ultimo nga bahin han mga adlaw masasabtan niyo ini hin matin-aw.
21 Waray ko ipadara an mga propeta, pero dinalagan hira.
Waray ako makiistorya ha ira, pero nanagna hira.+
22 Pero kon tinindog la unta hira upod han mga tawo nga duok ha akon,Naipabati unta nira ha akon katawohan an akon mga pulongNgan napabaya unta nira hira tikang ha ira maraot nga panggawi ngan ha ira magraot nga mga binuhatan.”+
23 “Ako ba usa la nga Dios ha hirani,” nasiring hi Jehova, “ngan diri liwat usa nga Dios ha hirayo?”
24 “May-ada ba tawo nga makakatago ha tago nga lugar diin diri ko hiya makikita?”+ nasiring hi Jehova.
“Diri ba napupuno ko an kalangitan ngan an tuna?”+ nasiring hi Jehova.
25 “Nabatian ko an mga propeta nga nananagna hin mga buwa ha akon ngaran nga nasiring, ‘May inop ako! May inop ako!’+
26 Tubtob san-o ini magpapadayon ha kasingkasing han mga propeta, an panagna hin mga buwa? Mga propeta hira nga nagyayakan hin limbong tikang ha ira mismo kasingkasing.+
27 Karuyag nira nga mahingalimtan han akon katawohan an akon ngaran pinaagi han mga inop nga ira iginsusumat ha usa kag usa, sugad la nga nahingalimtan han ira mga amay an akon ngaran tungod kan Baal.+
28 An propeta nga may inop magsumat han iya inop, kondi an tawo nga aada ha iya an akon pulong sadang magyakan hito ha kamatuoran.”
“Ano an kaparihoan han uhot ngan han lugas?” nasiring hi Jehova.
29 “Diri ba an akon pulong pariho hin kalayo,”+ nasiring hi Jehova, “ngan pariho hin maso nga nagdudugmok han daku nga bato?”+
30 “Salit kitaa, nakontra ako ha mga propeta,” nasiring hi Jehova, “nga nangangawat han akon mga pulong tikang ha usa kag usa.”+
31 “Kitaa, nakontra ako ha mga propeta,” nasiring hi Jehova, “adton nagamit han ira dila ha pagsiring, ‘Nasiring hiya!’”+
32 “Kitaa, nakontra ako ha mga propeta han buwa nga mga inop,” nasiring hi Jehova, “nga nagsusumat hito ngan nagsisimang han akon katawohan tungod han ira mga buwa ngan han ira panhambog.”+
“Kondi waray ko hira ipadara o sugoa. Salit diri gud makakapahimulos ha ira ini nga katawohan,”+ nasiring hi Jehova.
33 “Ngan kon ini nga katawohan o an usa nga propeta o an usa nga saserdote magpakiana ha imo, ‘Ano an nakakapabug-at kan* Jehova?’ sadang ka bumaton ha ira, ‘“Kamo an nakakapabug-at! Ngan isasalikway ko kamo,”+ nasiring hi Jehova.’
34 Mahitungod ha propeta o ha saserdote o ha katawohan nga nasiring, ‘Ini an nakakapabug-at kan* Jehova!’ sisirotan ko ito nga tawo ngan an iya panimalay.
35 Ini an ginsisiring han tagsa ha iyo ha iya igkasi-tawo ngan ha iya bugto, ‘Ano an iginbaton ni Jehova? Ngan ano an iginyakan ni Jehova?’
36 Kondi an nakakapabug-at kan* Jehova diri na niyo sadang unabihon pa, kay an nakakapabug-at* amo an kalugaringon nga pulong han kada tagsa, ngan iyo ginbag-o an mga pulong han buhi nga Dios, hi Jehova han mga hugpo, nga aton Dios.
37 “Ini an imo isisiring ha propeta, ‘Ano an iginbaton ni Jehova ha imo? Ngan ano an iginyakan ni Jehova?
38 Ngan kon padayon kamo nga magsiring, “An nakakapabug-at kan* Jehova!” ini an siring ni Jehova: “Tungod han iyo pagsiring, ‘Ini nga pulong an nakakapabug-at kan* Jehova,’ bisan kon ginsidngan ko na kamo, ‘Ayaw kamo pagsiring: “An nakakapabug-at kan* Jehova!”’
39 kitaa! Aalsahon ko kamo ngan ilalabog tikang ha akon atubangan, kamo ngan an syudad nga akon iginhatag ha iyo ngan ha iyo mga kaapoy-apoyan.
40 Ngan magdadara ako ha iyo hin waray kataposan nga kaarawdan ngan waray kataposan nga kaalohan, nga diri hingangalimtan.”’”+
Mga footnote
^ O “manurunod.”
^ O “mga apostata.”
^ Lit., “ginpaparig-on an mga kamot han.”
^ O “Ginpupuno nira kamo hin waray pulos nga mga paglaom.”
^ O “mabug-at nga mensahe ni.” An Hebreo nga pulong may duha nga kahulogan: “mabug-at nga kapahayagan han Dios” o “butang nga nakakapabug-at.”
^ O “mabug-at nga mensahe ni.”
^ O “mabug-at nga mensahe ni.”
^ O “mabug-at nga mensahe.”
^ O “mabug-at nga mensahe ni.”
^ O “mabug-at nga mensahe ni.”
^ O “mabug-at nga mensahe ni.”
