Josue 1:1-18
1 Katapos mamatay hi Moises nga surugoon ni Jehova, nagsiring hi Jehova kan Josue*+ nga anak ni Nun, an kabulig+ ni Moises:
2 “Hi Moises nga akon surugoon patay na.+ Yana buhát, tabok ha Jordan, ikaw ngan ini ngatanan nga katawohan, ngan sulod ha tuna nga iginhahatag ko ha ira, ha katawohan han Israel.+
3 Ihahatag ko ha iyo an tagsa nga lugar nga iyo tatamakan, sugad han akon iginsaad kan Moises.+
4 An iyo teritoryo magtitikang ha kamingawan tubtob ha Lebanon ngan ngadto ha daku nga salog, an Eufrates—an bug-os nga tuna han mga Hiteo+—ngan ngadto ha Daku nga Dagat* ha weste.*+
5 Waray makakapirde ha imo samtang buhi ka.+ Sugad la nga inupod ako kan Moises, maupod liwat ako ha imo.+ Diri ko ikaw papabay-an, diri ko liwat ikaw babayaan.+
6 Magin maisugon ka ngan marig-on,+ kay ikaw an mangunguna hini nga katawohan basi mapanunod nira an tuna nga akon iginpanumpa ha ira mga kaapoy-apoyan nga ihahatag ko ha ira.+
7 “Magin maisugon ka la ngan marig-on gud, ngan sunda hin maopay an bug-os nga Balaud nga iginsugo ha imo ni Moises nga akon surugoon. Ayaw pagsimang tikang hito ha too man o ha wala,+ basi makagios ka nga maaramon diin ka man kumadto.+
8 Ini nga libro han Balaud diri sadang mawara tikang ha imo baba,+ ngan kinahanglan basahon mo ini ha mahinay nga tingog* ha adlaw ngan gab-i, basi masunod mo hin maopay an ngatanan nga iginsurat dinhi;+ kay hito nga paagi magigin malampuson ka ngan hito nga paagi magios ka nga maaramon.+
9 Diri ba ginsugo ko ikaw? Magin maisugon ka ngan marig-on. Ayaw kalisang o kahadlok, kay hi Jehova nga imo Dios kaupod mo diin ka man kumadto.”+
10 Katapos, ginsugo ni Josue an mga opisyal han katawohan:
11 “Libota an bug-os nga kampo ngan isumat ha katawohan ini nga sugo, ‘Pag-andam kamo hin mga suplay han pagkaon, kay tulo ka adlaw na la matabok kamo ha Jordan basi sumulod ngan pagtag-iyahon an tuna nga iginhahatag ha iyo ni Jehova nga iyo Dios basi pagtag-iyahon.’”+
12 Ngan ha mga Rubenita, ha mga Gadita, ngan ha katunga han tribo ni Manases, hi Josue nagsiring:
13 “Hinumdumi an iginsugo ha iyo ni Moises nga surugoon ni Jehova:+ ‘Hi Jehova nga iyo Dios naghahatag ha iyo hin kapahuwayan ngan naghatag ha iyo hini nga tuna.
14 An iyo mga asawa, an iyo mga anak, ngan an iyo mga hayop maukoy* ha tuna nga iginhatag ha iyo ni Moises dinhi ha tabok* han Jordan,+ kondi kamo ngatanan nga magkusog nga girriro+ kinahanglan tumabok nga nakaorganisar ha pakiggirra nga nag-uuna ha iyo kabugtoan.+ Kinahanglan buligan niyo hira
15 tubtob nga ihatag ni Jehova ha iyo kabugtoan an kapahuwayan, sugad la nga iginhatag niya ito ha iyo, ngan pagtag-iyahon liwat nira an tuna nga iginhahatag ha ira ni Jehova nga iyo Dios. Katapos, balik kamo ha tuna nga iginhatag ha iyo basi ukyan ngan pagtag-iyaha ito, an tuna ha este han Jordan nga iginhatag ha iyo ni Moises nga surugoon ni Jehova.’”+
16 Hira binaton kan Josue: “Bubuhaton namon an ngatanan nga imo iginsugo, ngan makadto kami diin mo man kami pakadtoon.+
17 Sugad la nga namati kami ha ngatanan nga ginsiring ni Moises, mamamati liwat kami ha imo. Hinaot unta nga umupod ha imo hi Jehova nga imo Dios sugad la nga inupod hiya kan Moises.+
18 Papatayon an bisan hin-o nga magrirebelde ha imo sugo ngan diri masunod ha tagsa nga imo isusugo ha iya.+ Magin maisugon ka la ngan marig-on.”+
Mga footnote
^ O “Jehosua,” nangangahulogan nga “Hi Jehova an Katalwasan.”
^ Karuyag sidngon, an Mediteraneo.
^ O “ha gintutunoran han adlaw.”
^ O “pamalandungon mo ini.”
^ Karuyag sidngon, an este.
^ Ha iba nga lugar, “maistar.”
