Josue 13:1-33
13 Hi Josue lagas na ngan hilawig na an pangidaron.+ Salit hi Jehova nagsiring ha iya: “Lagas ka na ngan hilawig na an imo pangidaron; kondi daku pa nga bahin han tuna an kinahanglan pagtag-iyahon.*
2 Ini an nabibilin pa nga tuna:+ an ngatanan nga lugar han mga Filisteo ngan han ngatanan nga Gesurita+
3 (tikang ha sanga han Nilo* ha este han* Ehipto tubtob ha giutan han Ekron ha norte, nga hadto gintatagad nga teritoryo han mga Canaanita)+ pati na an mga lugar han lima nga magmarando han mga Filisteo+—han mga Gazita, mga Asdodita,+ mga Askelonita,+ mga Giteo,+ ngan mga Ekronita;+ an lugar han mga Avim+
4 ha sur; an bug-os nga tuna han mga Canaanita; an Meara, nga gintatag-iya han mga taga-Sidon,+ tubtob ha Afek, ngadto ha giutan han mga Amorita;
5 an tuna han mga Gebalita+ ngan an bug-os nga este nga bahin han Lebanon, tikang ha Baal-gad ha ubos han Bukid Hermon tubtob ha Lebo-hamat;*+
6 an ngatanan nga umurukoy ha kabukiran tikang ha Lebanon+ tubtob ha Misrefot-maim;+ ngan an ngatanan nga taga-Sidon.+ Paiiwason ko hira ha atubangan han mga Israelita.+ Kinahanglan mo la ito ihatag ha Israel sugad nga panurundon, sugad han akon iginsugo ha imo.+
7 Yana kinahanglan bahin-bahinon mo ini nga tuna sugad nga panurundon ha siyam nga tribo ngan ha katunga han tribo ni Manases.”+
8 Upod an katunga pa nga tribo, an mga Rubenita ngan an mga Gadita nagkuha han ira panurundon nga iginhatag ha ira ni Moises ha este han Jordan, sugad han iginhatag ha ira ni Moises nga surugoon ni Jehova:+
9 tikang ha Aroer,+ nga nahimumutang ha ligid han Walog* han Arnon,+ pati na an syudad nga aada ha butnga han walog, ngan pati na an bug-os nga hitaas nga kapatagan han Medeba tubtob ha Dibon;
10 ngan an ngatanan nga syudad ni Hadi Sihon han mga Amorita, nga naghadi ha Hesbon, tubtob ha giutan han mga Ammonita;+
11 pati na an Gilead ngan an teritoryo han mga Gesurita ngan han mga Maacatita+ ngan an bug-os nga Bukid Hermon ngan an bug-os nga Basan+ tubtob ha Saleca;+
12 an bug-os nga ginhadian ni Og ha Basan, nga naghadi ha Astarot ngan Edrei. (Usa hiya han ultimo nga nahisalin han mga Refaim.)+ Ginpirde hira ni Moises ngan ginpaiwas hira.+
13 Pero waray paiwasa han mga Israelita+ an mga Gesurita ngan an mga Maacatita, kay tubtob hini nga adlaw an katawohan han Gesur ngan Maacat naukoy ha butnga han Israel.
14 An tribo la han mga Levita an waray niya tagi hin panurundon.+ An mga halad nga ginsunog ha kalayo para kan Jehova nga Dios han Israel amo an ira panurundon,+ sugad han iya iginsaad ha ira.+
15 Katapos, hi Moises naghatag hin panurundon ha tribo han mga Rubenita uyon ha ira mga pamilya,
16 ngan an ira teritoryo tikang ha Aroer, nga nahimumutang ha ligid han Walog* han Arnon, pati na an syudad ha butnga han walog, ngan pati na an bug-os nga hitaas nga kapatagan ha sapit han Medeba;
17 an Hesbon ngan an ngatanan nga bungto hito+ ha hitaas nga kapatagan, an Dibon, an Bamot-baal, an Bet-baal-meon,+
18 an Jahaz,+ an Kedemot,+ an Mefaat,+
19 an Kiriataim, an Sibma,+ ngan an Zeret-sahar ha bukid ha ligid han walog,*
20 an Bet-peor, an mga bakilid han Pisga,+ an Bet-jesimot,+
21 an ngatanan nga syudad ha hitaas nga kapatagan, ngan an bug-os nga ginhadian ni Hadi Sihon han mga Amorita, nga naghadi ha Hesbon.+ Ginpirde hiya ni Moises+ ngan pati na an Midianita nga mga lider nga hira Evi, Rekem, Zur, Hur, ngan Reba,+ nga mga basalyo* ni Sihon nga naukoy hito nga tuna.
22 An parapanigo+ nga hi Balaam+ nga anak nga lalaki ni Beor ginpatay han mga Israelita pinaagi han espada, upod han iba pa nga ginpamatay.
23 An tubtoban han mga Rubenita amo an Jordan; ngan ini nga teritoryo amo an panurundon han mga Rubenita uyon ha ira mga pamilya, pati na an mga syudad ngan an mga baryo hito.
24 Dugang pa, hi Moises naghatag hin panurundon ha tribo ni Gad, an mga Gadita uyon ha ira mga pamilya,
25 ngan upod ha ira teritoryo an Jazer+ ngan an ngatanan nga syudad han Gilead ngan an katunga han tuna han mga Ammonita+ tubtob ha Aroer, nga naatubang ha Raba;+
26 ngan tikang ha Hesbon+ tubtob ha Ramat-mizpe ngan Betonim, ngan tikang ha Mahanaim+ tubtob ha giutan han Debir;
27 ngan ha walog,* an Bet-haram, Bet-nimra,+ Sucot,+ ngan Zapon, nga amo an iba pa nga mga bahin han ginhadian ni Hadi Sihon han Hesbon,+ nga an tubtoban amo an Jordan tikang ha sur nga kataposan han Dagat han Kineret*+ ha este han Jordan.
28 Ini an panurundon han mga Gadita uyon ha ira mga pamilya, pati na an mga syudad ngan an mga baryo hito.
29 Dugang pa, hi Moises naghatag hin panurundon ha katunga han tribo ni Manases, ha katunga han tribo ni Manases uyon ha ira mga pamilya.+
30 Ngan an ira teritoryo tikang ha Mahanaim+ ngan an bug-os nga Basan, an bug-os nga ginhadian ni Hadi Og han Basan, ngan an ngatanan nga baryo nga tolda ni Jair+ ha Basan, 60 nga bungto.
31 Ngan an katunga han Gilead, ngan an Astarot ngan Edrei,+ nga mga syudad han ginhadian ni Og ha Basan, nahingadto ha mga anak nga lalaki ni Makir+ nga anak nga lalaki ni Manases, ha katunga han mga anak nga lalaki ni Makir uyon ha ira mga pamilya.
32 Ini an mga panurundon nga iginhatag ha ira ni Moises ha disyerto nga kapatagan han Moab ha tabok han Jordan, ha este han Jerico.+
33 Kondi waray tagi ni Moises hin panurundon an tribo han mga Levita.+ Hi Jehova nga Dios han Israel amo an ira panurundon, sugad han iya iginsaad ha ira.+
Mga footnote
^ O “sakupon.”
^ Lit., “ha atubangan han.”
^ O “tikang ha Sihor.”
^ O “ha pagsulod ha Hamat.”
^ O “hamubo nga kapatagan.”
^ Karuyag sidngon, mga hadi nga sakop ni Sihon.
^ Karuyag sidngon, an linaw han Genesaret, o an Dagat han Galilea.
^ O “hamubo nga kapatagan.”
