Josue 9:1-27
9 Han nabatian han ngatanan nga hadi ha weste han Jordan+ an nahitabo, an mga nakadto ha kabukiran, ha Sefela, ha bug-os nga baybayon han Daku nga Dagat,*+ ngan ha atubangan han Lebanon—an mga Hiteo, an mga Amorita, an mga Canaanita, an mga Perizita, an mga Hivita, ngan an mga Jebusita+—
2 nagporma hira hin alyansa basi makiggirra kan Josue ngan ha Israel.+
3 An mga umurukoy han Gibeon+ nakabati liwat mahitungod han ginbuhat ni Josue ha Jerico+ ngan Ai.+
4 Salit ginios hira nga maaramon ngan nagbutang hin mga pagkaon ha daan nga mga sako ngan iginkarga ito ha ira mga asno, pati na hin daan nga anit nga mga surudlan hin bino nga burit na ngan tinangkopan;
5 nagsul-ot liwat hira hin pudpod na ngan tinangkopan nga mga sandalyas ngan hin daan nga mga bado. An ngatanan nga tinapay nga ira balon mamara ngan rumok.
6 Katapos, kinadto hira kan Josue ha kampo ha Gilgal+ ngan nagsiring ha iya ngan ha kalalakin-an han Israel: “Tikang kami ha hirayo nga tuna. Salit alayon paghimo hin kasabotan ha amon.”
7 Kondi an kalalakin-an han Israel nagsiring ha mga Hivita:+ “Bangin naukoy kamo hirani ha amon. Salit kay ano nga maghihimo kami hin kasabotan ha iyo?”+
8 Binaton hira kan Josue: “Imo kami mga surugoon.”*
Katapos hi Josue nagsiring ha ira: “Hin-o kamo, ngan diin kamo tikang?”
9 Nagsiring hira ha iya: “An imo mga surugoon kinanhi tikang ha hirayo gud nga tuna+ tungod han pagtahod ha ngaran ni Jehova nga imo Dios, kay nakabati kami mahitungod han iya kabantogan ngan mahitungod han ngatanan niya nga ginbuhat ha Ehipto+
10 ngan mahitungod han ngatanan niya nga ginbuhat ha duha nga hadi han mga Amorita nga nakadto ha tabok* han Jordan, hi Hadi Sihon+ han Hesbon ngan hi Hadi Og+ han Basan, nga nakadto ha Astarot.
11 Salit an amon mga tigurang ngan an ngatanan nga umurukoy ha amon tuna nagsiring ha amon, ‘Pagbalon kamo hin pagkaon para ha pagbiyahe ngan pakigkita kamo ha ira. Siring kamo ha ira: “Magigin mga surugoon niyo kami;+ salit alayon paghimo hin kasabotan ha amon.”’+
12 Ini nga tinapay nga amon ginbalon mapaso pa han adlaw nga binaya kami ha amon mga balay basi kumanhi ha iyo. Yana makikita niyo nga mamara ini ngan rumok.+
13 Ngan ini nga anit nga mga surudlan hin bino bag-o pa han ginsudlan namon ini, pero yana burit na.+ Ngan an amon mga bado nagkadadaan na ngan an amon mga sandalyas napudpod na tungod han kahirayo han amon ginbiyahe.”
14 Tungod hito ginkuha* han kalalakin-an an iba han ira mga balon, kondi waray hira magkonsulta kan Jehova.+
15 Salit hi Josue nakigmurayaw ha ira+ ngan naghimo hin kasabotan ha ira nga pabay-an hira nga mabuhi, ngan ito an iginpanumpa ha ira han mga lider han komunidad.+
16 Ha kataposan han tulo ka adlaw, katapos nira maghimo hin kasabotan ha ira, hinbatian nira nga naukoy hira ha hirani, ha palibot la nira.
17 Katapos, an mga Israelita nagbiyahe ngan inabot ha ira mga syudad han ikatulo ka adlaw; an ira mga syudad amo an Gibeon,+ Kefira, Beerot, ngan Kiriat-jearim.+
18 Kondi waray hira sulonga han mga Israelita, kay an mga lider han komunidad nanumpa ha ira ha ngaran ni Jehova+ nga Dios han Israel. Salit an bug-os nga komunidad nagtikang magngurutob ha mga lider.
19 Tungod hito an ngatanan nga lider nagsiring ha bug-os nga komunidad: “Nanumpa kami ha ira ha ngaran ni Jehova nga Dios han Israel, salit diri kita gintutugotan nga dauton hira.
20 Ini an aton bubuhaton: Papabay-an naton hira nga mabuhi, basi diri masina ha aton an Dios tungod han amon iginpanumpa ha ira.”+
21 Ngan ini pa an ginsiring han mga lider: “Pabay-i hira nga mabuhi, kondi himoa hira nga mga parakuha hin sungo ngan mga parag-alog para ha bug-os nga komunidad.” Ini an iginsaad ha ira han mga lider.
22 Katapos, gintawag hira ni Josue ngan ginsidngan: “Kay ano nga iyo kami ginlimbongan pinaagi ha pagsiring, ‘Tikang kami ha lugar nga hirayo gud ha iyo,’ nga hirani man la ngay-an kamo ha amon?+
23 Tikang yana iginsumpa na kamo,+ ngan magigin mga uripon kamo pirme sugad nga mga parakuha hin sungo ngan mga parag-alog para ha balay han akon Dios.”
24 Binaton hira kan Josue: “Tungod ito kay an imo mga surugoon marig-on nga ginsumatan nga hi Jehova nga imo Dios nagsugo kan Moises nga iya surugoon nga ihatag ha iyo an bug-os nga tuna ngan poohon an ngatanan nga umurukoy hito tikang ha iyo atubangan.+ Salit nahadlok kami para ha amon kinabuhi* tungod ha iyo,+ amo nga ginbuhat namon ini.+
25 Yana bahala ka na ha amon.* Buhata ha amon kon ano ha imo hunahuna an maopay ngan husto.”
26 Ngan ito an iya ginbuhat ha ira; iya gintalwas hira tikang ha mga kamot han mga Israelita, ngan waray nira hira pataya.
27 Kondi hito nga adlaw ginhimo hira ni Josue nga mga parakuha hin sungo ngan mga parag-alog para ha komunidad+ ngan para ha halaran ni Jehova ha lugar nga Iya pipilion,+ ngan ito pa gihapon an ira ginbubuhat tubtob hini nga adlaw.+
Mga footnote
^ Karuyag sidngon, an Mediteraneo.
^ O “mga uripon.”
^ Karuyag sidngon, an este.
^ O “gin-usisa.”
^ O “amon kalag.”
^ Lit., “aada kami ha imo kamot.”
