Sumala kan Juan 17:1-26
17 Ginyakan ni Jesus ini nga mga butang, ngan paghangad niya ha langit, nagsiring hiya: “Amay, inabot na an oras. Himayaa an imo anak basi mahimaya ka han imo anak,+
2 sugad la nga gintagan mo hiya hin awtoridad ha ngatanan nga tawo,*+ basi mahatagan niya hin kinabuhi nga waray kataposan+ an ngatanan nga imo iginhatag ha iya.+
3 Nangangahulogan ini hin kinabuhi nga waray kataposan,+ an ira padayon nga pagkilala ha imo,* an amo la nga tinuod nga Dios,+ ngan ha iya nga imo ginsugo, hi Jesu-Kristo.+
4 Ginhimaya ko ikaw ha tuna+ pinaagi ha pagtapos han buruhaton nga iginhatag mo ha akon nga buhaton.+
5 Salit yana, Amay, himayaa ako ha imo sapit sugad han akon himaya hadto han kaupod mo ako antes pa umeksister an kalibotan.+
6 “Iginpahayag* ko an imo ngaran ha mga tawo nga iginhatag mo ha akon tikang ha kalibotan.+ Imo hira, ngan iginhatag mo hira ha akon, ngan gintutuman* nira an imo pulong.
7 Yana hinbaroan na nira nga tikang ha imo an ngatanan nga butang nga iginhatag mo ha akon;
8 kay iginhatag ko ha ira an mga pulong nga imo iginhatag ha akon,+ ngan ginkarawat nira ito ngan nahibaro gud hira nga kinanhi ako sugad nga imo representante,+ ngan tinoo hira nga ginsugo mo ako.+
9 Naghahangyo ako may kalabotan ha ira; naghahangyo ako, diri may kalabotan ha kalibotan, kondi may kalabotan hadton iginhatag mo ha akon, kay imo hira;
10 ngan imo an ngatanan nga akon ngan akon an imo,+ ngan ginhihimaya ako ha butnga nira.
11 “Waray na ako ha kalibotan, pero hira aada ha kalibotan,+ ngan makada ako ha imo. Baraan nga Amay, bantayi hira+ para ha imo mismo ngaran, nga iginhatag mo ha akon, basi magin uusa* hira sugad la nga uusa* kita.+
12 Han kaupod pa nira ako, ginbabantayan ko hira+ para ha imo ngaran, nga iginhatag mo ha akon; ngan ginpanalipdan ko hira, ngan waray bisan usa ha ira nga nabungkag+ labot la han anak han kabungkagan,+ basi matuman an kasuratan.+
13 Pero yana makada ako ha imo, ngan ginsisiring ko ha kalibotan ini nga mga butang, basi bug-os nga magkaada hira han akon kalipay.+
14 Iginhatag ko ha ira an imo pulong, pero nangalas ha ira an kalibotan, kay diri hira bahin han kalibotan,+ sugad la nga diri ako bahin han kalibotan.
15 “Diri ako naghahangyo nga kuhaon mo hira ha kalibotan, kondi nga bantayan mo hira tungod han usa nga maraot.+
16 Diri hira bahin han kalibotan,+ sugad la nga diri ako bahin han kalibotan.+
17 Baraana* hira pinaagi han kamatuoran;+ an imo pulong kamatuoran.+
18 Sugad la nga ginsugo mo ako ha kalibotan, ginsugo ko liwat hira ha kalibotan.+
19 Ngan ginbabaraan ko an akon kalugaringon para ha ira, basi hira liwat mabaraan pinaagi han kamatuoran.
20 “Naghahangyo ako, diri la may kalabotan ha ira, kondi may kalabotan liwat ha mga natoo ha akon pinaagi han ira pulong,
21 basi hira ngatanan magin uusa,+ sugad la nga ikaw, Amay, kahiusa ko ngan ako kahiusa mo,+ basi hira liwat magin kahiusa naton, basi tumoo an kalibotan nga ginsugo mo ako.
22 Iginhatag ko ha ira an himaya nga iginhatag mo ha akon, basi magin uusa hira sugad la nga uusa kita.+
23 Ako kahiusa nira ngan ikaw kahiusa ko, basi mahingpit an ira pagin uusa,* basi mahibaro an kalibotan nga ginsugo mo ako ngan hinigugma mo hira sugad la nga hinigugma mo ako.
24 Amay, karuyag ko nga adton iginhatag mo ha akon makaupod ko kon hain ako,+ basi makita nira an akon himaya nga iginhatag mo ha akon, kay hinigugma mo ako antes pa han tinikangan han kalibotan.*+
25 Matadong nga Amay, an kalibotan diri gud nakilala ha imo,+ pero ako nakilala ha imo,+ ngan ini hira nahibaro nga ginsugo mo ako.
26 Iginpakilala ko ha ira an imo ngaran ngan igpapakilala ko pa ito,+ basi magkaada hira han gugma nga iginpakita mo ha akon ngan ako magin kahiusa nira.”+
Mga footnote
^ Lit., “unod.”
^ O “an ira padayon nga pagkuha hin kahibaro mahitungod ha imo.”
^ O “Iginpakilala.”
^ O “ginsusugot.”
^ O “nagkakahiusa.”
^ O “basi magkaurosa.”
^ O “Ilain.”
^ O “basi mabug-os an ira pagkaurosa.”
^ Nagtutudlok ha mga anak nira Adan ngan Eva.
