An Pahayag kan Juan 8:1-13
8 Han iya+ gintangtang an ikapito nga selyo,+ nagmingaw ha langit hin mga tunga ka oras.
2 Ngan nakita ko an pito nga anghel+ nga natindog ha atubangan han Dios, ngan gintagan hira hin pito nga trumpeta.
3 Usa pa nga anghel nga may ginkakaptan nga bulawan nga surudlan* hin insenso an inabot ngan tinindog ha may halaran,+ ngan gintagan hiya hin damu nga insenso+ basi ighalad ito upod han mga pag-ampo han ngatanan nga baraan dida ha bulawan nga halaran+ nga nakada ha atubangan han trono.
4 An aso han insenso nga tikang ha kamot han anghel nagtipaigbaw upod han mga pag-ampo+ han mga baraan ha atubangan han Dios.
5 Pero ginkuha dayon han anghel an surudlan hin insenso, ngan ginpuno ito hin kalayo tikang ha halaran ngan iginlabog ito ha tuna. Ngan nagkaada mga dalugdog ngan mga tingog ngan mga idlap han kidlat+ ngan hin linog.
6 Ngan an pito nga anghel nga may pito nga trumpeta+ nag-andam ha paghuyop hito.
7 Ginhuypan han siyahan nga anghel an iya trumpeta. Ngan nagkaada hin uran nga yelo ngan kalayo nga may salakot nga dugo, ngan iginhulog ito ha tuna;+ ngan an ikatulo nga bahin han tuna nasunog, ngan an ikatulo nga bahin han kakahoyan nasunog, ngan an ngatanan nga berde nga tanom nasunog.+
8 Ginhuypan han ikaduha nga anghel an iya trumpeta. Ngan may pariho hin daku nga bukid nga nagkakalayo nga iginlabog ha dagat.+ Ngan an ikatulo nga bahin han dagat nagin dugo;+
9 ngan an ikatulo nga bahin han buhi nga mga linarang* nga nakada ha dagat nagkamatay,+ ngan an ikatulo nga bahin han mga barko nagkaguguba.
10 Ginhuypan han ikatulo nga anghel an iya trumpeta. Ngan usa nga daku nga bitoon nga naglalaga sugad hin sulô* an nahulog tikang ha langit, ngan nahulog ito ha ikatulo nga bahin han mga salog ngan ha mga burabod han katubigan.+
11 An ngaran han bitoon Mapait nga Tanom. Ngan an ikatulo nga bahin han katubigan nagin mapait pariho han mapait nga tanom, ngan damu han katawohan an nagkamatay tungod han tubig, kay nagin mapait ito.+
12 Ginhuypan han ikaupat nga anghel an iya trumpeta. Ngan an ikatulo nga bahin han adlaw ginhampak+ ngan an ikatulo nga bahin han bulan ngan an ikatulo nga bahin han mga bitoon, basi an ikatulo nga bahin hito ngatanan magsirom+ ngan an adlaw mawad-an hin kalamrag ha ikatulo nga bahin hito, ngan sugad man an gab-i.
13 Ngan nakita ko, ngan nabatian ko an usa nga agila nga nalupad ha kabutngaan han langit ngan tuna nga nasiring ha daku nga tingog: “Kairo, kairo, kairo+ han mga naukoy ha tuna tungod han nahibibilin pa nga mga tunog han trumpeta han tulo nga anghel nga hirani na maghuyop han ira mga trumpeta!”+
