An pagpaiwas nagpapanalipod ha kongregasyon ngan nagdidisiplina hadton nakasala nga diri nagbabasol. (1Co 5:6, 11) Kon nasuporta kita ha sugad nga disiplina tikang kan Jehova, nagpapakita kita hin gugma. Kay ano nga nakasiring kita hito nga an pagpaiwas naghahatag man hin kasakit ha emosyon ha ngatanan nga apektado, upod na ha duok nga kapamilya ngan ha hudisyal nga komite?

Labaw ha ngatanan, nagpapakita kita hin gugma ha reputasyon ni Jehova ngan ha iya suruklan han pagin baraan. (1Pe 1:14-16) Nagpapakita liwat kita hin gugma ha tawo nga ginpaiwas. An marig-on nga disiplina, bisan kon masakit, mahimo mamunga han “mamurayawon nga bunga han katadongan.” (Heb 12:5, 6, 11) Gin-uulang naton an disiplina ni Jehova kon nakikig-upod kita ha usa nga ginpaiwas o ha usa nga binulag ha kongregasyon. Hinumdumi, gindidisiplina ni Jehova an iya katawohan ha “husto nga sukol.” (Jer 30:11) Samtang ginsusuportaran naton an disiplina ni Jehova ngan gintitipigan an aton espirituwal nga rutina, padayon kita nga naglalaom nga mabalik ha aton maloloy-on nga Amay an usa nga ginpaiwas.​—Isa 1:16-18; 55:7.

KITAA AN VIDEO NGA BUG-OS-KASINGKASING NGA MAGPABILIN NGA MAUNUNGON, NGAN BATONA AN MASUNOD:

• Ano nga kasakit an inaabat han Kristiano nga mga kag-anak kon an ira anak nabaya kan Jehova?

• Paonan-o makakabulig an kongregasyon ha matinumanon nga mga kapamilya?

• Ano nga rekord ha Biblia an nagpapakita nga mas importante an pagin maunungon kan Jehova kay ha pagin maunungon ha kapamilya?

• Paonan-o naton iginpapakita nga mas importante ha aton an pagin maunungon kan Jehova kay ha pagin maunungon ha aton kapamilya?