Nagkikinabuhi kita ha panahon nga ginhihimo an maopay nga maraot ngan an maraot nga maopay. (Isa 5:20) Makasurubo, may mga tawo nga nagbubuhat han mga ginkakangalasan ni Jehova, upod na adton diri kaangayan nga ginbubuhat han magkapariho an sekso. An mga sangkay ha eskwelahan o an iba pa bangin mag-aghat ha iyo mga anak nga subaron hira. Paonan-o niyo maiaandam an iyo mga anak nga maatohan an sugad nga mga pagsulay?

Tutdui hira han mga suruklan ni Jehova. (Le 18:3) Depende ha ira edad, padayon nga itutdo ha ira an ginsisiring han Biblia mahitungod ha sex. (De 6:7) Pakianhi an iyo kalugaringon: ‘Gintututdoan ko ba an akon mga anak han angayan nga pagpakita han gugma, han pagkaimportante han desente nga pamado, ngan han pagkaimportante nga respetuhon han iba an ira privacy? Maaram ba hira han ira bubuhaton kon may magpakita ha ira hin pornograpiya o may magsugo ha ira nga buhaton an usa nga butang nga sayop para kan Jehova?’ An abanse nga paghibaro hini nga mga butang makakabulig ha ira nga malikyan an damu nga problema. (Pr 27:12; Ec 7:12) Pinaagi ha pagtutdo ha iyo mga anak, iginpapakita niyo an gugma ha iyo presyoso nga panurundon tikang kan Jehova.​—Sal 127:3.

KITAA AN VIDEO NGA PAGTUKOD HIN BALAY NGA MAGPAPADAYON​—PANALIPDI AN IYO MGA ANAK KONTRA HA “KARAOTAN,” NGAN BATONA AN MASUNOD:

• Kay ano nga an pipira nag-aalang pagtutdo ha ira mga anak mahitungod ha sex?

• Kay ano nga kinahanglan tutdoan han mga kag-anak an ira mga anak “ha disiplina ngan sagdon ni Jehova”?​—Efe 6:4

• Ano an mga igintagana han organisasyon basi buligan an mga kag-anak nga matutdoan an ira mga anak mahitungod ha sex?​—w19.05 12, kahon

• Kay ano nga kinahanglan regular kamo nga makiistorya ha iyo mga anak antes bumangon an mga problema?