ANO an nahitatabo dinhi? Nagpipyesta an mga tawo. Nag-imbitar an hadi han Babilonya hin usa ka yukot nga dungganon nga bisita. Ginagamit nira an bulawan ngan salapi nga mga kopa ngan yahong nga ginkuha tikang ha templo ni Jehova ha Jerusalem. Ngan tigda nga may-ada nakita nga nalutaw nga kamot han tawo ngan nagsurat ha bungbong. Nahadlok an ngatanan.

Hi Belsasar nga apo ni Nabukodonosor amo na an hadi hito nga panahon. Sininggit hiya nga pakadaon an iya maaramon nga kalalakin-an. ‘Bisan hin-o nga makakabasa hini nga sinurat ngan makakagsumat ha akon han kahulogan hini, tatagan hin damu nga regalo ngan hihimoon nga ikatulo nga pinakadungganon nga magmarando ha ginhadian,’ siring han hadi. Kondi waray bisan usa nga nakabasa han sinurat ha bungbong ngan nakagsumat han kahulogan hito.

Hinbatian han nanay han hadi an aringasa ngan kinadto ha haluag nga pangaonan. ‘Ayaw kahadlok,’ siring niya ha hadi. ‘May-ada tawo ha imo ginhadian nga nakilala ha baraan nga mga dios. Han an imo lolo nga hi Nabukodonosor pa an hadi, hiya an ginhimo nga lider han ngatanan niya nga maaramon nga kalalakin-an. Daniel an iya ngaran. Ipatawag hiya, ngan susumatan ka niya han kahulogan hini ngatanan.’

Salit gindara dayon ha sulod hi Daniel. Katapos magdumiri ha pagkarawat hin bisan ano nga regalo, iginsumat ni Daniel kon kay ano nga ginkuha hadto ha pagkahadi an lolo ni Belsasar nga hi Nabukodonosor. ‘Mapahitas-on gud hiya,’ siring ni Daniel. ‘Salit ginsirotan hiya ni Jehova.’

‘Kondi maaram ka han ngatanan nga nahitabo ha iya,’ siring ni Daniel kan Belsasar, ‘pero mapahitas-on ka la gihapon sugad kan Nabukodonosor. Ginkuha mo an mga kopa ngan mga yahong ha templo ni Jehova ngan gin-gamit ito. Gindadayaw mo an mga dios nga kahoy ngan bato, ngan diri mo ginpapasidunggan an aton Harangdon nga Maglalarang. Salit iginpasurat han Dios ini nga mga pulong.

‘Amo ini an nakasurat: ‘MENE, MENE, TEKEL ngan PARSIN,’ siring ni Daniel.

‘An MENE nangangahulogan nga gin-ihap na han Dios an mga adlaw han imo ginhadian ngan matatapos na ito. An TEKEL nangangahulogan nga gintimbang ka ha timbangan ngan nakita nga kulang. An PARSIN nangangahulogan nga an imo ginhadian ihahatag ha mga Mediahanon ngan Persiahanon.’

Samtang nagyayakan pa hi Daniel, an mga Mediahanon ngan Persiahanon nagtikang na pag-atake ha Babilonya. Ira ginsakop an syudad ngan ginpatay hi Belsasar. An sinurat ha bungbong natuman hito mismo nga gab-i! Kondi ano an mahitatabo yana ha mga Israelita? Hibabaroan naton ito, kondi kitaon anay naton kon ano an nahitabo kan Daniel.