PINAHUWAY hi Jesus ha usa nga atabay ha Samaria samtang an iya mga disipulo kinadto ha bungto basi pumalit hin pagkaon. An babaye nga kaistorya ni Jesus naalog hin tubig. Ginsidngan niya an babaye: ‘Painma ako.’

Nahipausa gud an babaye. Maaram ka ba kon kay ano? Tungod kay Samaritana hiya ngan Judio hi Jesus. An kadam-an nga Judio nasisina ha mga Samaritano. Diri ngani nakikiistorya an mga Judio ha ira! Kondi hinigugma ni Jesus an ngatanan nga klase hin tawo. Salit hiya nagsiring: ‘Kon maaram ka kon hin-o an naaro ha imo hin tubig, maaro ka ha iya ngan tatagan ka niya han tubig nga naghahatag hin kinabuhi.’

‘Ginoo,’ siring han babaye, ‘hilarom an atabay, ngan waray ka ngani balde. Diin ka makuha han tubig nga naghahatag hin kinabuhi?’

‘Kon uminom ka han tubig tikang hini nga atabay, uuhawon ka utro,’ siring ni Jesus. ‘Kondi an tubig nga ihahatag ko, makakahatag ha usa hin kinabuhi nga waray kataposan.’

‘Ginoo,’ siring han babaye, ‘tagi ako hini nga tubig! Basi diri na ako uhawon utro. Ngan diri na ako magbibinalik-balik nganhi ha pagkuha hin tubig.’

Kahuna han babaye nga literal nga tubig an ginsisiring ni Jesus. Kondi an ginhihisgotan ni Jesus amo an kamatuoran mahitungod ha Dios ngan ha Iya ginhadian. Ini nga kamatuoran sugad hin tubig nga naghahatag hin kinabuhi. Makakahatag ito ha usa hin kinabuhi nga waray kataposan.

Katapos, ginsidngan ni Jesus an babaye: ‘Lakat ngan tawaga an imo bana ngan balik nganhi.’

‘Waray ako bana,’ siring niya.

‘Husto an imo baton,’ siring ni Jesus. ‘Kondi nagkaada ka hin lima nga bana, ngan an lalaki nga imo yana kalungon diri mo bana.’

Nahipausa an babaye tungod kay tinuod ini ngatanan. Kay ano nga maaram hini hi Jesus? Tungod kay hiya an Usa nga Iginsaad nga ginsugo han Dios, ngan an Dios an nagsumat ha iya hini nga impormasyon. Hito nga takna binalik na an iya mga disipulo, ngan nahipausa hira tungod kay nakikiistorya hiya ha Samaritana.

Ano an aton mahibabaroan tikang hini? Ipinapakita hini nga buotan hi Jesus ha ngatanan nga klase hin tawo. Ngan sadang liwat kita magin pariho ha iya. Diri naton hunahunaon nga maraot an iba nga mga tawo tungod la kay iba an ira rasa. Karuyag ni Jesus nga hibaroan han ngatanan an kamatuoran nga naggigiya ngadto ha kinabuhi nga waray kataposan. Ngan sadang liwat naton buligan an mga tawo basi mahibaro han kamatuoran.