HA BIBLIA makikita mo an libro han Rut. Istorya ito mahitungod han usa nga pamilya durante han panahon nga an Israel may-ada mga hukom. Hi Rut usa nga batan-on tikang ha Moab; diri hiya membro han nasud han Dios, an Israel. Kondi han hinbaroan ni Rut an mahitungod han matuod nga Dios nga hi Jehova, ginhigugma gud niya Hiya. Hi Noemi usa nga lagas na nga babaye nga binulig kan Rut nga mahibaro mahitungod kan Jehova.

Israelita hi Noemi nga binalhin ha Moab upod an iya bana, ngan duha nga anak nga lalaki ha panahon han gutom ha Israel. Usa ka adlaw, namatay an iya bana. Inabot an panahon, nag-asawa an iya duha nga anak nga lalaki hin mga Moabita nga hira Rut ngan Orpa. Kondi paglabay hin mga 10 ka tuig, namatay an duha nga anak ni Noemi. Nasubo gud hiya ngan an iya duha nga umagad! Ano an pagbubuhaton ni Noemi yana?

Usa ka adlaw, nagdesisyon hi Noemi nga magbyahe hin hirayo tipauli ha Israel. Diri karuyag nira Rut ngan Orpa nga bumulag ha iya, salit inupod hira. Kondi han hurohirayo na hira, nagsiring hi Noemi ha iya mga umagad: ‘Uli kamo ha iyo mga nanay.’

Ginharokan ni Noemi an iya mga umagad antes hira pabalikon. Dida hito, nagtangis hira tungod kay hinigugma gud nira hi Noemi. Nagsiring hira: ‘Ayaw! Maupod kami ha imo ngadto ha imo nasud.’ Kondi hi Noemi binaton: ‘Balik kamo, mga anak ko. Mas maopay nga aadto kamo ha iyo balay.’ Salit, binalik hi Orpa, kondi waray bumalik hi Rut.

Hi Noemi nagsiring kan Rut: ‘Inuli na hi Orpa. Ikaw liwat, uli na upod ha iya.’ Kondi hi Rut binaton: ‘Ayaw ako paghangyoa nga bayaan ka! Paupda ako ha imo. Kon diin ka kumadto, makadto ako, ngan kon diin ka maukoy, didto ako maukoy. An imo katawohan maaakon katawohan, ngan an imo Dios, akon Dios. Kon diin ka mamatay, didto ako mamamatay ngan didto ako ilulubong.’ Han ginsiring ini ni Rut, waray na hiya paulia ni Noemi.

Katapos, inabot na hira ha Israel. Dinhi hira nag-ukoy. Nagtrabaho dayon hi Rut ha uma tungod kay panahon adto han pag-ani han sebada. Gintugotan hiya han lalaki nga hi Boas nga manguha han mga sebada ha iya uma. Maaram ka ba kon hin-o an nanay ni Boas? Hi Rahab nga taga-Jeriko.

Usa ka adlaw hi Boas nagsiring kan Rut: ‘Hinbatian ko an ngatanan mahitungod ha imo, ngan an imo pagin buotan kan Noemi. Maaram ako nga binayaan mo an imo tatay ngan nanay ngan an imo nasud ngan inukoy ka upod han mga tawo nga diri mo kilala. Hinaot bendisyonan ka ni Jehova!’

Hi Rut binaton: ‘Buotan ka gud ha akon, ginoo ko. Naliaw ako han maopay nga ginsiring mo ha akon.’ Naruyag gud hi Boas kan Rut, ngan waray pag-iha nagpakasal hira. Nalipay gud hini hi Noemi! Kondi nagin mas malipayon gud hiya han nagkaanak hira Rut ngan Boas han ira suhag nga hi Obed. Ha urhi, hi Obed nagin apoy ni David. Ngan damu pa an aton mahibabaroan mahitungod kan David.