KITAA an mga bukad ngan hinog nga almendras nga tinubo hini nga tungkod. Tungkod ini ni Aaron. Ini nga mga bukad ngan hinog nga prutas tinubo ha tungkod ni Aaron ha usa la ka gab-i! Kitaon naton kon kay ano.

Maiha-iha na nga naglinakat-lakat an mga Israelita ha kamingawan. Naghunahuna an iba nga diri sadang magin lider hi Moises, o magin hitaas nga saserdote hi Aaron. Usa hi Kore nga naghunahuna hini, sugad man hira Datan, Abiram, ngan an 250 nga lider han mga Israelita. Hira ngatanan kinadto kan Moises ngan nagsiring: ‘Kay ano nga kamo an nagmamando ha amon?’

Hi Moises nagsiring kan Kore ngan ha iya mga sumurunod: ‘Buwas nga aga pagdara kamo hin insensaryo ngan butangi ito hin insenso. Ngan kadto kamo ha tabernakulo ni Jehova. Makikita naton kon hin-o an Iya pipilion.’

Kinabuwasan, kinadto ha tabernakulo hi Kore ngan an iya 250 nga sumurunod. Damu pa an inupod ha pagsuporta ha ira. Nasina gud hi Jehova. ‘Pahirayo kamo ha mga tolda hinin magraot nga tawo,’ siring ni Moises. ‘Ayaw pagkamkam hin bisan ano nga gintatag-iya nira.’ Namati an mga tawo, ngan nagpahirayo ha mga tolda nira Kore, Datan, ngan Abiram.

Katapos, hi Moises nagsiring: ‘Pinaagi hini hibabaroan niyo kon hin-o an pinili ni Jehova. Mabubuka an tuna ngan lalamuyon inin magraot nga tawo.’

Katapos gud la ni Moises magyakan, binuka an tuna. Nagkahulog an tolda ngan mga panag-iya ni Kore, upod hira Datan ngan Abiram ngan an mga kaupod nira, ngan natabonan hira han tuna. Han hinbatian han katawohan an paggugliat hadton nagkahulog, hira nagsinggit: ‘Dalagan! Bangin lamuyon liwat kita han tuna!’

Hi Kore ngan an iya 250 nga sumurunod nakadto pa ha hirani han tabernakulo. Salit nagpadara hi Jehova hin kalayo, ngan nasunog hira ngatanan. Katapos, ginsidngan ni Jehova an anak ni Aaron nga hi Eleasar nga panguhaon an mga insensaryo han nagkamatay nga mga tawo ngan himoon ito nga manipis nga tabon han halaran. Ito nga tabon han halaran nagpapahamangno ha mga Israelita nga hi Aaron la ngan an iya mga anak an sadang magin mga saserdote ni Jehova.

Kondi karuyag ni Jehova nga ipatin-aw gud nga hi Aaron la ngan an iya mga anak an iya pinili nga magin mga saserdote. Salit nagsiring hiya kan Moises: ‘Padad-a hin tungkod an lider han tagsa nga tribo han Israel. Ha tribo ni Lebi, hi Aaron an padad-a han tungkod. Katapos, ibutang an tagsa hini nga tungkod ha tabernakulo ha atubangan han arka han kauyonan. Mamumukad an tungkod han akon pinili sugad nga saserdote.’

Kinabuwasan, han ginkita ni Moises an mga tungkod, aw, namukad an tungkod ni Aaron ngan namunga hin hinog nga almendras! Salit, nasasabtan mo na ba yana kon kay ano nga ginpabukad ni Jehova an tungkod ni Aaron?