KITAA hira Kain ngan Abel. Dagku na hira yana. Nagin parauma hi Kain. Nagtatanom hiya hin mga lugas, prutas ngan utanon.

Hi Abel nagin magbarantay han mga karnero. Naruruyag gud hiya ha pagmangno han nati nga mga karnero. Nanagku ito, ngan waray pag-iha damu na an iya ginbabantayan.

Usa ka adlaw naghalad ha Dios hira Kain ngan Abel. Nagdara hi Kain han mga bunga han iya pananom. Ngan nagdara hi Abel han iya pinakamaopay nga karnero. Nalipay hi Jehova kan Abel ngan ha iya halad. Kondi waray Hiya malipay kan Kain ngan ha iya halad. Maaram ka ba kon kay ano?

Diri la tungod kay mas maopay an halad ni Abel kay ha kan Kain. Kondi tungod kay maopay nga tawo hi Abel. Hinigugma niya hi Jehova ngan an iya bugto. Kondi maraot hi Kain; diri hiya nahigugma ha iya bugto.

Salit nagsiring an Dios kan Kain nga kinahanglan hiya magbag-o. Kondi waray hiya mamati. Nasina gud hiya tungod kay mas naruyagan han Dios hi Abel. Salit nagsiring hiya kan Abel, ‘Pakadto kita ha uma.’ Didto, han duha na la hira, ginbunalan ni Kain an iya bugto. Makusog gud an iya pagbunal salit namatay hi Abel. Maraot gud an ginbuhat ni Kain, diri ba?

Bisan kon patay na hi Abel, nahinunumdoman pa gihapon hiya han Dios. Buotan hi Abel, ngan diri gud nahingangalimtan ni Jehova an sugad nga tawo. Salit maabot an adlaw nga babanhawon ni Jehova nga Dios hi Abel. Hito nga panahon, diri na gud hiya mamamatay. Mabubuhi hiya dinhi ha tuna ha kadayonan. Makalilipay gud nga makilala an mga tawo nga pariho kan Abel, diri ba?

Kondi diri nalilipay an Dios ha mga tawo nga pariho kan Kain. Salit katapos patayon ni Kain an iya bugto, ginsirotan hiya han Dios. Ginpaiwas hiya tikang ha iya pamilya. Han linakat hi Kain ngadto ha hirayo nga lugar, igin-upod niya an usa han iya mga bugto nga babaye, ngan nagin asawa niya ito.

Paglabay han panahon, hi Kain ngan an iya asawa nagkaada mga anak. An iba nga anak nga kalalakin-an ngan kababayin-an nira Adan ngan Eva nag-aragsawa, ngan nagkaada liwat hin mga anak. Waray pag-iha nagdamu an mga tawo ha tuna. Kilalahon naton an iba ha ira.