NAPULO ka tuig na an naglabay tikang nga gindara ni Hadi Nabukodonosor an ngatanan nga edukado gud nga Israelita ngadto ha Babilonya. Ngan yana kitaa an nahitatabo! Nasusunog an Jerusalem. Ngan an mga Israelita nga waray pamataya, ginbihag ngadto ha Babilonya.

Hinumdumi nga ini an iginpahamangno han mga propeta ni Jehova nga mahitatabo kon diri magbag-o an katawohan ha ira magraot nga binuhatan. Kondi waray mamati an mga Israelita ha mga propeta. Nagpadayon hira ha pagsingba ha palso nga mga dios imbes nga magsingba kan Jehova. Salit angay hira sirotan. Maaram kita hini tungod kay iginsusumat ha aton han propeta han Dios nga hi Esekiel an ira maraot nga ginbubuhat.

Maaram ka ba kon hin-o hi Esekiel? Usa hiya han mga batan-on nga gindara ni Hadi Nabukodonosor ha Babilonya sobra 10 ka tuig na antes mahitabo inin daku nga kabungkagan han Jerusalem. Hito nga panahon, gindara liwat hira Daniel, ngan an iya tulo nga sangkay nga hira Sadrak, Mesak ngan Abednego.

Samtang aadto hi Esekiel ha Babilonya, ipinakita ha iya ni Jehova an magraot nga nahitatabo ha templo ha Jerusalem. Ginbuhat ini ni Jehova pinaagi han usa nga milagro. Aadto hi Esekiel ha Babilonya kondi ipinakita ha iya ni Jehova an ngatanan nga nahitatabo ha templo. Mangil-ad gud an nakita ni Esekiel!

‘Kitaa an mangil-ad nga ginbubuhat han katawohan dinhi ha templo,’ siring ni Jehova kan Esekiel. ‘Kitaa an pader nga punó hin mga retrato han mga halas ngan iba nga hayop. Ngan kitaa an mga Israelita nga nagsisingba hito!’ Nakikita ni Esekiel ini ngatanan, ngan iginsurat niya an nahitatabo.

‘Nakikita mo ba an ginbubuhat ha tago han mga lider ha Israel?’ nagpakiana hi Jehova kan Esekiel. Oo, nakikita liwat niya ini. May-ada 70 nga tigurang, ngan hira ngatanan nagsisingba ha palso nga mga dios. Hira nasiring: ‘Diri kita nakikita ni Jehova. Ginbayaan niya an tuna.’

Katapos, iginpakita ni Jehova kan Esekiel an pipira nga kababayin-an ha norte nga ganghaan han templo. Nangangalingkod hira didto, nagsisingba ha palso nga dios nga hi Tamus. Ngan kitaa an kalalakin-an ha ganghaan han templo ni Jehova! Mga 25 hira ngan nakikita hira ni Esekiel. Naatubang hira ha sinirangan ngan nayukbo ha adlaw!

‘Diri ako gintatahod hini nga katawohan,’ siring ni Jehova. ‘Diri la hira nagbubuhat hin magraot kondi ha akon templo pa gud nira ginbubuhat ito!’ Salit hi Jehova nagsaad: ‘Aabaton nira an akon duro nga kasina. Ngan diri ako malolooy ha ira kon bungkagon hira.’

Paglabay hin tulo la ka tuig katapos ipakita ini ni Jehova kan Esekiel, nagrebelde an mga Israelita kan Hadi Nabukodonosor. Salit nakig-away hiya ha ira. Paglabay hin usa ngan tunga ka tuig, an mga Babilonyahanon nakasulod ha Jerusalem ngan ginsunog nira an syudad tubtob nga naugtang ito. Damu gud an ginpamatay ngan ginbihag ngadto ha Babilonya.

Kay ano nga gintugotan ni Jehova nga mahitabo ha mga Israelita inin makangingirhat nga kabungkagan? Oo, tungod kay waray hira mamati kan Jehova ngan waray nira sunda an iya mga balaud. Ipinapakita hini nga importante gud nga sundon naton pirme an ginsisiring ni Jehova.

Ha tinikangan, gintugotan an pipira nga tawo nga magpabilin ha Israel. Gintaporan ni Hadi Nabukodonosor an Judio nga hi Gedalia ha pagpanguna ha ira. Kondi ginpatay hi Gedalia han iba nga Israelita. Yana, tungod hini nga nahitabo, nahadlok an katawohan nga bangin bumalik an mga Babilonyahanon basi pamatayon hira ngatanan. Salit ginpirit nira hi Jeremias nga umupod ha ira, ngan pinalagiw hira ngadto ha Ehipto.

Tungod hini, waray nahibilin bisan usa nga tawo ha Israel. Ha sulod hin 70 ka tuig, waray naukoy didto. Kondi nagsaad hi Jehova nga pababalikon niya an iya katawohan katapos hin 70 ka tuig. Samtang hito nga panahon, ano daw la an nahitatabo ha katawohan han Dios nga gindara ngadto ha Babilonya? Aton kitaon.