Kapitulo 58

An Tinapay Ngan an Libadura

DAMU nga tawo an kinadto kan Jesus ha Decapolis, diin damu nga Hentil an naukoy. Hirayo an ira ginbiyahe tipakadto hito nga lugar basi makapamati ha iya ngan matambal an ira mga sakit. Nagdara hira hin dagku nga basket, o alat, nga kasagaran ira ginsusudlan han mga kinahanglanon kon nabiyahe ha mga lugar han mga Hentil.

Katapos, gintawag ni Jesus an iya mga disipulo ngan nagsiring: “Nalolooy ako ha mga tawo, kay tulo ka adlaw na nga nag-iinupod hira ha akon, ngan waray hira pagkaon. Kon paulion ko hira nga gutom, bangin madismayo hira ha dalan, ngan an iba ha ira hirayo an gintikangan.”

Pero nagpakiana an mga disipulo: “Diin kita makakakuha hin tinapay dinhi hinin hirayo nga lugar basi makakaon ini nga mga tawo?”

Nagpakiana hi Jesus: “Pira nga tinapay an aada ha iyo?”

“Pito,” binaton hira, “ngan may pipira nga gudtiay nga isda.”

Ginpalingkod ni Jesus ha tuna an mga tawo. Katapos, ginkuha niya an mga tinapay ngan mga isda, nag-ampo ha Dios, gintipik-tipik ito, ngan iginhatag ha mga disipulo. Iginhatag liwat ito han mga disipulo ha mga tawo, nga nangaon tubtob nga nabusog. Han gintirok nira an nahisalin, nakapuno ito hin pito nga dagku nga basket bisan kon mga 4,000 nga kalalakin-an an nangaon, labot han kababayin-an ngan kabataan!

Katapos ginpauli ni Jesus an mga tawo, sinakay hiya ha baluto upod an mga disipulo, ngan tinabok pakadto ha weste nga baybayon han Dagat han Galilea. Didto, ginsarihan hiya han mga Pariseo nga may kaupod nga mga membro han sekta han mga Saduseo, pinaagi ha pag-aro hin tigaman tikang ha langit.

Tungod kay maaram hi Jesus han ira motibo, nagsiring hiya: “Kon tikagab-i na nahiaraan niyo nga sumiring, ‘Magigin maopay an panahon kay mapula an langit,’ ngan kon aga, kamo nasiring, ‘Magigin mahagkot ngan mauran yana nga adlaw kay mapula an langit ngan madalumdom.’ Maaram kamo han kahulogan han nakikita niyo ha langit, kondi diri kamo maaram han kahulogan han mga tigaman han mga panahon.”

Salit gintawag hira ni Jesus nga maraot ngan diri-matinumanon ha Dios nga henerasyon ngan gin-utro niya an iya ginsiring hadto ha mga Pariseo nga waray tigaman nga ihahatag ha ira gawas la han tigaman ni Jonas. Katapos sinakay hiya ngan an iya mga disipulo ha baluto ngan kinadto ha Betsaida ha norte nga baybayon han Dagat han Galilea. Han nagbibiyahe hira, nahibaroan han mga disipulo nga waray hira pakadara hin tinapay, pero may usa pa nga nahibilin.

Nahinunumdoman pa ni Jesus an iya pakiistorya ha mga Pariseo ngan mga Saduseo nga nasuporta kan Herodes, salit nagpahamangno hiya: “Padayon kamo nga magbantay; mag-ikmat kamo ha libadura han mga Pariseo ngan ha libadura ni Herodes.” Tungod han pag-unabi ni Jesus han libadura, naghunahuna an mga disipulo nga iya ginhihisgotan an ira kahingalimot pagdara hin tinapay, salit nagdiskusyon hira mahitungod hito. Nakita ni Jesus nga waray hira magkaintindihay, salit nagsiring hiya: “Kay ano nga nagdidiskusyon kamo nga waray kamo pakadara hin tinapay?”

Usa o duha pa la ka adlaw an naglabay, milagroso nga ginpakaon ni Jesus hin tinapay an yinukot nga tawo. Nasabtan unta han mga disipulo nga diri hiya nababaraka nga kulang an tinapay. “Diri ba kamo nahinunumdom,” siring niya, “han gintipik-tipik ko an lima nga tinapay para ha 5,000 nga kalalakin-an? Pira ka basket an napuno han salin nga mga tipik nga iyo gintirok?”

Binaton hira: “Dose.”

“Han gintipik-tipik ko an pito nga tinapay para ha 4,000 nga kalalakin-an, pira ka basket nga dagku an napuno han gintirok niyo an nahisalin nga mga tipik?”

Binaton hira: “Pito.”

“Diri pa ba niyo nasasabtan an kahulogan?” nagpakiana hi Jesus. “Kay ano nga diri niyo nasasabtan nga diri tinapay an akon gin-iistorya ha iyo? Karuyag ko sidngon nga mag-ikmat kamo ha libadura han mga Pariseo ngan mga Saduseo.”

Nasabtan han mga disipulo an punto. An libadura, nga ginagamit ha pagpatubo han tinapay ngan ha pagpaaslom, nagpapasabot hin karaotan. Nasabtan nira nga gin-gamit ito ni Jesus ha simboliko nga paagi, ngan ginpapahamangnoan hira nga mag-ikmat ha “katutdoan han mga Pariseo ngan mga Saduseo,” kay may maraot ito nga epekto. Marcos 8:1-21; Mateo 15:32–16:12.

▪ Kay ano nga may dara nga dagku nga basket an mga tawo?

▪ Nagpakain hi Jesus han binaya hiya ha Decapolis?

▪ Ano an sayop nga pagsabot han mga disipulo han nag-unabi hi Jesus mahitungod han libadura?

▪ Ano an karuyag sidngon ni Jesus han “libadura han mga Pariseo ngan mga Saduseo”?