Kapitulo 5

Diin Ngan Kakan-o Natawo hi Jesus?

NAGSUGO an emperador han Imperyo han Roma nga hi Cesar Agusto nga an ngatanan kinahanglan umuli ha syudad nga ira natawhan basi magparehistro. Salit nagbiyahe hi Jose ngadto ha iya natawhan nga lugar, ha syudad han Betlehem.

An Betlehem puno han mga tawo nga magpaparehistro, ngan waray na iba nga maukyan hira Jose ngan Maria kondi ha kwadra. Hito nga kwadra han mga asno ngan iba pa nga hayop natawo hi Jesus. Ginputos hiya ni Maria hin mga lampin ngan ginpahigda ha sabsaban, an tubongan han mga hayop.

Sigurado nga tungod ha giya han Dios ginhimo ni Cesar Agusto an balaud ha pagparehistro. Ito an hinungdan nga natawo hi Jesus ha Betlehem, an syudad nga maiha na nga igintagna ha Kasuratan diin matatawo an iginsaad nga hadi.

Diri gud hingangalimtan ito nga gab-i! Ha gawas, naglamrag an palibot han usa nga grupo han mga paraataman hin karnero. Ito an himaya ni Jehova! Ngan an anghel ni Jehova nagsiring ha ira: “Ayaw kamo kahadlok! kay iginpapasamwak ko ha iyo an maopay nga sumat nga makakalipay gud ha ngatanan nga tawo, tungod kay natawo yana ha syudad ni David an iyo Paratalwas, an Kristo nga Ginoo. Ngan ini an pangirilal-an niyo ha iya: Makakakita kamo hin minasus-an nga ginputos hin lampin ngan nahigda ha sabsaban.” Tigda la nga inabot an damu nga anghel ngan nagkanta: “Pagdayawon an Dios ha kahitas-an, ngan ha tuna kamurayawan para ha mga tawo nga iya nalilipayan.”

Pagbaya han mga anghel, an mga paraataman hin karnero nag-iristorya: “Kadto dayon kita ha Betlehem, ngan kitaon naton ini nga hitabo nga iginpahibaro ha aton ni Jehova.” Kinadto dayon hira ngan nakita nira hi Jesus ha lugar nga ginsiring han anghel. Han iginsumat nira an iginpahibaro han anghel, nahipausa an ngatanan nga nakabati. Gintipigan ni Maria ito ngatanan nga sumat, ngan ginpamalandong niya an kahulogan hito.

Damu yana an natoo nga hi Jesus natawo han Disyembre 25. Pero hito nga bulan, mauran ngan mahagkot ha Betlehem. Salit diri puydi nga aadto ha gawas an mga paraataman upod an ira mga karnero hito nga panahon. An Cesar han Roma bangin diri liwat magsusugo ha mga tawo nga nainklinar na pagrebelde ha iya nga magbiyahe ha sugad kahagkot nga panahon basi magparehistro. Kon sugad, hi Jesus natawo han nagtitikang an katrakdag (Septyembre o Oktubre) hito nga tuig. Lucas 2:1-20; Mika 5:2.

▪ Kay ano nga nagbiyahe ngadto ha Betlehem hira Jose ngan Maria?

▪ Ano an urusahon nga nahitabo han gab-i nga natawo hi Jesus?

▪ Kay ano nga masisiring nga diri Disyembre 25 an natawhan ni Jesus?