Kapitulo 52

Milagroso nga Nagpakaon hin Yinukot

AN 12 nga apostol nalipay gud ha diri-hingangalimtan nga pagsangyaw nira ha bug-os nga Galilea. Waray pag-iha, tikang nga namatay hi Juan, binalik hira kan Jesus ngan iginsumat an ira makalilipay nga mga eksperyensya. Han nakita ni Jesus nga kapoy na hira ngan damu nga tawo an nagsurosaliwan pag-abot salit waray na hira panahon bisan ha pagkaon, nagsiring hiya: “Kadto kita ha mamingaw nga lugar ngan pamahuway kita didto.”

Posible nga hirani ha Capernaum hira sinakay hin baluto, ngan kinadto hira ha turuyoon nga lugar ha este han Jordan nga unhan pa han Betsaida. Pero nakita han damu nga tawo nga linakat hira ngan nahibaro hito an iba. Salit an ngatanan nga nakadto nagdadlagan ha baybay, ngan pagduong han baluto, nakadto na hira basi tumapo.

Paghaw-as nira, nakita ni Jesus an damu nga tawo ngan nalooy hiya kay sugad hira hin mga karnero nga waray paraataman. Salit gintambal niya an mga may sakit ngan damu an iya igintutdo ha ira.

Waray la abata an oras, ngan an mga disipulo dinaop kan Jesus ngan nagsiring: “Hirayo ini nga lugar ngan tikagab-i na. Palakta na hira basi kumadto hira ha kahirani nga mga lugar ngan mga baryo ngan makapalit hin makakaon.”

Pero nagsiring hi Jesus: “Tagi niyo hira hin makakaon.” Tungod kay maaram na hiya han iya bubuhaton, ginpakianhan niya hi Felipe basi sarihan: “Diin kita makakapalit hin tinapay basi makakaon hira?”

Para kan Felipe, imposible gud ito. Hunahunaa la, mga 5,000 nga lalaki an nakadto, ngan bangin sobra 10,000 hira ngatanan upod na an kababayin-an ngan kabataan! Binaton hi Felipe nga “an kanan 200 ka denaryo [hadto usa ka denaryo an sweldo ha usa ka adlaw] nga tinapay diri maeksakto ha ira, bisan kon gutiay la an ihatag ha kada tagsa.”

Bangin karuyag liwat ni Andres ipakita nga imposible mapakaon an sugad nga kadamu, salit nagsiring hiya: “Aadi an bata nga lalaki nga may lima nga tinapay nga sebada ngan duha nga gudtiay nga isda. Pero paonan-o ini maeksakto ha sugad nga kadamu?”

Katsaringsing hadto ngan hirani na an Paskua han 32 C.E., salit marabong an kabanwaan. Ginsidngan ni Jesus an mga disipulo nga palingkuron ha kabanwaan an mga tawo nga tag-50 ngan tag-100 an kada grupo. Ginkuha niya an lima nga tinapay ngan an duha nga isda, katapos hinangad basi mag-ampo ha pagpasalamat. Gintipik-tipik niya an mga tinapay ngan ginbahin-bahin an mga isda. Iya ito iginhatag ha mga disipulo, ngan iginhatag liwat nira ito ha mga tawo. Urusahon gud nga nakakaon hira ngatanan tubtob nga nabusog!

Katapos ginsidngan ni Jesus an mga disipulo: “Tiroka niyo an salin nga mga tipik basi waray makarag.” Han gintirok nira an mga salin han ira ginpangaon, nakapuno ito hin 12 nga basket! Mateo 14:13-21; Marcos 6:30-44; Lucas 9:10-17; Juan 6:1-13.

▪ Kay ano nga karuyag ni Jesus kumadto ha usa nga lugar nga hira la han iya mga apostol?

▪ Diin kumadto hi Jesus ngan an iya mga disipulo, ngan kay ano nga waray hira makapahuway?

▪ Han tikagab-i na, ano an ginsiring han mga disipulo kan Jesus? Paonan-o niya ginpanginano an mga tawo?