Kapitulo 68

Padayon nga Nagtutdo ha Ikapito ka Adlaw

DIRI pa tapos an ultimo ngan ikapito nga adlaw han Piyesta han mga Tabernakulo. Nagtututdo hi Jesus ha templo didto ha may “burutangan han bahandi.” Posible nga aadto ito ha gintatawag nga Bungsaran han Kababayin-an diin may mga kahon nga ginhuhulogan han mga tawo han kontribusyon.

Kada gab-i durante han piyesta, may espesyal nga suga didto hito nga lugar. Upat nga dagku nga burutangan han lampara an gintindog didto, ngan an tagsa hito may upat nga dagku nga surudlan nga puno hin lana. Malamrag gud ito nga mga lampara, nga may 16 nga surudlan hin lana, salit haluag an nalalamragan hito ha gab-i. Bangin ito an nahinumdoman han mga namamati kan Jesus han nagsiring hiya: “Ako an kalamrag han kalibotan. An nasunod ha akon diri gud maglalakat ha kasisidman, kondi magkakaada kalamrag han kinabuhi.”

Kinontra an mga Pariseo: “Nagpapamatuod ka mahitungod ha imo kalugaringon; buwa an imo pamatuod.”

Binaton hi Jesus: “Bisan kon ako an nagpapamatuod mahitungod ha akon kalugaringon, totoo an akon pamatuod, kay maaram ako kon diin ako tikang ngan kon makain ako. Pero diri kamo maaram kon diin ako tikang ngan kon makain ako.” Nagsiring pa hiya: “Nagpapamatuod ako mahitungod ha akon kalugaringon, ngan an Amay nga nagsugo ha akon nagpapamatuod liwat mahitungod ha akon.”

“Hain an imo Amay?” nagpakiana an mga Pariseo.

Binaton hi Jesus: “Diri kamo nakilala ha akon ngan ha akon Amay. Kon kilala niyo ako, kilala liwat unta niyo an akon Amay.” Bisan kon karuyag pa gihapon han mga Pariseo nga arestuhon hiya, waray gud nag-aresto ha iya.

“Mabaya ako,” nagsiring na liwat hi Jesus. “Diri kamo makakakadto ha akon kakadtoan.”

Tungod hito naghunahuna an mga Judio: “Mag-uunay ba hiya? Kay nasiring hiya, ‘Diri kamo makakakadto ha akon kakadtoan.’”

“Kamo tikang ha ilarom,” nagsaysay hi Jesus. “Ako tikang ha igbaw. Kamo tikang hini nga kalibotan; ako diri tikang hini nga kalibotan.” Nagsiring pa hiya: “Kon diri kamo natoo nga ako amo hiya, mamamatay kamo ha iyo mga sala.”

Syempre an ginhihisgotan ni Jesus amo an iya kinabuhi antes nagin tawo ngan an iya pagin iginsaad nga Mesias, o Kristo. Pero nakakatamay nga nagpakiana hira: “Hin-o ka?”

Han ira iginsalikway hi Jesus, nagsiring hiya: “Kay ano nga nakikiistorya pa ako ha iyo?” Pero nagsiring pa gihapon hiya: “An nagsugo ha akon pirme nagyayakan han kamatuoran, ngan an akon nabatian ha iya iginsusumat ko ha kalibotan.” Nagsiring pa hiya: “Kon bitayon na niyo an Anak han tawo, makakasabot kamo nga ako amo hiya. Diri ako nagbubuhat han akon la karuyag, kondi an igintutdo ha akon han Amay amo an akon ginyayakan. An nagsugo ha akon kaupod ko; waray niya ako pabay-i nga nag-uusahan, kay ginbubuhat ko pirme an nakakalipay ha iya.”

Han ginsiring ito ni Jesus, damu an tinoo ha iya. Ginsumatan niya hira: “Kon pirme niyo ginbubuhat an akon ginsisiring, mga disipulo ko gud kamo, ngan mahibabaro kamo han kamatuoran, ngan an kamatuoran maghahatag ha iyo hin kagawasan.”

“Katulinan kami ni Abraham,” sumagbang an mga nakontra ha iya, “ngan waray pa kami magin uripon han bisan hin-o. Kay ano nga nasiring ka, ‘Magkakaada kamo kagawasan’?”

Bisan kon an mga Judio agsob masakop han iba nga nasud, diri nira ginkikilala nga agaron an nag-uuripon ha ira. Diri hira naruruyag tawagon nga mga uripon. Pero iginpatin-aw ni Jesus nga mga uripon gud hira. Ha ano nga paagi? “Ha pagkamatuod susumatan ko kamo,” siring niya, “an nagbubuhat hin sala uripon han sala.”

Namimeligro an mga Judio kay diri hira nakarawat nga uripon hira han sala. “An uripon diri padayon nga naukoy ha balay han agaron,” nagsaysay hi Jesus, “pero an anak padayon nga naukoy.” An uripon waray katungod ha panurundon, salit puydi hiya pabayaon bisan ano nga oras. An anak o an gin-ampon la an “padayon” nga naukoy ha balay, samtang buhi hiya.

“Salit kon an Anak maghatag ha iyo hin kagawasan,” nagpadayon hi Jesus, “magkakaada gud kamo kagawasan.” Kon sugad, an kamatuoran nga naghahatag hin kagawasan ha mga tawo amo an kamatuoran mahitungod ha Anak, hi Jesu-Kristo. Pinaagi la ha paghalad han iya hingpit nga kinabuhi sugad nga tawo matatalwas an bisan hin-o tikang ha makamaratay nga sala. Juan 8:12-36.

▪ Diin nagtutdo hi Jesus han ikapito ka adlaw? Ano an makikita didto kon gab-i, ngan ano an koneksyon hito ha igintutdo ni Jesus?

▪ Sumala kan Jesus, diin hiya tikang? Ano an iginpapasabot hito mahitungod han iya pangirilal-an?

▪ Ha ano nga paagi uripon an mga Judio, pero ano nga kamatuoran an magtatalwas ha ira?