Kapitulo 87

Pag-andam ha Tidaraon Pinaagi hin Praktikal nga Kinaadman

NATAPOS pa la hi Jesus pag-istorya mahitungod han waldas nga anak ha mga disipulo, ha diri tangkod nga mga parasukot hin buhis ngan iba pa nga kilala nga magpakasasala, ngan ha mga eskriba ngan mga Pariseo. Yana, nagsaysay hiya ha mga disipulo hin ilustrasyon mahitungod han riko nga nakakarawat hin sumbong mahitungod han iya tinaporan ha balay.

Sumala kan Jesus, gintawag han riko an iya tinaporan ngan ginsumatan nga paiiwason na hiya. “Ano an akon bubuhaton, kay paiiwason na ako han akon agaron?” naghunahuna an tinaporan. “Diri ko na maaakos an mabug-at nga trabaho, ngan naaawod ako makilimos. Ah! maaram na ako han akon bubuhaton, basi kon paiwason na ako, karawaton ako han mga tawo ha ira balay.”

Ano an iya plano? Gintawag niya an mga may utang ha iya agaron. Nagpakiana hiya: “Pira an imo utang?”

An siyahan binaton, “100 ka takos nga lana han olibo.”

“Kuhaa an sinurat nga kasabotan han imo utang. Lingkod ngan surati dayon ito hin 50,” ginsidngan niya hiya.

Ginpakianhan niya an usa pa: “Pira an imo utang?”

Binaton hiya, “100 ka sako nga trigo.”

“Kuhaa an sinurat nga kasabotan han imo utang ngan surati ito hin 80.”

An tinaporan may katungod pa ha pag-iban han mga utang ha iya agaron, kay hiya pa an nakapot han mga negosyo han iya agaron. Pinaagi ha pag-iban han mga utang, nakikigsangkay hiya ha mga makakabulig ha iya kon mawad-an na hiya hin trabaho.

Han hinbaroan ito han agaron, bumilib hiya. Ha pagkamatuod, “gindayaw han agaron an iya tinaporan bisan kon diri-matadong, kay ginios hiya nga may praktikal nga kinaadman.” Nagsiring pa ngani hi Jesus: “An mga anak hini nga sistema mas maaramon magtratar ha mga tawo ha ira henerasyon kay ha mga anak han kalamrag.”

Basi ipatin-aw an leksyon ha mga disipulo, nag-aghat hiya: “Pakigsangkay kamo pinaagi han karikohan hinin diri-matadong nga kalibotan basi kon maubos ito, karawaton kamo nira ha permanente nga mga urukyan.”

Gindayaw ni Jesus an tinaporan diri ha iya pagin diri matadong, lugod tungod han iya pagsabot han posible mahitabo ngan praktikal nga kinaadman. “An mga anak hini nga sistema” kasagaran nga maaram gumamit han ira kwarta o katungdanan basi makigsangkay ha mga makakabulig ha ira. Salit kinahanglan gamiton liwat hin maaramon han mga surugoon han Dios nga amo “an mga anak han kalamrag,” an ira mga panag-iya o “karikohan hinin diri-matadong nga kalibotan” basi magpahimulos hira.

Pero sugad han ginsiring ni Jesus, pinaagi hini nga karikohan sadang hira makigsangkay ha mga puydi kumarawat ha ira ngadto “ha permanente nga mga urukyan.” Para ha mga membro han gutiay nga panon, ito nga mga urukyan aadto ha langit; para ha “iba nga mga karnero,” aanhi ito ha Paraiso nga tuna. Tungod kay hi Jehova nga Dios la ngan an iya Anak an puydi kumarawat hin mga tawo ngadto hito nga mga urukyan, sadang gud kita mangalimbasog ha pakigsangkay ha ira pinaagi ha paggamit han anoman nga aton “karikohan hinin diri-matadong nga kalibotan” basi suportahan an buruhaton han Ginhadian. Mawara man an materyal nga karikohan, nga sigurado nga mahitatabo, makakasiguro kita han aton waray kataposan nga tidaraon.

Nagsiring pa hi Jesus nga an mga matinumanon nga nanginginano hito nga materyal, o gutiay nga mga butang magigin matinumanon liwat ha panginano ha mas importante nga mga butang. Nagpadayon hiya: “Salit, kon diri niyo ipakita nga matataporan kamo han mga karikohan hinin diri-matadong nga kalibotan, hin-o an matapod ha iyo han totoo nga karikohan [an espirituwal nga karikohan]? Ngan kon diri niyo ipakita nga matataporan kamo han mga panag-iya han iba [an importante nga mga butang nga igintapod han Dios ha iya mga surugoon], hin-o an mahatag ha iyo han balos nga para ha iyo [an premyo nga kinabuhi ha permanente nga mga urukyan]?”

Diri kita puydi magin totoo nga surugoon han Dios ngan ha pariho nga panahon magin uripon han karikohan hinin diri-matadong nga kalibotan, an materyal nga karikohan, sugad han ginsiring ni Jesus: “Waray surugoon ha balay an mahimo magin uripon han duha nga agaron, kay kasisinahan niya an usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagin uripon han Dios ngan han karikohan.” Lucas 15:1, 2; 16:1-13; Juan 10:16.

▪ Paonan-o an tinaporan ha ilustrasyon ni Jesus nakikigsangkay ha mga makakabulig ha iya?

▪ Ano an “karikohan hinin diri-matadong nga kalibotan”? Paonan-o kita makikigsangkay pinaagi hito?

▪ Hin-o la an puydi kumarawat ha aton ngadto “ha permanente nga mga urukyan”? Ano ito nga mga urukyan?