Kapitulo 17

Pagtutdo kan Nicodemo

HAN Paskua han 30 C.E., nagbuhat hi Jesus hin urusahon nga mga tigaman, o milagro. Salit damu an tinoo ha iya. Bumilib gud hi Nicodemo, usa nga membro han Sanhedrin, an korte suprema han mga Judio, ngan karuyag niya mahibaro hin dugang pa. Salit bumisita hiya kan Jesus han gab-i na, kay bangin nahahadlok nga madaot an iya reputasyon kon makit-an hiya han iba nga Judio nga mga lider.

“Rabbi,” siring niya, “maaram kami nga magturutdo ka nga tikang ha Dios, kay waray makakahimo hini nga mga milagro nga imo ginbubuhat kon diri hiya tagan han Dios hin gahum.” Binaton hi Jesus nga basi makasulod ha Ginhadian han Dios, an usa nga tawo kinahanglan “ig-anak utro.”

Pero paonan-o ig-aanak utro an usa nga tawo? “Makakasulod ba hiya ha tiyan han iya nanay basi ig-anak utro?” nagpakiana hi Nicodemo.

Diri ito an iginpapasabot han pagin igin-anak utro. Hi Jesus nagsaysay: “An usa nga tawo diri makakasulod ha Ginhadian han Dios kon diri hiya ig-anak utro pinaagi ha pagpabawtismo ha tubig ngan pagkarawat han baraan nga espiritu.” Ha bawtismo ni Jesus, linusad ngada ha iya an baraan nga espiritu, salit igin-anak hiya pinaagi ‘ha tubig ngan han baraan nga espiritu.’ Pinaagi han kapahayagan han Dios nga ‘Ini an akon Anak nga akon nalilipayan,’ iya iginpahibaro nga nagkaada hiya espirituwal nga anak nga may paglaom nga makasulod ha Ginhadian ha langit. Pag-abot han Pentekostes 33 C.E., an iba nga nabawtismohan makarawat han baraan nga espiritu salit hira liwat ig-aanak utro sugad nga espirituwal nga mga anak han Dios.

Kondi importante gud an papel han espesyal nga Anak han Dios sugad nga tawo. Ginsumatan ni Jesus hi Nicodemo: “Sugad la nga ginbitay ni Moises an halas didto ha kamingawan, kinahanglan bitayon liwat an Anak han tawo, basi an bisan hin-o nga natoo ha iya magkaada kinabuhi nga waray kataposan.” Oo, an mga Israelita nga gintukob han maglara nga halas kinahanglan magkita ha tumbaga nga halas basi matalwas, ha pariho nga paagi an ngatanan nga tawo kinahanglan magpakita hin pagtoo ha Anak han Dios basi matalwas ha kamatayon.

Basi pabug-atan an pagin mahigugmaon ni Jehova, ginsumatan ni Jesus hi Nicodemo: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” Salit han nakadto hi Jesus ha Jerusalem, unom pa la ka bulan tikang nga iya gintikangan an iya ministeryo, iginpatin-aw niya nga hiya an gagamiton ni Jehova nga Dios ha pagtalwas han katawohan.

Nagsaysay pa hi Jesus kan Nicodemo: “Ginsugo han Dios an iya Anak nganhi ha kalibotan, diri basi hukman an kalibotan,” karuyag sidngon, diri basi hukman ito hin maraot, o sirotan, nga ginsisentensyahan an katawohan hin kabungkagan. Lugod, uyon han ginsiring ni Jesus, ginsugo hiya “basi matalwas an kalibotan pinaagi ha iya.”

Hi Nicodemo kinadto kan Jesus han gab-i na kay nahahadlok hiya nga may makakita ha iya. Salit makapainteres nga sugad hini gintapos ni Jesus an ira pag-istorya: “Ini an basihan han paghukom, nga an kalamrag [nga nagsisimbolo han kinabuhi ngan katutdoan ni Jesus] kinanhi ha kalibotan kondi hinigugma han mga tawo an kasisidman imbes nga an kalamrag, kay maraot an ira mga buhat. Kay an nagbubuhat hin magraot nasisina ha kalamrag ngan diri nahirani ha kalamrag, basi diri sawayon an iya mga buhat. Kondi an nagbubuhat hin maopay nahirani ha kalamrag basi makita an iya mga buhat nga uyon ha kaburut-on han Dios.” Juan 2:23–3:21; Mateo 3:16, 17; Buhat 2:1-4; Numeros 21:9.

▪ Kay ano nga bumisita hi Nicodemo, ngan kay ano nga gab-i na hiya nagpakadto?

▪ Ano an iginpapasabot han pagin “igin-anak utro”?

▪ Paonan-o iginpatin-aw ni Jesus an iya papel ha pagtalwas ha aton?

▪ Ano an karuyag sidngon han ginsiring ni Jesus nga kinanhi hiya “diri basi hukman an kalibotan”?