Kon Paonan-o Ka Magigin Duok ha Dios
Kapitulo 16
Kon Paonan-o Ka Magigin Duok ha Dios
1. Ano nga mga pagkapariho an nakikita ha damu nga mga relihiyon?
AN USA nga turista nga nabisita ha usa nga nasud ha Oriente nahipausa ha relihiyoso nga mga ritwal nga iya naobserbahan ha usa nga templo han Budhista. Bisan kon an mga imahen diri adton mga imahen ni Maria o Kristo, damu nga mga ritwal an nakapariho hadton ha iya iglesia ha nasud nga iya inuukyan. Pananglitan, hinkit-an niya an paggamit han mga rosaryo ngan han pagkanta hin mga pag-ampo. An iba liwat naghimo han sugad nga mga pagtanding. Ha Este o Weste, pariho gud an mga paagi han mga debotado basi magin duok ha Dios o ha mga butang ha ira pagsingba.
2. Paonan-o iginsasaysay an pag-ampo, ngan kay ano nga damu nga mga tawo an nag-aampo?
2 Damu an labi na nga nangangalimbasug nga magin duok ha Dios pinaagi ha pag-ampo ha iya. An pag-ampo iginsasaysay sugad nga “an pakiistorya han tawo ha sagrado o baraan—ha Dios, ha mga dios, ha luyo nga kalibotan, o labaw ha natural nga mga gahum.” (The New Encyclopædia Britannica) Kondi, kon nag-aampo ha Dios, an iba naghuhunahuna la kon ano an ira makakarawat nga kapulsanan. Pananglitan, an usa nga lalaki nagpakiana ha usa han mga Saksi ni Jehova: “Kon mag-aampo ka para ha akon, masusulbad daw an mga problema ha akon pamilya, ha trabaho, ngan ha akon kahimsog?” Bangin ito an ginhunahuna han lalaki, kondi damu an nag-aampo ngan nagpapabilin la gihapon an ira mga problema. Salit mahimo kita magpakiana, ‘Kay ano nga sadang kita magin duok ha Dios?’
KON KAY ANO NGA SADANG KITA MAGIN DUOK HA DIOS
3. Kan kanay sadang naton iderikta an aton mga pag-ampo, ngan kay ano?
3 An pag-ampo diri usa nga waray pulos nga ritwal, diri man ito usa ka paagi basi makarawat an usa nga butang. An daku nga hinungdan ha paghirani ha Dios amo an pagkaada duok nga relasyon ha iya. An aton mga pag-ampo kon sugad sadang iderikta kan Jehova nga Dios. “Hi Jehova hirani ha ngatanan hadton natawag ha iya,” siring han salmista nga hi David. (Salmo 145:18) Gindadapit kita ni Jehova nga magkaada mamurayawon nga relasyon ha iya. (Isaias 1:18) Adton nabaton hini nga pagdapit nauyon ha salmista nga nagsiring: “Para ha akon, an paghirani ha Dios maopay para ha akon.” Kay ano? Tungod kay adton nagpapahirani kan Jehova nga Dios magpapahimulos han totoo nga kalipayan ngan kamurayawan ha hunahuna.—Salmo 73:28.
4, 5. (a) Kay ano nga importante nga mag-ampo ha Dios? (b) Ano nga klase hin relasyon an mapaparig-on naton pinaagi han pag-ampo?
4 Kay ano nga kinahanglan mag-ampo ha Dios para han bulig kon hiya ‘maaram han aton ginkikinahanglan antes kita mangaro ha iya’? (Mateo 6:8; Salmo 139:4) Ipinapakita han pag-ampo nga mayada kita pagtoo ha Dios ngan gin-iisip hiya sugad nga Surok han “tagsa maopay nga hatag ngan tagsa hingpit nga regalo.” (Jakobo 1:17; Hebreo 11:6) Nalilipay hi Jehova ha aton mga pag-ampo. (Proberbios 15:8) Nalilipay hiya ha pamati ha aton makahuloganon nga mga pagpahayag han apresasyon ngan pagdayaw, sugad la han amay nga nalilipay ha pamati ha iya gutiay nga bata nga nagyayakan han sinsero nga mga pulong han pagpasalamat. (Salmo 119:108) Kon mayada maopay nga relasyon han amay-ngan-anak, mayada mapaso nga komunikasyon. An bata nga hinigugma naruruyag makiistorya ha iya amay. Sugad man ha aton relasyon ha Dios. Kon tinuod nga inaapresyar naton an aton hinbabaroan mahitungod kan Jehova ngan han gugma nga iya ipinapakita ha aton, magkakaada kita makusog nga hingyap nga maipahayag an aton kalugaringon ha iya ha pag-ampo.—1 Juan 4:16-18.
5 Kon nadaraon ha Gihitaasi nga Dios, sadang kita magin matinalahuron, kondi diri kinahanglan mabaraka mahitungod han eksakto nga mga pulong nga ginagamit naton. (Hebreo 4:16) Pirme kita makakadaraon kan Jehova. Ngan daw ano nga pribilehiyo nga aton ‘maibubuhos an aton kasingkasing’ ha Dios ha pag-ampo! (Salmo 62:8) An apresasyon para kan Jehova nagtutugway ha mapaso nga relasyon ha iya, pariho han relasyon nga napahimulsan han matinumanon nga tawo nga hi Abraham sugad nga sangkay han Dios. (Jakobo 2:23) Kondi kon nag-aampo ha Soberano nga Ginoo han uniberso, kinahanglan sundon naton an iya mga kinahanglanon ha paghirani ha iya.
MGA KINAHANGLANON BASI MAKADUOK HA DIOS
6, 7. Bisan kon an Dios diri nagkikinahanglan hin salapi basi pamation an aton mga pag-ampo, ano an iya ginkikinahanglan ha aton kon kita nag-aampo?
6 Ginkikinahanglan ba an salapi basi makahirani ha Dios? Damu nga mga tawo an nagbabayad ha klero basi ig-ampo hira. An iba natoo pa ngani nga pamamation an ira mga pag-ampo sumala han kadaku han donasyon nga ira iginhahatag. Kondi, an Pulong han Dios diri nasiring nga ginkikinahanglan ha aton an salapi nga halad basi makahirani kan Jehova ha pag-ampo. An iya espirituwal nga mga tagana ngan mga bendisyon han usa nga relasyon ha iya ha pag-ampo makakarawat nga waray bayad.—Isaias 55:1, 2.
7 Ano, kon sugad, an ginkikinahanglan? Kinahanglanon an usa ka husto nga paggios han kasingkasing. (2 Kronikas 6:29, 30; Proberbios 15:11) Ha aton kasingkasing kinahanglan magbuhat kita hin pagtoo kan Jehova nga Dios sugad nga an “Parapamati han pag-ampo” ngan “an magbaralos hadton madasigon nga nagbibiling ha iya.” (Salmo 65:2; Hebreo 11:6) Kinahanglan magkaada liwat kita mapainubsanon nga kasingkasing. (2 Hadi 22:19; Salmo 51:17) Ha usa han iya mga ilustrasyon, ipinakita ni Jesu-Kristo nga an dinaraon ha Dios nga mapainubsanon nga parasukot hin buhis nga may mapainubsanon nga kasingkasing amo an labaw nga matadong kay han mapahitas-on nga Pariseo. (Lukas 18:10-14) Ha aton pagdaraon ha Dios ha pag-ampo, hinumduman naton nga “an tagsa nga mapahitas-on ha kasingkasing usa ka butang nga mangil-ad kan Jehova.”—Proberbios 16:5.
8. Kon karuyag naton nga batunon han Dios an aton mga pag-ampo, kinahanglan limpyohon naton an aton kalugaringon tikang ha ano?
8 Kon karuyag naton nga batunon han Dios an aton mga pag-ampo, kinahanglan limpyohon naton an aton kalugaringon han makasasala nga paggawi. Han gindasig han disipulo nga hi Jakobo an iba nga humirani ha Dios, hiya nagdugang: “Limpyohi niyo an iyo mga kamot, kamo nga magpakasasala, ngan linisi an iyo mga kasingkasing, kamo nga mga maruhaduhaon.” (Jakobo 4:8) Bisan an mga magburuhat hin sayop mahimo hingada ha mamurayawon nga relasyon kan Jehova kon magbasol hira ngan bayaan an ira daan nga paagi han kinabuhi. (Proberbios 28:13) Diri kita pamamation ni Jehova kon salingkapaw nga ginlimpyo naton an aton kalugaringon ha espirituwal. “An mga mata ni Jehova aada ha magtadong, ngan an iya mga talinga aada ha ira mga pangamuyo; kondi an bayhon ni Jehova nakontra hadton nagbubuhat hin maraut nga mga butang,” siring han Pulong han Dios.—1 Pedro 3:12.
9. Pinaagi kan kanay sadang kita dumaraon kan Jehova, ngan kay ano?
9 An Biblia nasiring: “Waray tawo nga matadong ha tuna nga nagpapadayon ha pagbuhat hin maopay ngan diri nakakasala.” (Eklesiastes 7:20) Salit mahimo ka magpakiana: “Paonan-o, kon sugad, makakadaraon kita kan Jehova nga Dios?’ An Biblia nabaton: “Kon an usa nagbubuhat hin sala, mayada kita parabulig ha Amay, hi Jesu-Kristo, an matadong nga usa.” (1 Juan 2:1) Bisan kon kita magpakasasala, makakadaraon kita ha Dios nga may kagawasan ha pagyakan pinaagi kan Jesu-Kristo, nga namatay sugad nga lukat para ha aton. (Mateo 20:28) Hiya la an agianan nga pinaagi ha iya makakadaraon kita kan Jehova nga Dios. (Juan 14:6) Kinahanglan diri naton hunahunaon nga an bili han halad lukat ni Jesus magtatabon dayon han ngatanan nga aton mga sala bisan kon tinuyo nga nagbubuhat kita hin sala. (Hebreo 10:26) Kondi, kon nangangalimbasug gud kita ha paglikay han maraut kondi nakakasala usahay, makakagbasol kita ngan makakapangaro ha Dios hin pasaylo. Kon nadaraon kita ha iya nga may mapainubsanon nga kasingkasing, pamamation kita niya.—Lukas 11:4.
MGA HIGAYON HA PAG-AMPO HA DIOS
10. Kon mahitungod ha pag-ampo, paonan-o naton masusubad hi Jesus, ngan ano an pipira nga mga okasyon para ha pribado nga pag-ampo?
10 Ginpabilhan gud ni Jesu-Kristo an iya relasyon kan Jehova. Salit, hi Jesus naghikay hin panahon ha pakiistorya ha Dios ha pribado nga pag-ampo. (Markos 1:35; Lukas 22:40-46) Maopay nga subaron naton an susbaranan ni Jesus ngan regular nga mag-ampo ha Dios. (Roma 12:12) Angayan nga tikangan an adlaw pinaagi han mga pulong han pag-ampo, ngan antes kumaturog, husto nga nagpapasalamat kita kan Jehova para han buruhaton hito nga adlaw. Durante han adlaw, siguroha an pagdaraon ha Dios, “ha tagsa nga okasyon.” (Efeso 6:18) Makakag-ampo pa ngani kita hin hilum ha aton kasingkasing, maaram nga nakakabati hi Jehova ha aton. An pribado nga pakiistorya ha Dios nabulig ha aton nga maparig-on an aton relasyon ha iya, ngan an pag-ampo kan Jehova adlaw-adlaw nabulig ha aton nga magin duok pa gud ha iya.
11. (a) Kay ano nga an mga pamilya sadang mag-ampo nga tarampo? (b) Ano an karuyag sidngon kon nasiring ka “Amen” ha kataposan han pag-ampo?
11 Hi Jehova namamati liwat ha mga pag-ampo nga iginhahalad para ha mga grupo han mga tawo. (1 Hadi 8:22-53) Makakaduok kita ha Dios sugad nga pamilya, nga an ulo han panimalay an nangunguna ha pag-ampo. Nagpaparig-on ini han bugkos han pamilya, ngan hi Jehova nagigin totoo gud ha mga batan-on samtang hinbabatian nira an ira mga ginikanan nga mapainubsanon nga nag-aampo ha Dios. Ano man kon an usa nagrerepresentar ha usa nga grupo ha pag-ampo, bangin ha usa nga katirok han mga Saksi ni Jehova? Kon usa kita han mamarati, mamati kita hin maopay basi ha kataposan han pag-ampo, bug-os-kasingkasing nga makakasiring kita “Amen,” nga nangangahulogan “Matuman unta.”—1 Korinto 14:16.
MGA PAG-AMPO NGA PINAMAMATIAN NI JEHOVA
12. (a) Kay ano nga diri binabaton han Dios an iba nga mga pag-ampo? (b) Kay ano nga diri naton sadang ibuhos an atension ha personal la nga mga panginahanglan kon nag-aampo?
12 Bangin isipon han iba nga diri ginbabaton han Dios an ira mga pag-ampo bisan kon nag-aampo hira ha iya pinaagi kan Kristo. Kondi, hi apostol Juan nagsiring: “Bisan ano nga butang nga aton pangaroon sumala han kaburut-on [han Dios], namamati hiya ha aton.” (1 Juan 5:14) Salit, kinahanglan mangaro kita sumala han kaburut-on han Dios. Tungod kay interesado hiya ha aton espirituwal nga kaopayan, bisan ano nga butang nga nakakaapekto ha aton espirituwalidad amo an angayan nga ulohan ha pag-ampo. Kinahanglan atohan naton an pagsulay ha pagbuhos han atension ha pisikal gud la nga mga panginahanglan. Pananglitan, bisan kon husto an pag-ampo para han pagsabot ngan kusog ha paglampos han sakit, an mga pangarit mahitungod han kahimsog diri sadang magtabon han espirituwal nga mga interes. (Salmo 41:1-3) Tungod kay nababaraka hinduro ha iya kahimsug, usa nga Kristiano nga babaye an naghangyo hin bulig kan Jehova nga magkaada husto nga panhunahuna ha iya sakit. Sugad nga resulta, naibanan an iya pangarit ha mga problema ha kahimsog, ngan inabat hiya nga tinagan hiya hin “gahum nga labaw han kinaiya.” (2 Korinto 4:7) Nagtubo an iya hingyap nga mabuligan an iba ha espirituwal, ngan nagin bug-os panahon hiya nga parasamwak han Ginhadian.
13. Sugad han ipinakita ha Mateo 6:9-13, ano an pipira han angayan nga mga ulohan nga mahimo naton iupod ha aton mga pag-ampo?
13 Ano an mahimo naton iupod ha aton mga pag-ampo basi malipay hi Jehova ngan pamation ito? Gintutdoan ni Jesu-Kristo an iya mga disipulo kon paonan-o an pag-ampo. Ha modelo nga pag-ampo nga nahisurat ha Mateo 6:9-13, iginhatag niya an susbaranan han mga ulohan nga mahimo naton ig-ampo. Ano an sadang nga magin siyahan nga pagtagad ha aton mga pag-ampo? An ngaran ngan an Ginhadian ni Jehova nga Dios kinahanglan amo an labaw nga importante. Angayan an pangaro han aton materyal nga mga panginahanglan. Importante liwat an pangaro hin pagpasaylo han aton mga sala ngan katalwasan tikang ha mga pagsulay ngan ha maraut nga usa, hi Satanas nga Yawa. Diri karuyag ni Jesus nga aton kantahon ini nga pag-ampo o balik-balikon, ginyayakan ito nga diri ginhuhunahuna an kahulogan hito. (Mateo 6:7) Ano nga klase hin relasyon an mahihimo kon an bata nagamit hin pariho nga mga pulong ha kada panahon nga nakikiistorya hiya ha iya amay?
14. Gawas pa han mga pangamuyo, ano nga mga pag-ampo an sadang naton ihatag?
14 Gawas pa han mga pakimalooy ngan kinasingkasing nga mga pangamuyo, sadang maghalad kita hin mga pag-ampo han pagdayaw ngan pagpasalamat. (Salmo 34:1; 92:1; 1 Tesalonika 5:18) Makakag-ampo liwat kita para ha iba. An mga pag-ampo mahitungod han aton espirituwal nga kabugtoan nga kalalakin-an ngan kababayin-an nga nagsasakit o gintitimaraut nagpapakita han aton interes ha ira, ngan nalilipay hi Jehova ha pamati ha aton nga iginpapahayag an sugad nga pagtagad. (Lukas 22:32; Juan 17:20; 1 Tesalonika 5:25) Ha pagkamatuod, hi apostol Pablo nagsurat: “Diri kamo mabaraka han bisan ano nga butang, kondi ha ngatanan nga butang pinaagi han pag-ampo ngan pangamuyo upod an pagpasalamat ipahibaro niyo ha Dios an iyo pinangangaro; ngan an kamurayawan han Dios nga nalabaw han ngatanan nga hunahuna magbabantay han iyo mga kasingkasing ngan han iyo mga gahum ha paghunahuna pinaagi kan Kristo Jesus.”—Filipos 4:6, 7.
MAGPADAYON HA PAG-AMPO
15. Ano an sadang hinumduman naton kon an aton mga pag-ampo baga in diri binabaton?
15 Bisan kon nagkakaada ka hin kahibaro mahitungod han Dios, bangin umabat ka nga an imo mga pag-ampo usahay diri binabaton. Posible nga magin sugad hini an kahimtang tungod kay bangin diri pa panahon han Dios ha pagbaton han espisipiko nga pag-ampo. (Eklesiastes 3:1-9) Bangin tinutugotan ni Jehova an usa nga kahimtang nga magpadayon ha usa ka dali, kondi binabaton niya an mga pag-ampo ngan maaram han gimaopayi nga panahon ha pagbaton hito.—2 Korinto 12:7-9.
16. Kay ano nga sadang magpadayon kita ha pag-ampo, ngan paonan-o an pagbuhat hini makakaapekto ha aton relasyon ha Dios?
16 An aton pagpadayon ha pag-ampo nagpapahayag han aton kinasingkasing nga interes ha aton ginsisiring ha Dios. (Lukas 18:1-8) Pananglitan, bangin mangaro kita kan Jehova nga buligan kita nga malamposan an usa nga kaluyahan. Pinaagi ha pagpadayon ha pag-ampo ngan pagbuhat uyon han aton mga pangamuyo, ipinapakita naton an aton pagkasinsero. Sadang kita magin espisipiko ngan tangkod ha aton mga pangamuyo. Importante an pag-ampo hin sinsero labi na kon nakakaeksperiensia kita hin pagsulay. (Mateo 6:13) Kon nagpapadayon kita ha pag-ampo samtang nangangalimbasug ha pagpugong han aton makasasala nga mga hingyap, makikita naton kon paonan-o kita binubuligan ni Jehova. Magpapatubo ini han aton pagtoo ngan magpaparig-on han aton relasyon ha iya.—1 Korinto 10:13; Filipos 4:13.
17. Paonan-o kita makarawat hin kapulsanan tikang ha mainampoon nga paggios ha pag-alagad ha Dios?
17 Pinaagi ha pagpatubo han mainampoon nga paggios ha paghatag hin baraan nga pag-alagad kan Jehova nga Dios, hisasabtan naton nga diri kita nag-aalagad ha iya ha aton kalugaringon nga kusog. Hi Jehova an naghahatag ha aton hin kusog ha pag-alagad ha iya. (1 Korinto 4:7) An pagkilala hini mabulig ha aton nga magin mapainubsanon ngan magpapauswag han aton relasyon ha iya. (1 Pedro 5:5, 6) Oo, mayada kita marig-on nga mga hinungdan ha pagpadayon ha pag-ampo. An aton sinsero nga mga pag-ampo ngan presyoso nga kahibaro kon paonan-o magigin duok ha aton mahigugmaon langitnon nga Amay totoo nga magpapalipay han aton kinabuhi.
AN KOMUNIKASYON KAN JEHOVA DIRI USA LA NGA BAHIN
18. Paonan-o kita makakapamati ha Dios?
18 Kon karuyag naton nga pamation han Dios an aton mga pag-ampo, kinahanglan mamati kita ha iya ginsisiring. (Sakarias 7:13) Diri na hiya nagpapadara han iya mga mensahe pinaagi han inspirado han Dios nga mga propeta ngan sigurado nga diri ginagamit an espiritistiko nga mga paagi. (Deuteronomio 18:10-12) Kondi makakapamati kita ha Dios pinaagi ha pag-aram ha iya Pulong, an Biblia. (Roma 15:4; 2 Timoteo 3:16, 17) Sugad la nga bangin kinahanglan naton magpahiara ha rasa han materyal nga pagkaon nga makakapahimsog ha aton, ginsasagda kita nga “maghingyap han waray limbong nga gatas nga iya han pulong.” Patuboa an hilig ha espirituwal nga pagkaon pinaagi ha pagbasa han Pulong han Dios adlaw-adlaw.—1 Pedro 2:2, 3; Buhat 17:11.
19. Ano an kapulsanan han pamalandong ha imo binabasa ha Biblia?
19 Pamalandong ha imo binabasa ha Biblia. (Salmo 1:1-3; 77:11, 12) Nangangahulogan iton nga hunahunaon hin maopay an materyal. Mahimo mo igpariho ini ha pagtunaw han pagkaon. Mahimo mo tunawon an espirituwal nga pagkaon pinaagi ha paghunahuna han imo binabasa ha mga butang nga imo na hinbabaroan. Tagda kon paonan-o an impormasyon nakakaapekto ha imo kinabuhi, o hunahunaa hin maopay kon ano an iginpapahayag hito mahitungod han mga kalidad ngan pakig-upod ni Jehova. Salit pinaagi han personal nga pag-aram, makakarawat mo an espirituwal nga pagkaon nga igintatagana ni Jehova. Magpapahirani ini ha imo hin labaw kaduok ha Dios ngan mabulig ha imo ha paglampos han adlaw-adlaw nga mga problema.
20. Paonan-o an pagtambong ha Kristiano nga mga katirok nabulig ha aton nga magin duok ha Dios?
20 Mahimo ka liwat magin duok ha Dios pinaagi ha pagpamati ha iya Pulong nga ginhihisgutan ha Kristiano nga mga katirok, sugad la han mga Israelita nga namamati hin maopay kon nagkakatirok hira ha pamati ha pagbasa han Balaud han Dios ha publiko. An mga magturutdo hiton nga panahon naghahatag han kahulogan han Balaud nga ira ginbabasa, binubuligan kon sugad an ira mga mamarati nga hisabtan ngan mapagios nga buhaton an ira hinbatian. Nagtugway ini ha daku nga kalipay. (Nehemia 8:8, 12) Salit himoa nga batasan an pagtambong ha mga katirok han mga Saksi ni Jehova. (Hebreo 10:24, 25) Mabulig ini ha imo nga hisabtan ngan iaplikar an kahibaro han Dios ha imo kinabuhi ngan magdadara ha imo hin kalipayan. An pagin bahin han bug-os kalibotan Kristiano nga pagminagburugto mabulig ha imo nga magpabilin nga duok kan Jehova. Ngan sugad han aton makikita, makakaagi ka hin totoo nga kasigurohan ha butnga han katawohan han Dios.
SARIHI AN IMO KAHIBARO
Kay ano nga sadang magin duok ka kan Jehova?
Ano an pipira nga mga kinahanglanon basi magin duok ha Dios?
Ano an mahimo mo iupod ha imo mga pag-ampo?
Kay ano nga sadang magpadayon ka ha pag-ampo?
Paonan-o ka makakapamati kan Jehova yana nga adlaw?
[Mga Pakiana]
[Bug-os-pahina nga piktyur ha pahina 157]
