1, 2. (a) Ano an gin-antos han mga Kristiano ha Judea? (b) Paonan-o iginpakita an gugma ha mga Kristiano ha Judea?

MGA 46 C.E. hadto, ngan may-ada duro nga gutom ha Judea. Tungod kay gutiay na la hinduro an suplay han lugas, naghitaas an presyo hito ngan waray na iparalit an Judio nga mga disipulo han Kristo nga nag-uukoy didto. Nagugutom hira, ngan nakikita ito ha ira dagway. Kondi, maieksperyensyahan nira an gugma ni Jehova ha paagi nga waray pa maeksperyensyahi han mga disipulo han Kristo. Ano daw la an mahitatabo?

² Han hinbaroan han mga Kristiano nga Judio ngan Hentil ha Antiokia, Sirya, an gutom ha Jerusalem ngan Judea, nangolekta hira hin pundo para han ira mga igkasi-tumuroo didto. Katapos nagpili hira hin duha nga responsable nga bugto—hira Bernabe ngan Saul—basi dad-on an ayuda ngadto ha mga tigurang han kongregasyon ha Jerusalem. (Basaha an Buhat 11:27-30; 12:25.) Handurawa la an gin-abat han kabugtoan ha Judea tungod han gugma nga iginpakita ha ira han kabugtoan ha Antiokia!

3. (a) Paonan-o ginsusubad han katawohan han Dios yana an mga Kristiano ha Antiokia? Paghatag hin ehemplo. (Kitaa liwat an kahon nga “ An Siyahan nga Pinakadaku nga Pagbulig ha Moderno nga Panahon.”) (b) Ano nga mga pakiana an paghihisgotan hini nga kapitulo?

³ Ito nga panhitabo ha siyahan nga siglo C.E., an siyahan nga nakarekord nga pagpadara hin ayuda han mga Kristiano ha usa nga bahin han tuna ngadto ha mga Kristiano ha iba nga lugar. Yana, ginsusubad naton an susbaranan han kabugtoan ha Antiokia. Kon nahibabaroan naton nga nag-aantos hin kalamidad o trahedya an aton kabugtoan ha iba nga lugar, ginbubuligan naton hira. * Basi masabtan an koneksyon han pagbulig ha panahon han kalamidad ha aton ministeryo, tagdon naton an tulo nga pakiana: Kay ano nga gintatagad naton nga bahin han aton ministeryo an pagbulig? Ano an katuyoan han aton pagbulig? Paonan-o kita nagpapahimulos tikang ha ministeryo ha pagbulig?

4. Ano an ginsiring ni Pablo mahitungod han ministeryo han mga Kristiano ha mga taga-Corinto?

⁴ Ha ikaduha nga surat ni Pablo ha mga taga-Corinto, iginsaysay niya nga may duha nga bahin an Kristiano nga ministeryo. Bisan kon an iya surat para ha dinihogan nga mga Kristiano, aplikado liwat ito ha “iba nga mga karnero” han Kristo. (Juan 10:16) An usa nga bahin han aton ministeryo amo an “sagrado nga buruhaton [o, “ministeryo”] han pagpahiuli”—an aton pagsangyaw  ngan pagtutdo nga buruhaton. (2 Cor. 5:18-20; 1 Tim. 2:3-6) An usa pa amo an ministeryo nga aton ginbubuhat para ha igkasi-tumuroo. Espisipiko nga an gintutudlok ni Pablo amo an “[ministeryo ha] pagbulig.” (2 Cor. 8:4) Ha mga pulong nga “ministeryo han pagpahiuli” ngan “ministeryo ha pagbulig,” an termino nga “ministeryo” pariho tikang ha Griego nga pulong nga di·a·ko·niʹa. Kay ano nga importante ito?

5. Kay ano nga importante nga gintawag ni Pablo nga ministeryo an pagbulig?

⁵ Ha paggamit hin uusa nga Griego nga pulong para hiton duha nga buruhaton, iginpapakita la ni Pablo nga an pagbulig ha panahon han kalamidad usa liwat nga klase han ministeryo nga ginhihimo ha Kristiano nga kongregasyon. Ha iya siyahan nga surat, hiya nagsiring: “Damu nga klase an sagrado nga buruhaton [o ministeryo], pero usa la an Ginoo; ngan damu nga klase an buruhaton, . . . Pero [ito] ginbubuhat han amo gihapon nga espiritu.” (1 Cor. 12:4-6, 11) Ngani, iginkaw-ing ni Pablo an iba-iba nga ministeryo han kongregasyon ha “sagrado nga pag-alagad.” * (Roma 12:1, 6-8) Sigurado nga ito an rason kon kay ano nga nahunahuna niya nga maghatag hin panahon “basi magserbi ha mga baraan”!—Roma 15:25, 26.

6. (a) Kay ano nga bahin han aton pagsingba an pagbulig nga buruhaton sugad han ginsiring ni Pablo? (b) Isaysay kon paonan-o an aton pagbulig nga buruhaton ginhihimo ha bug-os nga kalibotan yana. (Kitaa an kahon nga “ Kon May Umabot nga Kalamidad!” ha pahina 214.)

⁶ Ginbuligan ni Pablo an mga taga-Corinto nga masabtan nga an pagbulig bahin han ira ministeryo ngan pagsingba kan Jehova. Tigamni an iya pangatadongan: An mga Kristiano nagtatagana hin bulig tungod kay hira “mapinasakupon [ha] maopay nga sumat mahitungod han Kristo.” (2 Cor. 9:13) Tungod kay karuyag iaplikar han mga Kristiano an igintututdo han Kristo, ginbubuligan nira an ira igkasi-tumuroo. Hi Pablo nagsiring nga an ira pagbulig ha ira kabugtoan kapahayagan han “diri-matupngan nga pagkabuotan han Dios.” (2 Cor. 9:14; 1 Ped. 4:10) May kalabotan ha pagbulig ha kabugtoan nga nanginginahanglan, upod na ha pagbulig ha panahon han kalamidad, an The Watchtower han Disyembre 1, 1975, nagsiring: “Diri naton sadang pagruhaduhaan nga importante kan Jehova nga Dios ngan han iya Anak nga hi Jesu-Kristo ini nga klase han pag-alagad.” Oo, an pagbulig birilhon nga klase han sagrado nga pag-alagad.—Roma 12:1, 7; 2 Cor. 8:7; Heb. 13:16.

7, 8. Ano an siyahan nga katuyoan han aton ministeryo ha pagbulig? Isaysay.

⁷ Ano an katuyoan han aton ministeryo ha pagbulig? Ginbaton ito ni Pablo ha iya ikaduha nga surat ha mga taga-Corinto. (Basaha an 2 Corinto 9:11-15.) Hini nga mga bersikulo, iya ginpabug-atan an tulo nga katuyoan nga aton nakakab-ot kon nakikigbahin kita ha ministeryo ha ‘pagserbisyo publiko,’ o paghatag hin bulig. Paghisgotan naton an tagsa hito.

⁸ Siyahan, basi mapasidunggan hi Jehova. Ha lima nga gin-unabi nga bersikulo, tigamni kon mationan-o kaagsob gin-giyahan ni Pablo an atensyon han iya kabugtoan ngadto kan Jehova. Ginpahinumdoman niya hira nga magpahayag hin ‘pagpasalamat ha Dios’ ngan “[magpahayag hin] damu nga pagpasalamat ha  Dios.” (Bersikulo 11, 12) Gin-unabi niya nga tungod han nakakarawat nga bulig, an usa nga Kristiano naaaghat ha ‘pagdayaw ha Dios’ ngan ha “diri-matupngan nga pagkabuotan han Dios.” (Bersikulo 13, 14) Ha pagtapos han paghisgot mahitungod han ministeryo ha pagbulig, hi Pablo nagsiring: “Pasalamatan naton an Dios.”—Bersikulo 15; 1 Ped. 4:11.

9. Paonan-o an aton pagbulig mahimo makagbag-o han negatibo nga impresyon ha aton? Paghatag hin ehemplo.

⁹ Pariho kan Pablo, gintatagad han mga surugoon ni Jehova yana an pagbulig sugad nga higayon ha pagdayaw ha Iya ngan ha pagrayandayan han Iya katutdoan. (1 Cor. 10:31; Tito 2:10) Ngani, agsob nga nakakabulig ito basi mabag-o an negatibo nga impresyon han iba mahitungod kan Jehova ngan han iya mga Saksi. Pananglitan, usa nga babaye nga naukoy ha lugar nga makusog nga ginbagyo an may karatola ha iya purtahan: “Nadiri an Tagbalay Makiistorya ha mga Saksi ni Jehova.” Usa ka adlaw, nakita niya nga may mga nag-aayad hin naguba nga balay ha ira atbang. Pipira ka adlaw nga gin-inobserbaran niya an makisangkayon nga mga boluntaryo. Katapos kinadto hiya ha ira basi kilalahon kon hin-o hira. Naimpres hiya han hibaroan niya nga mga Saksi ni Jehova ngay-an hira, ngan siniring, “Nagsayop ako han akon impresyon ha iyo.” Ano an resulta? Ginkuha niya an karatola ha iya purtahan.

10, 11. (a) Ano nga mga ehemplo an nagpapakita nga nakakab-ot naton an ikaduha nga katuyoan han aton pagbulig nga buruhaton? (b) Ano nga publikasyon an nakakabulig ha mga boluntaryo? (Kitaa an kahon nga “ Bulig ha mga Boluntaryo ha Panahon han Kalamidad.”)

¹⁰ Ikaduha, basi hura nga ‘makaghatag’ han “panginahanglan” han aton igkasi-tumuroo. (2 Cor. 9:12a) Karuyag gud naton ihatag dayon an panginahanglan han aton kabugtoan ngan ibanan an ira pag-antos. Kay ano? Kay an mga membro han Kristiano nga kongregasyon bahin han “usa la nga lawas,” salit “kon an usa nga bahin nag-aantos, an ngatanan nga bahin nag-aantos liwat.” (1 Cor. 12:20, 26) An minagburugto nga gugma ngan pagpaid nag-aaghat ha damu nga kabugtoan nga bayaan dayon an ira ginbubuhat, andamon an ira gamit, ngan kumadto ha lugar nga naapektohan hin kalamidad basi buligan an kabugtoan. (San. 2:15, 16) Pananglitan, katapos han tsunami ha Japan han 2011, nagsurat an sanga nga opisina han Estados Unidos ha mga Regional Building Committee ha Estados Unidos kon may-ada ba “pipira nga kwalipikado nga kabugtoan” nga mahimo makabulig ha pagtukod utro han mga Kingdom Hall ha Japan. Ano an baton? Ha sulod la hin pipira ka semana, haros 600 an nag-aplay ngan umuyon pagkadto ha Japan ha kalugaringon nga gastos! “Naimpres gud kami han reaksyon,” siring han sanga nga opisina han Estados Unidos. Han ginpakianhan han usa nga bugto ha Japan an usa nga boluntaryo tikang ha iba nga nasud kon kay ano nga kinadto hiya ha Japan, hiya binaton: “An kabugtoan ha Japan bahin han ‘amon lawas.’ Inaabat namon an ira kasakit ngan pag-antos.” Tungod han gugma nga andam pagsakripisyo, usahay iginbubutang ha peligro han mga boluntaryo an ira kinabuhi basi buligan an ira igkasi-tumuroo. *—1 Juan 3:16.

¹¹ Gin-aapresyar gihap han mga diri Saksi an aton pagbulig. Pananglitan, katapos hin kalamidad ha Arkansas, E.U.A., han  2013, usa nga peryodiko an nagreport han madagmit nga pagresponde han mga Saksi nga boluntaryo. Ito nagsiring: “Maopay gud ngan sistematiko an pagkaorganisar han mga Saksi ni Jehova ha paghatag hin bulig ha panahon han kalamidad.” Oo, sugad han ginsiring ni apostol Pablo, hura nga ‘naghahatag’ kita ha aton kabugtoan nga nanginginahanglan.

12-14. (a) Kay ano nga importante hinduro an ikatulo nga katuyoan han aton pagbulig nga buruhaton? (b) Ano nga mga kapahayagan an nagpapabug-at han importansya ha pagpadayon han espirituwal nga mga buruhaton?

¹² Ikatulo, basi buligan an mga biktima han kalamidad nga makabalik ha ira espirituwal nga rutina. Kay ano nga importante ini? Hi Pablo nagsiring nga an mga nakarawat hin bulig naaaghat ha pagpahayag hin “damu nga pagpasalamat ha Dios.” (2 Cor. 9:12b) Waray na gud mas maopay nga paagi basi maipahayag han mga biktima an ira pagpasalamat kan Jehova kay ha pagbalik dayon ha ira espirituwal nga rutina! (Fil. 1:10) An The Watchtower han 1945 nagsiring: “Gin-uyonan ni Pablo . . . an pangulekta hin kontribusyon basi makabulig ito ha . . . nanginginahanglan nga mga Kristiano nga kabugtoan nga makakarawat hin materyal nga bulig, ngan salit magagamit an ira panahon ngan kusog ha pakigbahin ha pagpamatuod nga buruhaton nga iginsugo ni Jehova.” Ito gihap an aton katuyoan yana. Kon nagsasangyaw na utro an kabugtoan, napaparig-on nira diri la an ira igkasi-biktima, kondi pati an ira kalugaringon.—Basaha an 2 Corinto 1:3, 4.

¹³ Tagda an pipira nga kapahayagan han mga nabuligan, nakigbahin utro ha pagsangyaw, ngan naparig-on ha pagbuhat hito. Usa nga bugto nga lalaki an nagsiring: “Bendisyon ha amon pamilya nga makagsangyaw. Nangalimtan namon hin madaliay an amon kabaraka samtang nangangalimbasog kami pagliaw ha iba.” Usa nga bugto nga babaye an nagsiring: “Tungod kay nakapokus ako ha espirituwal nga buruhaton, diri ko na nahuhunahuna an resulta han kalamidad. Nagin murayaw an akon hunahuna.” Usa pa nga bugto nga babaye an nagsiring: “Damu nga butang an diri naton kontrolado, pero tungod han ministeryo an amon pamilya nakapabilin nga pokus. Kon nakikiistorya kami ha iba mahitungod han paglaom nga bag-o nga tuna napaparig-on an amon pagsarig nga an ngatanan nga butang babag-uhon.”

¹⁴ An pagtambong ha katirok usa han espirituwal nga buruhaton nga sadang ibalik dayon han kabugtoan nga naapektohan han kalamidad. Tagda an nahitabo kan Kiyoko nga hirani na mag-60 anyos han mag-tsunami ha ira lugar. Waray nabilin ha iya labot la han iya sul-ot nga bado ngan sandal. Diri hiya maaram kon paonan-o mabubuhi. Katapos, usa nga tigurang an nagsiring ha iya nga magkakaada hira katirok ha awto han tigurang. Hi Kiyoko nagsiring: “An tigurang, an iya asawa, usa pa nga sister, ngan ako an nanlingkod ha sulod han awto. Simple la an katirok, pero baga hin milagro, hinngalimtan ko an tsunami. Nagin murayaw an akon hunahuna. Hito nga katirok nakita ko an bili han pakig-upod ha kabugtoan.” Usa pa nga bugto nga babaye an nagkomento mahitungod han iya natambongan nga katirok katapos hin  kalamidad: “Daku gud ito nga bulig ha akon!”—Roma 1:11, 12; 12:12.

15, 16. (a) Ano nga kapulsanan an nakarawat han mga Kristiano ha Corinto ngan ha iba pa nga lugar tungod ha pagbulig ha iba? (b) Paonan-o kita nakarawat hin pariho nga kapulsanan ha pagbulig nga buruhaton yana?

¹⁵ May kalabotan ha ministeryo ha pagbulig, iginsaysay liwat ni Pablo ha mga taga-Corinto an kapulsanan nga makakarawat nira ngan han iba nga Kristiano ha pakigbahin hini nga buruhaton: “Pinaagi han pangamuyo para ha iyo iginpapakita nira [an Judio nga mga Kristiano ha Jerusalem nga nabuligan] an pagpalangga ha iyo tungod han diri-matupngan nga pagkabuotan han Dios ha iyo.” (2 Cor. 9:14) Oo, an pagkamahinatagon han mga taga-Corinto mag-aaghat ha Judio nga mga Kristiano nga mag-ampo para ha kabugtoan ha Corinto ngan ha mga Hentil, ngan magpapahilarom han ira gugma para hito nga kabugtoan.

¹⁶ An kapulsanan ha pagbulig nga ginhisgotan ni Pablo naieksperyensyahan gihap han mga Kristiano yana. May kalabotan hito, an The Watchtower han Disyembre 1, 1945, nagsiring: “Kon an usa nga bahin han dedikado nga katawohan han Dios nagtatagana han panginahanglan han ira iba nga kagrupo, mas naghihilarom an ira pagkaurosa!” Ito mismo an naieksperyensyahan han mga nakikigbahin ha pagbulig yana. “Tungod ha pagbulig, nagin mas duok ako ha akon kabugtoan,” siring hin tigurang nga nagboluntaryo ha lugar nga ginbaha. Usa nga mapasalamaton nga bugto nga nabuligan an nagsiring: “Makikita ha aton pagminagburugto kon ano an aton maieksperyensyahan ha Paraiso nga tuna.”—Basaha an Proberbios 17:17.

17. (a) Paonan-o an mga pulong ha Isaias 41:13 naaplikar ha aton pagbulig nga buruhaton? (b) Pag-unabi hin pipira nga ehemplo kon paonan-o an aton pagbulig nagpapasidungog kan Jehova ngan nagpaparig-on han aton pagkaurosa. (Kitaa liwat an kahon nga “ Pagtagana hin Bulig ha Iba-iba nga Bahin han Kalibotan.”)

 ¹⁷ Ha pag-abot pa la han mga boluntaryo ha lugar han kalamidad, inaabat dayon han kabugtoan didto an pagkatinuod han saad han Dios: “Ako, hi Jehova an imo Dios, makapot han imo too nga kamot, nga masiring ha imo: Ayaw kahadlok; ako mabulig ha imo.” (Isa. 41:13) Katapos makatalwas hin kalamidad, usa nga bugto an nagsiring: “Han makita ko an kadaot, nawarayan ako paglaom, pero sugad hin igin-unat ni Jehova an iya kamot ha akon. Daku gud nga bulig an akon nakarawat ha kabugtoan.” Katapos madaot hin kalamidad an ira lugar, duha nga tigurang an nagsurat para han ira kongregasyon: “Daku nga kasakit an resulta han linog, pero gin-gamit ni Jehova an kabugtoan basi buligan kami. Nababasa la namon hadto an mahitungod ha pagbulig kon may kalamidad, pero yana nakita namon mismo ito.”

18. Ano an mahimo mo buhaton kon karuyag mo makigbahin ha pagbulig nga buruhaton? (Kitaa liwat an kahon nga “ Nabag-o Hito an Iya Kinabuhi.”)

¹⁸ Karuyag mo ba maeksperyensyahan an kalipay ha pagbulig? Kon oo, tigamni nga an mga boluntaryo kasagaran nga tikang ha mga boluntaryo ha pagtukod hin mga Kingdom Hall. Salit pahibaroa an iyo mga tigurang nga karuyag mo umaro hin application form. Usa nga tigurang nga damu na an eksperyensya hini nga buruhaton an nagpahinumdom: “Pakadto la ha lugar nga naapektohan kon nakakarawat ka na hin opisyal nga imbitasyon tikang ha Disaster Relief Committee.” Hito nga paagi, an aton buruhaton ha pagbulig magigin organisado.

19. Paonan-o an mga boluntaryo nakakabulig gud ha pagpamatuod nga kita an tinuod nga mga disipulo han Kristo?

¹⁹ An pagbulig ha panahon han kalamidad usa han makatirigamnan nga paagi nga aton ginsusunod an sugo han Kristo nga ‘maghigugmaay’ ha usa kag usa. Ha pagpakita hin sugad nga gugma, napapamatud-an naton nga kita an tinuod nga mga disipulo han Kristo. (Juan 13:34, 35) Daku nga bendisyon ha aton yana an damu hinduro nga boluntaryo nga nagpapasidungog kan Jehova pinaagi ha pagbulig ha maunungon nga mga nasuporta han Ginhadian han Dios ha panahon han kalamidad!