1. Ano an urusahon ha bisyon ni Esekiel?

ANO daw la kon maeksperyensyahan mo an naeksperyensyahan ni propeta Esekiel mga 25 ka siglo na an naglabay? Handurawa la: Naatubang ka ha haluag ngan nagraranggat nga templo. Usa nga gamhanan nga anghel an naghuhulat ha imo basi ipakita inin makatarag-ob nga lugar! Pagsaka mo ha pito nga balitang, inabot ka ha usa han tulo nga ganghaan. Duro kaurusahon ini nga mga ganghaan. Mga 100 ka piye an kahitaas hini. Ha mga entrada, nakita mo an mga kwarto han gwardya. An mga harigi hito inukitan hin elegante nga mga puno han palma.—Esek. 40:1-4, 10, 14, 16, 22; 41:20.

2. (a) Ano an ginrirepresentaran han templo ha bisyon? (Kitaa liwat an footnote.) (b) Ano an aton mahibabaroan ha mga detalye han ganghaan han templo?

² Ini an espirituwal nga templo ha bisyon ni Esekiel. Detalyado an pagkahulagway hini ni Esekiel salit napuno hini an kapitulo 40 tubtob 48 han iya libro han mga tagna. Ini nga templo nagrirepresentar han kahikayan ni Jehova para ha putli nga pagsingba. An tagsa nga bahin hini may kalabotan ha aton pagsingba hinin kataposan nga mga adlaw. * Ano an ginrirepresentaran han hitaas nga mga ganghaan? Nagpapahinumdom ito nga an nasulod ha kahikayan ni Jehova para ha putli nga pagsingba sadang sumunod han iya hitaas ngan magtadong nga suruklan. Ito liwat an ginrirepresentaran han inukit nga mga puno han palma kay an palma usahay ginagamit han Biblia ha pagrepresentar han katadongan. (Sal. 92:12) Ngan an mga kwarto han gwardya? Matin-aw, nagpapasabot ito nga adton diri natahod ha mga suruklan han Dios diri tutugotan nga makasulod hinin makaruruyag ngan nagtatagana hin kinabuhi nga putli nga pagsingba.—Esek. 44:9.

3. Kay ano nga nagkikinahanglan hin padayon nga pag-uray an mga sumurunod han Kristo?

³ Paonan-o natutuman an bisyon ni Esekiel? Sugad han ginhisgotan ha Kapitulo 2, gin-gamit ni Jehova an Kristo ha pag-uray han iya katawohan tikang han 1914 tubtob ha temprano han 1919. Natapos ba dida hito an pag-uray? Waray! Ha naglabay nga siglo, padayon nga gintipigan han Kristo an baraan nga suruklan ni Jehova ha paggawi. Salit an iya mga sumurunod nagkinahanglan hin padayon nga pag-uray. Kay ano? Kay iya gintitirok an iya mga sumurunod tikang hinin hamubo an moral nga kalibotan, ngan diri naundang hi Satanas ha pangalimbasog ha pagkabig ha ira pabalik ha lapok han imoralidad. (Basaha an 2 Pedro 2:20-22.) Aton  usisahon an tulo nga bahin diin padayon nga gin-uuray an tinuod nga mga Kristiano. Paghisgotan naton an pipira nga pag-uray ha moral, an importante nga tagana basi matipigan nga limpyo an kongregasyon, ngan an kahikayan han pamilya.

4, 5. Ano nga taktika an maiha na nga ginagamit ni Satanas, ngan kay ano nga masisiring nga naglampos ito?

⁴ Tikang pa hadto, importante ha katawohan ni Jehova an moral ngan matadong nga paggawi. Salit ginkarawat nira an mas matin-aw nga mga instruksyon may kalabotan hito. Tagdon naton an pipira hini.

⁵ Seksuwal nga imoralidad. Katuyoan ni Jehova nga magin limpyo ngan makalilipay an seksuwal nga relasyon han mag-asawa. Kondi, hi Satanas nagrarayhak gud ha pagbaliko ngan pagdaot han panhunahuna han tawo may kalabotan hinin presyoso nga regalo, ngan ginagamit niya ito ha pagsulay han katawohan ni Jehova basi mawara nira an pag-uyon han Dios. Naglampos hi Satanas ha paggamit hini nga taktika ha panahon ni Balaam, ngan pursigido hiya nga mas gamiton ini hinin kataposan nga mga adlaw.—Num. 25:1-3, 9; Pah. 2:14.

6. Ano nga panumpa an iginpublikar ha Watch Tower, paonan-o ito gin-gamit, ngan kay ano nga ha urhi waray na ito gamita? (Kitaa liwat an footnote.)

⁶ Basi atohan an mga pangalimbasog ni Satanas, iginpublikar ha Hunyo 15, 1908, nga Watch Tower an panumpa nga ha bahin nasiring: “Ha ngatanan nga panahon ngan ha ngatanan nga lugar, an akon magigin paggawi ha diri ko kasekso kon duduha la kami magigin pariho kon may iba nga tawo.” * Bisan kon diri gin-oobligar ito nga panumpa, ginkarawat ito han damu ngan ira iginpasa an ira ngaran basi ipublikar ha Zion’s Watch Tower. Paglabay hin mga tuig, nakita nga ini nga panumpa, bisan kon nakabulig ha damu, nagin rituwal na la; salit waray na gamita. Kondi, an hitaas nga mga prinsipyo nga ginbasaran hito iginpadayon.

7. Ano nga problema an ginhisgotan han The Watchtower han 1935, ngan ano an suruklan nga ginparig-on utro hito?

⁷ Nagtikaduro an pag-atake ni Satanas. An Marso 1, 1935, nga The Watchtower naghisgot hin nagtitikadaku nga problema ha katawohan han Dios. May mga naghunahuna nga kon makikigbahin hira ha ministeryo, puydi na nira diri iaplikar an mga suruklan ni Jehova ha moral ha ira pribado nga kinabuhi. Kondi an The Watchtower prangka nga nagsiring: “Sadang hinumdoman han usa nga diri la an pakigbahin ha pagsangyaw nga buruhaton an ginkikinahanglan. An mga saksi ni Jehova an iya mga representante, ngan obligasyon nira nga magin angayan nga representante ni Jehova ngan han iya ginhadian.” Katapos, naghatag ito hin klaro nga sagdon ha pag-asawa ngan hin mga suruklan ha moral, tungod hito nabuligan hira han Dios nga ‘makapalagiw ha imoralidad.’—1 Cor. 6:18.

8. Kay ano nga pauroutro nga ginpabug-atan han The Watchtower an bug-os nga kahulogan han Griego nga pulong para ha seksuwal nga imoralidad?

⁸ Hinin naglabay pa la nga mga dekada, pauroutro nga ginpabug-atan han The Watchtower an husto nga kahulogan han por·neiʹa—an pulong nga gin-gamit ha Griego nga Kasuratan para ha seksuwal nga imoralidad. Diri la ito nagtutudlok ha aktuwal nga pakighilawas. Lugod, nag-uupod ito han magkalain-lain nga imoral nga buhat ngan han ngatanan nga kalaw-ayan nga ginhihimo ha  balay han prostitusyon. An mga sumurunod han Kristo ginpapanalipdan tikang ha seksuwal nga imoralidad nga ginbubuhat han damu ha kalibotan yana.—Basaha an Efeso 4:17-19.

9, 10. (a) Ano nga isyu ha moral an ginhisgotan han The Watchtower han 1935? (b) Ano an timbang nga katutdoan han Biblia may kalabotan ha de-alkohol nga irimnon?

⁹ Sayop nga paggamit han de-alkohol nga irimnon. An Marso 1, 1935, nga gowa han The Watchtower nagbangon hin usa pa nga isyu ha moral: “Naobserbaran liwat nga may mga nakikigbahin ha ministeryo ngan nagbubuhat hin iba nga toka ha organisasyon bisan kon nakainom hin [de-alkohol nga irimnon]. Ano an husto nga paggamit han bino sumala ha Kasuratan? Husto ba an paggamit hin bino bisan kon nakakaapekto na ito ha pag-alagad han usa ha organisasyon han Ginoo?”

¹⁰ Sugad nga baton, ginhisgotan an timbang nga pagtagad han Pulong han Dios ha de-alkohol nga irimnon. Waray igdiri han Biblia an kasadangan nga paggamit hin bino ngan iba pa nga de-alkohol nga irimnon, kondi ginkukondenar gud hito an paghubog. (Sal. 104:14, 15; 1 Cor. 6:9, 10) May kalabotan ha pakigbahin ha sagrado nga pag-alagad samtang nakainom, maiha na nga ginpapahamangnoan an mga surugoon han Dios mahitungod han mga anak nga lalaki ni Aaron nga ginpatay han Dios tungod ha paghalad hin lain nga kalayo ha altar han Dios. Iginpapakita han asoy kon ano an posible nga rason han ira pakasayop, tungod kay ha urhi an Dios nagsugo nga an ngatanan nga saserdote diri uminom hin de-alkohol nga irimnon samtang nakikigbahin ha sagrado nga mga buruhaton. (Leb. 10:1, 2, 8-11) Ha pagsunod hito nga prinsipyo, an mga sumurunod han Kristo yana diri nainom hin de-alkohol nga irimnon samtang nakikigbahin ha sagrado nga pag-alagad.

11. Kay ano nga bendisyon ha katawohan han Dios an pagkaada mas klaro nga pagsabot mahitungod han alkoholismo?

¹¹ Hinin naglabay nga mga dekada, an mga sumurunod han Kristo ginbibendisyonan hin mas klaro nga pagsabot mahitungod han alkoholismo, o pagkagiyan ha de-alkohol nga irimnon. Tungod han napapanahon nga espirituwal nga pagkaon, damu an nabuligan nga malamposan an alkoholismo ngan magkaada utro kontrol ha ira kalugaringon. Damu liwat an nabubuligan nga makalikay hito. Diri gud naton sadang tugotan nga an pag-abuso ha de-alkohol nga irimnon magwara han aton dignidad, pamilya, ngan labaw ha ngatanan, han aton pribilehiyo ha pakigbahin ha putli nga pagsingba kan Jehova.

12. Paonan-o gintatagad han mga sumurunod han Kristo an paggamit han tabako bisan antes pa magtikang an kataposan nga mga adlaw?

¹² Tabako. Antes pa magtikang an kataposan nga mga adlaw, negatibo na an mga sumurunod han Kristo ha tabako. Nahinumdoman ni Charles Capen, usa nga edaran nga bugto, an ira siyahan nga pagkita ni Charles Taze Russell ha pag-ikatarapos han ika-19 ka siglo. Trese anyos hiya hadto. Hiya ngan an iya tulo nga kabugtoan nga kalalakin-an nakadto ha hagdan han Bible House ha Allegheny, Pennsylvania. Pag-agi ni Russell, nagpakiana ito: “Nagsisigarilyo ba kamo? Baga hin nakabaho man akon hin asó hin sigarilyo.” Ginpasarig nira hiya nga diri hira naninigarilyo. Sigurado nga naisilsil ha ira kon paonan-o gintatagad ni Bugto Russell an pagsigarilyo. Ha Watch Tower han Agosto 1, 1895, hi Bugto Russell nagkomento may kalabotan han 2 Corinto 7:1: “Diri  ko makita kon paonan-o makakahatag hin himaya ha Dios, o ha kalugaringon, kon an usa nga Kristiano gumamit hin tabako ha bisan ano nga porma. . . . Imposible hunahunaon nga an aton Ginoo naninimaho hin asó hin tabako o nagbubutang ha iya baba hin bisan ano nga mahugaw.”

13. Ano nga pag-uray ha moral an nahitabo han 1973?

¹³ Han 1935, gintawag han The Watchtower an tabako nga “an mahugaw nga banwa” ngan nagsiring nga waray bisan hin-o nga nagkikisam o naghihithit hito an makakapabilin nga membro han pamilya han Bethel o makakag-alagad nga representante han organisasyon han Dios sugad nga payunir o nagbibiyahe nga paramangno. Han 1973, nagkaada dugang nga pag-uray ha moral. An The Watchtower han Hunyo 1 nagsiring nga waray Saksi ni Jehova an makakagpabilin nga may maopay nga reputasyon ha kongregasyon kon igpapadayon niya inin makamaratay, mahugaw, ngan waray gugma nga bisyo. Katapos, an mga nadiri pagbaya hinin sayop nga paggamit han tabako ginpaiwas ha kongregasyon. * Usa na liwat ini nga importante nga paggios han Kristo ha pag-uray han iya sumurunod.

14. Ano an suruklan han Dios may kalabotan ha dugo, ngan paonan-o nagin popular an pag-abuno hin dugo?

¹⁴ Sayop nga paggamit han dugo. Ha panahon pa ni Noe, nagsiring na an Dios nga sayop an pagkaon han dugo. Iya gin-utro ito ha Balaud nga iya iginhatag ha Israel, ngan ha pariho nga paagi iya ginsugo an Kristiano nga kongregasyon nga “maglikay . . . ha dugo.” (Buh. 15:20, 29; Gen. 9:4; Leb. 7:26) Diri urusahon nga hinin moderno nga panahon nakabiling hi Satanas hin paagi nga matalapas han damu ini nga sugo. Han ika-19 ka siglo, nag-eksperimento an mga doktor ha paggamit han dugo ha pagtambal, ngan han nadiskobrehan an mga blood type, nagin popular an paggamit hito ha pagtambal. Han 1937, nagtikang an pagkolekta hin dugo ngan pagtipig hito ha mga blood bank, ngan nagin mas popular pa gud an pag-abuno durante han Girra ha Kalibotan II. Waray pag-iha, nagin ordinaryo na la ito ha bug-os nga kalibotan.

15, 16. (a) Ano an disposisyon han mga Saksi ni Jehova may kalabotan ha pag-abuno hin dugo? (b) Ano nga bulig an igintatagana ha mga sumurunod han Kristo may kalabotan ha pag-abuno hin dugo ngan mga alternatibo ha dugo, ngan ano an resulta hito?

¹⁵ Bisan pa han 1944, nagsiring na an The Watchtower nga an pagpaabuno hin dugo pariho la ha pagkaon hito. Han sumunod nga tuig, mas ginparig-on ngan ginpatin-aw ito nga Kasuratanhon nga prinsipyo. Han 1951, iginpublikar an lista hin mga pakiana ngan baton basi buligan an katawohan han Dios ha ira pakiistorya ha mga medical professional. Ha bug-os nga kalibotan, an matinumanon nga mga sumurunod han Kristo nasunod hito nga prinsipyo bisan pa han pagtamay, pagkontra, ngan direkta nga paglutos. Kondi padayon nga gin-gagamit han Kristo an iya organisasyon ha pagtagana han ginkikinahanglan nga bulig. Nagpublikar ito hin detalyado ngan ginsaliksik hin maopay nga mga brosyur ngan mga artikulo.

¹⁶ Han 1979, nagtikang pagbisita an mga tigurang ha mga hospital basi buligan an mga doktor nga mas masabtan an Kasuratanhon nga basihan han aton gintotoohan, ngan an mga alternatibo ha dugo. Han 1980, an mga tigurang ha 39 nga syudad ha Estados Unidos kinarawat hin espesyal nga pagbansay para hini  nga toka. Ha urhi, gin-aprobaran han Nagmamando nga Lawas an kaestablisar hin mga Hospital Liaison Committee ha bug-os nga kalibotan. Nagmalampuson ba ini? Yana, yinukot nga medical professional—doktor, surgeon, ngan anesthesiologist—an nakooperar ha mga pasyente nga Saksi pinaagi ha pagtahod han aton desisyon nga magpatambal nga diri nagamit hin dugo. Nagtitikadamu nga hospital an nagtatagana hin pagtambal nga diri nagamit hin dugo, ngan gintatagad pa ngani ito han iba nga an pinakahitaas nga klase hin pagtambal. Diri ba makalilipay hunahunaon kon paonan-o ginpapanalipdan ni Jesus an iya mga sumurunod ha pangalimbasog ni Satanas ha pagdaot ha ira?—Basaha an Efeso 5:25-27.

17. Paonan-o naton maipapakita nga ginpapabilhan naton an pag-uray han Kristo ha iya mga sumurunod?

¹⁷ Maopay nga pakianhan naton an aton kalugaringon, ‘Ginpapabilhan ba naton an paagi han pag-uray han Kristo ha iya mga sumurunod pinaagi ha pagbansay ha aton nga sundon gud an hitaas nga suruklan ni Jehova ha moral?’ Kon oo, diri naton hingalimtan nga pirme nangangalimbasog hi Satanas nga ipahirayo kita kan Jehova ngan kan Jesus pinaagi ha pag-impluwensya ha aton nga balewarayon an suruklan han Dios ha moral. Basi maatohan ito, an organisasyon ni Jehova padayon ngan mahigugmaon nga nagpapahamangno ngan nagpapahinumdom mahitungod han sayop nga  pamaagi hini nga kalibotan. Hinaot magpabilin kita nga alerto, makinarawaton, ngan masinugtanon hiton mapulsanon nga mga sagdon.—Prob. 19:20.

18. Ano nga matin-aw nga mga pahinumdom an iginhahatag ha aton han bisyon ni Esekiel may kalabotan hadton tinuyo nga nagtatalapas han mga suruklan han Dios?

¹⁸ An ikaduha nga bahin han pag-uray ha moral nag-uupod han pamaagi ha pagtipig han kongregasyon nga limpyo. Makasurubo, diri tanan han kinarawat han suruklan ni Jehova ha paggawi ngan nagdedikar han ira kalugaringon an nagpabilin ha ira desisyon. An iba nagbag-o ngan tinuyo nga nagtalapas hito nga suruklan. Ano an sadang himoon ha ira? Basi mabaton ito, makakabulig an bisyon ni Esekiel mahitungod han espirituwal nga templo nga ginhisgotan ha tinikangan hini nga kapitulo. Nahinunumdoman mo ba an higtaas nga ganghaan? Ha kada entrada, may mga kwarto han gwardya. Ginpanalipdan han mga gwardya an templo basi diri makasulod an “diri sinirkumsisyonan ha kasingkasing.” (Esek. 44:9) Klaro nga pahinumdom ini nga an putli nga pagsingba pribilehiyo para la hadton nagkikinabuhi uyon han putli nga suruklan ni Jehova ha paggawi. Ha pariho nga paagi, an pribilehiyo ha pagsingba kaupod han mga igkasi-Kristiano diri abrido para ha ngatanan.

19, 20. (a) Paonan-o hinay-hinay nga ginbubuligan han Kristo an iya mga sumurunod ha pag-uray han paagi ha pagdumara han mga kaso may kalabotan han seryoso nga pakasala? (b) Ano an tulo nga rason ha pagpaiwas hadton diri mabinasulon nga nagbubuhat hin sala?

¹⁹ Han 1892, an Watch Tower nagsiring nga “obligasyon naton paiwason (sugad nga mga Kristiano) adton nagninigar, direkta man o diri direkta, nga iginhatag han Kristo an iya kalugaringon sugad nga lukat [katugbang nga kantidad] para ha ngatanan.” (Basaha an 2 Juan 10.) Han 1904, an libro nga The New Creation nagsiring nga adton nagpapadayon ha sayop nga buhat makakadaot ha kongregasyon. Hadto, bug-os nga kongregasyon an nakikigbahin ha “mga pagbista” han mga kaso hin seryoso nga pakasala. Kondi, talagsa gud la an sugad nga panhitabo. Han 1944, iginpakita han The Watchtower nga an responsable la nga kabugtoan nga kalalakin-an an sadang manginano han sugad nga mga kaso. Han 1952, iginpublikar han The Watchtower an Kasuratanhon nga paagi ha pagpanginano han hudisyal nga mga kaso, ngan ginpabug-atan an importante nga rason ha pagpaiwas han mga nakasala nga diri nagbabasol—an pagtipig han kongregasyon nga limpyo.

²⁰ Han sumunod nga mga dekada, padayon nga ginbuligan han Kristo an iya mga sumurunod basi magin matin-aw ngan mauray an pagdumara han mga kaso han seryoso nga pakasala. An mga tigurang ginbansay hin maopay ha paagi ni Jehova basi makagpakita hira hin hustisya ngan kalooy kon nag-aasikaso hin hudisyal nga kaso. Yana, klaro nga may diri maminos tulo nga rason ha pagpaiwas han nakasala nga diri nagbabasol, basi: (1) diri mapasiparahan an ngaran ni Jehova, (2) mapanalipdan an kongregasyon tikang ha nakakadaot nga impluwensya han usa nga seryoso nga nakasala, ngan (3) mapagios an nakasala nga magbasol kon posible.

21. Kay ano nga masisiring nga an kahikayan ha pagpaiwas bendisyon gud ha katawohan han Dios?

 ²¹ Nakikita mo ba kon paonan-o nagin bendisyon ha mga sumurunod han Kristo yana an kahikayan ha pagpaiwas ha kongregasyon? Ha kadaan nga Israel, an mga nakasayop agsob nga maraot nga impluwensya ha nasud, usahay mas damu pa ngani hira kay han nahigugma kan Jehova ngan nagbubuhat hin husto. Tungod hini, agsob nga napapasiparahan han nasud an ngaran ni Jehova salit nawawara hito an iya pag-uyon. (Jer. 7:23-28) Kondi yana, espirituwal nga kalalakin-an ngan kababayin-an an mga nag-aalagad kan Jehova. Tungod kay ginpapaiwas an mga nakabuhat hin sayop nga diri nagbabasol, diri hira nagagamit ni Satanas sugad nga “hinganiban” ha pagdaot ngan paghugaw han kongregasyon. Hito nga paagi, nalilimitahan an ira impluwensya. Salit sugad nga grupo, nakakasiguro kita nga natitipigan naton an pag-uyon ni Jehova. Hinumdumi nga nagsaad hi Jehova: “Waray hinganiban nga ginhitsura patok ha imo nga mauswag.” (Isa. 54:17) Ginsusuportahan ba naton an mga tigurang nga nagpapas-an han mabug-at nga responsabilidad ha pag-asikaso han hudisyal nga mga kaso?

22, 23. Ano an ginpapabilhan naton ha aton mga igkasi-Kristiano ha temprano han ika-20 ka siglo, kondi kay ano nga kinahanglan nira nga magin mas timbang may kalabotan ha pamilya?

²² An ikatulo nga bahin diin padayon nga gin-uuray han Kristo an iya mga sumurunod amo an may kalabotan ha pag-asawa ngan pagpamilya. Nauuray ba an aton pagtagad ha pamilya ha paglabay han mga tuig? Oo. Pananglitan, kon nababasa naton an mahitungod han mga surugoon han Dios ha temprano han ika-20 ka siglo, naiimpres ngan nahipapausa kita han ira pagin andam ha pagsakripisyo. Ginpapabilhan naton an ira pag-una han sagrado nga pag-alagad ha ira kinabuhi. Kondi matin-aw, kinahanglan la gihap nira magin mas timbang. Ha ano nga paagi?

²³ Hadto, ordinaryo la ha kabugtoan nga kalalakin-an an pagkarawat hin toka ha ministeryo o ha pagbiyahe nga buruhaton bisan kon nabubulag hira ha ira pamilya ha sulod hin mga bulan. May mga kahimtang pa ngani nga mas ginpapabug-atan an diri pag-asawa kay han ginsisiring han Kasuratan, samtang gutiay la an igintututdo kon paonan-o mapaparig-on an Kristiano nga pag-asawa. Sugad la ba gihap hito an kahimtang han mga sumurunod han Kristo yana? Diri!

24. Paonan-o ginbuligan han Kristo an iya magtinumanon nga sumurunod basi magkaada hira mas timbang nga pagtagad ha pag-asawa ngan pagpamilya?

²⁴ Yana, diri ginpapabay-an han usa nga may teokratiko nga toka an iya obligasyon ha pamilya. (Basaha an 1 Timoteo 5:8.) Gawas pa hito, ginsisiguro han Kristo nga an iya mga sumurunod ha tuna padayon nga nakarawat hin mapulsanon ngan timbang nga Kasuratanhon nga sagdon may kalabotan ha pag-asawa ngan pagpamilya. (Efe. 3:14, 15) Han 1978, iginpublikar an libro nga Making Your Family Life Happy. Paglabay hin mga 18 ka tuig, iginpublikar an libro nga An Sekreto han Kalipayan ha Pamilya. Dugang pa, mababasa ha An Barantayan an mga artikulo nga gindisenyo ha pagbulig ha mag-asawa nga maiaplikar an mga prinsipyo ha Biblia ha ira pag-asawa.

25-27. Ha ano nga paagi kinarawat hin dugang nga pagtagad an panginahanglan han mga bata ngan mga tin-edyer ha paglabay han panahon?

 ²⁵ Kumusta man an mga kabataan? Ha paglabay han mga tuig, dugang nga gintagad an ira panginahanglan. Hadto pa man, an organisasyon ni Jehova nagtatagana na para ha ira, anoman an ira edad. Kondi kon sugad la hin turo ito hadto, yana sugad na hin nagpapadayon nga agos. Pananglitan, an “Juvenile Bible Study” gumawas ha The Golden Age tikang han 1919 tubtob han 1921. Katapos, iginpagowa liwat an The Golden Age ABC nga brosyur han 1920 ngan an Children nga libro han 1941. Ha dekada han 1970, iginrelis an mga libro nga Pagpamati ha Daku nga Magturutdo, Your Youth—Getting the Best Out of It, ngan An Akon Libro han mga Istorya ha Biblia. Han 1982, gumowa ha Awake! an serye nga “Young People Ask,” katapos han 1989 an libro nga Questions Young People Ask—Answers That Work.

²⁶ Yana, may-ada kita duha nga napapanahon nga volume han Young People Ask, ngan an mga serye hito padayon nga nababasa ha aton Web site nga jw.org. May-ada liwat kita libro nga Mahibaro Tikang ha Bantogan nga Magturutdo. Ha aton Web site, damu an maruruyagan han kabataan. Aada an mga Bibla-character card, activity para ha pag-aram ha Biblia han mga tin-edyer ngan mga bata,  puzzle, video, igindrowing nga mga istorya ha Biblia, pati mga leksyon ha Biblia para ha kabataan nga tres anyos o minos pa. Matin-aw, waray magbag-o an pagtagad han Kristo ha kabataan tikang pa han nagtirok hiya hin kabataan ha iya mga butkon han siyahan nga siglo. (Mar. 10:13-16) Karuyag niya nga umabat hira nga hinigugma hira ngan gin-aataman gud ha espirituwal.

²⁷ Karuyag liwat ni Jesus panalipdan an kabataan. Samtang mas nagtitikaraot an moralidad han kalibotan, mas nagtitikakalyap an pag-abuso ha kabataan. Salit, iginpublikar an klaro ngan prangka nga mga barasahon basi buligan an mga kag-anak ha pagpanalipod han ira mga anak tikang hito nga pag-abuso. *

28. (a) Ano an aton kinahanglan buhaton basi makapabilin kita ha putli nga pagsingba, sugad han igin-iilustrar han bisyon ni Esekiel han templo? (b) Ano nga determinasyon an imo gintitipigan yana?

²⁸ Diri ba makalilipay hunahunaon kon paonan-o padayon nga gin-uuray han Kristo an iya mga sumurunod pinaagi ha pagbansay ha ira ha pagtahod, pagkinabuhi, ngan pagpahimulos han mga suruklan ni Jehova ha moral? Tagdon naton utro an templo ha bisyon ni Esekiel. Hinumdumi an higtaas nga ganghaan hito. Oo, espirituwal ito nga templo, diri pisikal. Kondi, tinuod gud ba ito ha aton? Basi makasulod hito, diri igo na an pagtambong ha Kingdom Hall o pag-abri hin Biblia o pagbalay-balay ha ministeryo. Pisikal la ito nga mga buhat. Bisan an salingkapaw makakabuhat hito, pero diri ito magtutugot ha iya nga makasulod ha templo ni Jehova. Kondi, kon ginbubuhat naton ito samtang nagkikinabuhi uyon han higtaas nga suruklan ni Jehova ha moral ngan nakikigbahin ha putli nga pagsingba nga may husto nga motibo, masisiring nga nakasulod na kita ngan nag-aalagad ha pinakasagrado nga lugar—an kahikayan ni Jehova nga Dios para ha putli nga pagsingba! Hinaot padayon nga pabilhan naton iton presyoso nga pribilehiyo. Padayon liwat nga buhaton naton an aton bug-os nga mahihimo basi maipakita an pagkabaraan ni Jehova pinaagi ha pagsunod han iya matadong nga mga suruklan!