1, 2. An pagkaada ba mga problema ha pag-asawa nagpapasabot nga pakyas an pag-asawa? Isaysay.

AN PAG-ASAWA regalo tikang kan Jehova. Puydi hito himoon nga mas malipayon an kinabuhi han usa. Pero an tagsa nga pag-asawa magkakaada mga problema. Bangin pa ngani an mga problema baga hin waray gud kataposan, ngan an bana ngan asawa bangin umabat nga diri na hira sugad kaduok han una.

² Diri kita angay mahipausa kon an aton pag-asawa may mga problema ha panapanahon. Pero an pagkaada mga problema diri nagpapasabot nga pakyas an aton pag-asawa. Bisan an mga mag-asawa nga may dagku gud nga problema nakabiling hin mga paagi nga maibalik an ira maopay nga relasyon ngan magin mas marig-on an ira pag-asawa. Paonan-o?

3, 4. Ano an usahay nahitatabo ha pag-asawa?

³ Ha pag-asawa nagtatampo an duha nga magkaiba nga indibiduwal, nga an kada tagsa iba an mga naruruyagan ngan nadidirian, mga ideya, ngan mga paagi ha pagbuhat han mga butang. Sugad man, an bana ngan  asawa bangin magkaiba an gintikangan o kultura. Ginkikinahanglan an panahon ngan pangalimbasog basi makilala ngan masabtan hin maopay han mag-asawa an usa kag usa.

⁴ Ha paglabay han panahon, an bana ngan asawa bangin magpokus ha ira kalugaringon nga mga buruhaton salit hinay-hinay hira nga nagtitikahirayo ha usa kag usa. Baga hin may-ada na hira iya-iya nga kinabuhi. Ano an makakabulig ha ira nga magin mas duok?

5. (a) Ano an makakabulig ha usa nga Kristiano nga magin mas duok ha iya padis? (b) Sumala ha Hebreo 13:4, ano an angay naton magin panhunahuna ha pag-asawa?

⁵ Hi Jehova nagtatagana hin maopay gud nga sagdon nga makakabulig ha imo ngan ha imo padis nga magin mas duok ha iya ngan ha usa kag usa. (Salmo 25:4; Isaias 48:17, 18) Nasiring hiya ha aton: “Pasidunggan han ngatanan an pag-asawa.” (Hebreo 13:4) Presyoso ngan birilhon an usa nga butang nga gintatagad mo nga dungganon. Imo ito ginpapanalipdan ngan diri ginbabalewaray. Ito an karuyag ni Jehova nga magin panhunahuna naton ha pag-asawa.

6. Ano an iginsusumat ha aton han Mateo 19:4-6 mahitungod ha panhunahuna ni Jehova ha pag-asawa?

⁶ Hi Jehova an nagkasal ha siyahan nga mag-asawa. An iya Anak nga hi Jesus nagsiring: “Waray ba niyo mabasa nga hiya nga naglarang ha ira ha tinikangan naghimo ha ira nga lalaki ngan babaye ngan nagsiring: ‘Tungod hini babayaan han lalaki an iya tatay ngan an iya nanay ngan matampo ha iya asawa, ngan an  duha magigin usa nga unod’? Tungod hito diri na hira duha, kondi usa nga unod. Salit an gintampo han Dios diri pagbulagon han bisan hin-o nga tawo.” (Mateo 19:4-6) Tikang ha tinikangan, katuyoan ni Jehova nga magin permanente an pag-asawa. Karuyag niya nga an mga pamilya magin duok ngan malipayon ngan urupod nga mag-enjoy ha kinabuhi.

7. Paonan-o mapaparig-on han bana ngan asawa an ira pag-asawa?

⁷ Pero an mga mag-asawa yana naatubang hin mas damu nga istres ngan presyur kay han naglabay. Usahay duro gud an presyur salit naghuhunahuna hira nga an ira pag-asawa diri na masasalbar, ngan nasurender na hira. Pero mabubuligan kita kon masasabtan naton an panhunahuna ni Jehova ha pag-asawa.​—1 Juan 5:3.

8, 9. (a) San-o naton angay sundon an giya ni Jehova ha pag-asawa? (b) Paonan-o naton maipapakita nga presyoso ha aton an aton pag-asawa?

 ⁸ An giya ni Jehova pirme para ha aton kaopayan. Sugad han aton nahisgotan, nagsasagdon hiya ha aton: “Pasidunggan . . . an pag-asawa.” (Hebreo 13:4; Eclesiastes 5:4) Kon susundon naton an giya ni Jehova bisan ha makuri nga kahimtang, sigurado nga magpapahimulos kita.​—1 Tesalonica 1:3; Hebreo 6:10.

⁹ Tungod kay presyoso ha aton an aton pag-asawa, karuyag naton likayan an pagbuhat o pagyakan hin bisan ano nga makakadaot hito. Lugod, karuyag naton nga mas parig-unon an aton relasyon ha aton padis. Paonan-o naton ito mahihimo?

10, 11. (a) Ano nga daku nga problema an nahitatabo ha pipira nga pag-asawa? (b) Kay ano nga importante an paagi han aton pagyakan ha aton bana o asawa?

¹⁰ May iba-iba nga paagi nga an usa makakapasakit ha iya padis. Maaram kita nga diri gud angay pasakitan han mga Kristiano an ira padis ha pisikal o buhaton an bisan ano nga makakadaot ha ira. Pero bangin mapasakitan naton an usa kag usa pinaagi han aton mga pulong. An mga pulong puydi magin armas. Usa nga babaye an nagsiring: “Ginpapasakitan ako han akon bana pinaagi hin mga pulong. Oo, waray mga bun-og ha akon lawas, pero an iya pirme pagyakan hin nakakasakit nga mga pulong sugad han ‘Nakakapabug-at ka la!’ ngan ‘Waray ka pulos!’ nagbilin hin mga ulat ha akon kasingkasing.” Usa nga bana an nagsiring nga pirme hiya ginmiminos han iya asawa pinaagi han iya mga  yakan ngan bisan ano la an iginbabansag ha iya. Hiya nagsiring: “Diri ko kaya ig-istorya ha iba an iya mga ginyayakan ha akon. Salit diri ako nakikiistorya ha iya ngan maiha ako umuli tikang ha trabaho. Mas maopay ko pa didto kay han umuli ha balay.” Komon yana an nakakadaot nga panyakan, an pagyakan hin nakakasakit ngan malain nga mga pulong nga nagriresulta hin kasakit ha emosyon.

¹¹ Kon an bana ngan asawa nagyayakan hin nakakasakit nga mga pulong ha usa kag usa, nagriresulta ito hin mga samad ha emosyon nga maiha mag-opay. Klaro nga diri ito an karuyag ni Jehova nga magin pagtratar han bana ngan asawa ha usa kag usa. Pero posible nga diri ka maaram nga napapasakitan mo na ngay-an an imo padis. Bangin ha imo pag-abat buotan ka ha imo padis, pero ano ba an iya inaabat? Kon may ginsiring ka nga nakasakit ha iya, andam ka ba magbag-o?​—Galacia 5:15; basaha an Efeso 4:31.

12. Ano an mahimo makaapekto ha relasyon kan Jehova han usa nga inasaw-an?

¹² Importante kan Jehova an paagi han imo pagyakan ha imo padis, ha publiko man o ha pribado. (Basaha an 1 Pedro 3:7.) An Santiago 1:26 nagpapahinumdom ha aton: “Kon an bisan hin-o nga tawo naghuhunahuna nga magsiringba hiya han Dios pero diri ginkukontrol an iya dila, ginlilimbongan niya an iya kasingkasing, ngan waray pulos an iya pagsingba.”

13. Ano an lain nga paagi nga mahimo mapasakitan han usa an iya padis?

¹³ May iba pa nga mga paagi nga an mag-asawa angay magin sensitibo ha pagbati han usa kag usa. Pananglitan, ano an aabaton han imo padis kon maghahatag ka  hin daku nga panahon ha iba? Bisan kon bangin maopay an rason, sugad han pag-upod ha ministeryo o pagbulig ha problema, masasakitan ba an imo padis? Usa nga Kristiano nga asawa an nagsiring: “Nasasakitan ako kon napapansin ko nga an akon bana naghahatag hin daku gud nga panahon ngan atensyon ha lain nga sister ha kongregasyon. Pag-abat ko minos ako.”

14. (a) Ano nga basihan nga kamatuoran an aton nahibabaroan ha Genesis 2:24? (b) Ano an angay naton ipakiana ha aton kalugaringon?

¹⁴ Sugad nga mga Kristiano, may mga responsabilidad kita ha aton mga kag-anak ngan ha kabugtoan ha aton kongregasyon. Bisan pa hito, han nag-asawa kita  an aton na nangunguna nga responsabilidad amo an aton bana o asawa. Hi Jehova nagsiring nga an bana “matampo ha iya asawa.” (Genesis 2:24) Kinahanglan importante gud ha aton an inaabat han aton padis. Pakianhi an imo kalugaringon: ‘Iginhahatag ko ba ha akon padis an panahon, atensyon, ngan gugma nga iya ginkikinahanglan ngan angay ha iya?’

15. Kay ano nga angay likayan han inasaw-an nga mga Kristiano nga magin duok hinduro ha diri nira bana o asawa?

¹⁵ Kon magigin duok kita hinduro ha diri naton bana o asawa, magigin problema ito ha aton pag-asawa. Posible nga maruyag na kita ha iya ngan magkaada romantiko nga pagbati ha iya. (Mateo 5:28) Posible nga magtubo ito nga pagbati ngan magin hinungdan nga may mabuhat ka nga diri magpapasidungog han iyo pag-asawa.

16. Ano an iginsusugo han Biblia mahitungod ha pag-asawa?

¹⁶ Katapos sumiring: “Pasidunggan . . . an pag-asawa,” an Biblia nasiring: “Diri paghugawan an higdaan han mag-asawa, kay huhukman han Dios an mga tawo nga nagbubuhat hin seksuwal nga imoralidad ngan mga nag-aadulteryo.” (Hebreo 13:4) Dinhi, “an higdaan han mag-asawa” nagtutudlok ha seksuwal nga relasyon han bana ngan asawa. (Proberbios 5:18) Paonan-o naton maipapakita nga ginrirespeto naton ito nga relasyon ngan diri naton ito ginhuhugawan?

17. (a) Ano an panhunahuna han damu nga tawo yana mahitungod ha pag-adulteryo? (b) Ano an angay nga magin panhunahuna han mga Kristiano ha pag-adulteryo?

¹⁷ An iba nga mga tawo yana naghuhunahuna nga  waray sayop ha pagin diri maunungon ha ira padis. Diri kita angay magpaimpluwensya hito nga disposisyon. Hi Jehova klaro nga nasiring nga nangangalas hiya ha seksuwal nga imoralidad ngan pag-adulteryo. (Basaha an Roma 12:9; Hebreo 10:31; 12:29) Kon makikighilawas kita ha diri naton bana o asawa, mahuhugawan naton an aton pag-asawa. Ipapakita naton nga diri naton ginrirespeto an mga suruklan ni Jehova, ngan madadaot naton an aton relasyon ha iya. Salit kinahanglan likayan naton bisan an siyahan nga pitad nga mahimo magresulta ha pag-adulteryo. Nag-uupod ini han paglikay nga magpantasya mahitungod ha iba.​—Job 31:1.

18. (a) Kay ano nga an pag-adulteryo pariho ha pagsingba ha buwa nga mga dios? (b) Ano an panhunahuna ni Jehova ha pag-adulteryo?

¹⁸ Ha kadaan nga Israel ilarom han Balaud ni Moises, an pag-adulteryo seryoso gud nga sala, sugad kaseryoso han pagsingba ha buwa nga mga dios. Pariho kamatayon an sirot hito. (Levitico 20:2, 10) Ha ano nga paagi an pag-adulteryo pariho ha pagsingba ha buwa nga mga dios? Kon an usa nga Israelita nagsingba ha buwa nga mga dios, waray niya tumana an iya saad nga magin matinumanon kan Jehova. Kon nag-adulteryo hiya, waray niya tumana an iya saad nga magin maunungon ha iya padis. (Exodo 19:5, 6; Deuteronomio 5:9; basaha an Malakias 2:14.) Klaro nga hadto, ha panhunahuna ni Jehova seryoso gud nga sala an pag-adulteryo.

19. Ano an makakabulig ha aton nga magin determinado nga diri mag-adulteryo?

¹⁹ Kumusta man yana? Bisan kon diri na kita ilarom  han Balaud ni Moises, waray magbag-o an panhunahuna ni Jehova ha pag-adulteryo. Sugad la nga diri gud kita magsisingba ha buwa nga dios, diri gud liwat kita angay nga magin diri maunungon ha aton padis. (Salmo 51:1, 4; Colosas 3:5) Kay kon bubuhaton naton ito, diri naton mapapasidunggan an aton pag-asawa ngan an aton Dios, hi Jehova.​—Kitaa an Endnote 26.

20. Paonan-o an kinaadman magigin mapulsanon ha pag-asawa?

²⁰ Paonan-o mo mas mapaparig-on an imo pag-asawa? An Pulong han Dios nasiring: “Pinaagi han kinaadman an usa nga balay natutukod, ngan pinaagi han husto nga pagturotimbang ginpaparig-on ito.” (Proberbios 24:3) An usa nga balay mahimo magin diri talwas ngan diri komportable o mahimo ito magin talwas ngan komportable. Pariho liwat hito an pag-asawa. Sisiguruhon han maaramon nga tawo nga an iya pag-asawa marig-on, maopay, ngan makalilipay.

21. Paonan-o an kahibaro makakabulig nga magin mas marig-on an pag-asawa?

²¹ Mahitungod hito nga balay, an Biblia padayon nga nasiring: “Pinaagi han kahibaro an mga kwarto hito ginpupuno han ngatanan nga klase hin birilhon ngan makaruruyag nga mga bahandi.” (Proberbios 24:4) An imo nahibabaroan ha Pulong han Dios makakabulig nga magin mas maopay an imo pag-asawa. (Roma 12:2; Filipos 1:9) Kon magkaupod nga ginbabasa niyo nga mag-asawa an Biblia ngan an aton mga publikasyon, hisguti kon paonan-o niyo maiaaplikar an iyo nahibabaroan. Pamiling hin mga paagi ha pagpakita ha usa  kag usa hin gugma ngan respeto, ngan hin mga paagi ha pagin buotan ngan mahunahunaon. Hangyoa hi Jehova nga buligan ka nga magkaada mga kalidad nga magpaparig-on han imo pag-asawa ngan magigin hinungdan nga mas higugmaon ka han imo padis.​—Proberbios 15:16, 17; 1 Pedro 1:7.

22. Kay ano nga kinahanglan kita magpakita hin gugma, respeto, ngan pagpasidungog ha aton padis?

²² Kinahanglan buhaton naton an ngatanan nga aton mahihimo nga trataron an aton bana o asawa ha paagi nga may gugma, respeto, ngan pagpasidungog. Kon bubuhaton naton ito, an aton pag-asawa magigin mas makalilipay ngan marig-on. Ngan labaw ha ngatanan, mapapalipay naton hi Jehova.​—Salmo 147:11; Roma 12:10.