Hinigugma nga Kabugtoan:

An gugma ha Dios ngan ha tawo nagpapagios ha aton nga buhaton an ginsisiring han Biblia: “Lakat ngan panhimo kamo hin mga disipulo ha mga tawo han ngatanan nga nasud, bawtismuhi hira.” (Mat. 28:​19, 20; Mar. 12:​28-31) Daku an nahihimo han diri makikalugaringon nga gugma. Maaabot hito an kasingkasing han mga “may husto nga disposisyon basi magkaada kinabuhi nga waray kataposan.”—Buh. 13:48.

Hadto, nagpokus kita pagmemorya hin mga presentasyon ngan panhatag hin literatura. Yana kinahanglan ta pauswagon an aton abilidad ha pakiistorya. Karuyag naton ipakita an gugma ha iba pinaagi ha pakiistorya ha ira hin mga topiko nga makakapainteres ha ira. Nagkikinahanglan ito hin pagin andam pag-adjust ngan paghunahuna ha kon ano an ira mga nababarak-an ngan topiko nga naruruyagan. Paonan-o ini nga brosyur makakabulig?

Ini nga brosyur may 12 nga leksyon nga nagtututdo ha aton han mga kalidad nga kinahanglan kultibaron basi maipakita an gugma ngan manhimo hin disipulo. An tagsa nga leksyon iginbasar ha asoy ha Biblia nga nagpupokus ha usa nga kalidad nga iginpakita ni Jesus o han siyahan-siglo nga mga Kristiano ha ministeryo. An goal, diri an pagmemorya hin mga presentasyon kondi pamiling hin mga paagi nga maipakita an aton gugma ha mga tawo. Oo an tagsa hini nga kalidad ginkikinahanglan ha ngatanan nga bahin han aton ministeryo, pero hihisgotan ta kon paonan-o an espisipiko nga mga kalidad labi nga kinahanglan ha pagtikang ha pakiistorya, pagbalik-bisita, o pag-Bible study.

Samtang gin-aadman an tagsa nga leksyon, hunahunaa hin maopay kon paonan-o mo maipapakita ito nga kalidad kon nakikiistorya ha mga tawo ha iyo lugar. Pangalimbasugi nga mas maparig-on an imo gugma kan Jehova ngan ha mga tawo. Ito nga gugma, nga mas importante kay ha bisan ano nga teknik, mabulig ha imo nga maabot an imo goal nga manhimo hin disipulo.

Pribilehiyo gud nga makaupod kamo hini nga buruhaton. (Zep. 3:9) Hinaot hura kamo nga bendisyonan ni Jehova samtang padayon niyo nga iginpapakita an gugma ha mga tawo ngan nanhihimo hin disipulo!