Pagbaya ni Jesus ha Jerico, kinadto hiya ha Betania nga mga 20 ka kilometro an kahirayo. An dalan ngadto sagkahon ngan makuri agian. An Jerico mas hamubo hin mga 250 ka metros ha lebel han dagat, ngan an Betania mas hitaas hin 610 ka metros ha lebel han dagat. Hi Lasaro ngan an iya kabugtoan naukoy ha gutiay nga baryo han Betania, mga tulo ka kilometro tikang ha Jerusalem ngan nahimumutang ha este nga bakilid han Bukid han mga Olibo.

Damu nga Judio an inabot na ha Jerusalem para han Paskua. Temprano hira nga kinadto “basi maglimpyo ha kalugaringon uyon ha Balaud” kon nakakapot hira hin patay nga lawas o kon may nabuhat hira nga nakapahugaw ha ira. (Juan 11:55; Numeros 9:6-10) An iba ha ira nagtirirok ha templo. Naghuhunahuna hira kon maatender ba hi Jesus ha Paskua.—Juan 11:56.

Damu an uruistorya mahitungod kan Jesus. Karuyag han iba nga lider han relihiyon nga arestuhon hiya basi patayon. Ngani, nagsugo hira nga an bisan hin-o nga mahibaro kon hain hi Jesus kinahanglan magsumat ha ira ‘basi maaresto nira hiya.’ (Juan 11:57) Ini nga mga lider nagsari na pagpatay kan Jesus katapos niya banhawon hi Lasaro. (Juan 11:49-53) Salit natural la nga magruhaduha an iba kon magpapakita gud ba hi Jesus ha publiko.

Han Biernes, umabot hi Jesus didto ha Betania, “unom ka adlaw antes han Paskua.” (Juan 12:1) An bag-o nga adlaw (Sabbath, Nisan 8) magtitikang katunod han adlaw. Salit nakaabot hiya didto antes an Sabbath. Diri hiya puydi magbiyahe tikang ha Jerico kon Sabbath, tikang ha katunod han adlaw han Biernes tubtob ha katunod han adlaw ha Sabado, kay igindidiri ha balaud han mga Judio an sugad nga pagbiyahe. Posible nga kumadto hi Jesus ha balay ni Lasaro, sugad han iya nabatasan.

Hi Simon nga taga-Betania liwat, nag-imbitar kan Jesus ngan ha iya mga kaupod, pati kan Lasaro, para hin pangiklop ha Sabado. Hi Simon gintatawag nga “may liprosi,” kay bangin may liprosi hiya hadto nga gintambal ni Jesus. An maduruto nga hi Marta amo an nag-asikaso ha mga bisita. Ha luyo nga bahin, hi Maria matinagaron gud kan Jesus, nga hini nga higayon nagin hinungdan han diskusyon.

Gin-abrihan ni Maria an alabastro nga surudlan, o gutiay nga burutangan, nga may sulod nga “mga tunga ka litro han mahamot nga lana, nga puro nga nardo.” (Juan 12:3) Marahalon gud ito, an kantidad hito 300 ka denaryo nga mga usa ka tuig nga sweldo! Ginbutangan ni Maria hin lana an ulo ngan mga tiil ni Jesus katapos iya ginpamara an mga tiil ni Jesus pinaagi han iya buhok. Tungod hito, nagharamot an bug-os nga balay.

Nasina an mga disipulo ngan nagpakiana: “Kay ano nga ginkakaragan iton mahamot nga lana?” (Marcos 14:4) Hi Judas Iscariote nagsiring: “Kay ano nga waray na la ibaligya hin 300 ka denaryo ito nga mahamot nga lana basi ihatag ha mga pobre?” (Juan 12:5) Pero an tinuod, diri an mga pobre an ginhuhunahuna ni Judas. Ginkikinawat niya an kwarta ha kahon nga gintitipigan para ha mga disipulo.

Gindepensahan ni Jesus hi Maria: “Kay ano nga ginsisinamok niyo ini nga babaye? Maopay an iya ginbuhat ha akon. An mga pobre pirme niyo kaupod, pero ako diri niyo pirme makakaupod. Han ginpahiran hini nga babaye an akon lawas hinin mahamot nga lana, ginbuhat niya ini basi iandam ako ha paglubong. Ha pagkamatuod susumatan ko kamo: Bisan diin isangyaw inin maopay nga sumat ha bug-os nga kalibotan, an ginbuhat hini nga babaye igsusumat liwat sugad nga paghinumdom ha iya.”—Mateo 26:10-13.

Sobra usa ka adlaw na hi Jesus ha Betania, ngan nahibantog na nga nakadto hiya. Damu nga Judio an kinadto ha balay ni Simon diri la basi makita hi Jesus kondi basi makita liwat hi Lasaro, an “ginbanhaw” ni Jesus. (Juan 12:9) Nagsarabot an punoan nga mga saserdote nga patayon hi Jesus ngan hi Lasaro. Para hini nga mga lider han relihiyon, damu an natoo kan Jesus kay ginbanhaw niya hi Lasaro. Maraot gud ito nga mga lider han relihiyon!