Hi Jesus ngan an mga nagbibiyahe kaupod niya inabot ha Jerico, nga mga usa ka adlaw nga biyahe tikang ha Jerusalem. Masisiring nga duha ka syudad an Jerico, an daan nga syudad sobra usa ngan tunga ka kilometro an distansya tikang ha bag-o nga syudad nga nahimo ha panahon han mga Romano. Samtang nagawas hi Jesus ngan an mga tawo ha usa hini nga mga syudad basi kumadto ha sunod nga syudad, duha nga buta nga makililimos an nakabati han aringasa han mga tawo. An usa ha ira amo hi Bartimeo.

Pakabati ni Bartimeo ngan han iya kaupod nga naagi hi Jesus, hira nagsinggit: “Ginoo, Anak ni David, malooy ka ha amon!” (Mateo 20:30) Ginsidngan hira han iba nga diri mag-inaringasa, pero nagtikadaku la lugod an ira pagsininggit. Pakabati ni Jesus ha ira, inundang hiya. Nagsugo hiya ha iya mga kaupod nga dad-on ha iya an mga nagsisininggit. Kinadto hira ha mga makililimos ngan ginsidngan an usa ha ira: “Magmarig-on ka! Buhát, kay gintatawag ka niya.” (Marcos 10:49) Tungod han duro nga kalipay, iginwaklit han buta an iya pantungbaw nga panapton, tinindog dayon, ngan dinaop kan Jesus.

Hi Jesus nagpakiana: “Ano an karuyag niyo nga buhaton ko para ha iyo?” An mga buta binaton: “Ginoo, pukrata an amon mga mata.” (Mateo 20:32, 33) Nalooy hi Jesus, salit ginkaptan niya an ira mga mata, ngan ginsidngan an usa ha ira: “Lakat, tungod han imo pagtoo nag-opay ka.” (Marcos 10:52) Nakakita an duha nga buta, ngan sigurado nga gindayaw nira an Dios. Han nakita han mga tawo an nahitabo, gindayaw liwat nira an Dios. An duha nga buta hadto umupod kan Jesus.

Damu gud nga tawo an nakapalibot kan Jesus samtang naagi hiya ha Jerico. Karuyag makita han ngatanan an nagtambal ha duha nga buta. Ginsusuok hi Jesus han mga tawo, salit an iba diri gud nakakakita ha iya, pariho kan Sakeo. Punoan hiya han mga parasukot hin buhis ha sulod ngan ha palibot han Jerico. Tungod kay habubo hiya, diri niya nakikita an nahitatabo. Salit dinalagan hiya ngan sinaka ha kahoy nga igera ha ligid han dalan nga aagian ni Jesus. Tikang ha igbaw, nakikita hin maopay ni Sakeo an ngatanan. Han hirani na hi Jesus ngan nakita niya nga hi Sakeo nakadto ha igbaw han kahoy, hiya nagsiring: “Sakeo, lusad dayon kay makadto ako yana ha imo balay.” (Lucas 19:5) Lumusad hi Sakeo ngan nagdagmit pag-uli basi abiabihon an iya importante nga bisita.

Han nakita ito han mga tawo, nagngurutob hira. Para ha ira, diri husto nga magin bisita hi Jesus han tawo nga ginhuhunahuna nira nga makasasala. Nagriko hi Sakeo kay nanunukot hiya hin buhis ha malimbong nga paagi.

Pagsulod ni Jesus ha balay ni Sakeo, nagreklamo an mga tawo: “Binisita hiya ha balay han usa nga makasasala.” Pero nakita ni Jesus an posibilidad nga magbasol hi Sakeo. Ngan waray gud hiya magsayop. Tinindog hi Sakeo ngan nagsiring: “Kitaa, Ginoo! Ihahatag ko ha mga pobre an katunga han akon mga panag-iya, ngan anoman nga nakuha ko tikang ha bisan hin-o pinaagi han buwa nga akusasyon, ibabalik ko hin upat ka pilo.”—Lucas 19:7, 8.

Maopay gud an ginbuhat ni Sakeo basi ipakita nga tinuod an iya pagbasol! Posible nga makukwenta niya ha iya rekord han buhis kon pira an iya nakuha ha mga Judio, ngan nagsaad hiya nga upat ka pilo an iya ibabalik. Mas labaw pa ito kay ha gin-oobligar han balaud han Dios. (Eksodo 22:1; Lebitiko 6:2-5) Dugang pa, nagsaad hi Sakeo nga ihahatag niya ha mga pobre an katunga han iya mga panag-iya.

Nalipay hi Jesus hini nga ebidensya han pagbasol ni Sakeo ngan ginsidngan hiya: “Yana nga adlaw an katalwasan inabot hini nga panimalay kay anak ka liwat ni Abraham. Tungod kay an Anak han tawo kinanhi basi bilngon ngan talwason an nawara.”—Lucas 19:9, 10.

Diri pa la maiha, nagpokus hi Jesus ha kahimtang han “nawara” han iginsumat niya an ilustrasyon mahitungod han anak nga nawara. (Lucas 15:11-24) Yana naghatag hiya hin tinuod nga ehemplo mahitungod han usa nga sugad hin nawara pero hin-agian. Posible nga nagreklamo an mga lider han relihiyon ngan an ira mga sumurunod ngan ginkontra nira hi Jesus kay gintagan niya hin atensyon an mga tawo nga pariho kan Sakeo. Bisan pa hito, padayon nga ginpamiling ngan ginpahiuli ni Jesus ini nga mga anak ni Abraham nga nawawara.