Damu an ginbuhat ni Jesus ha magkulop, ngan kapoy na hiya. Pagkagab-i, iya ginsidngan an iya mga disipulo: “Kadto kita ha tabok nga baybayon,” ha atbang han Capernaum.—Marcos 4:35.

Ha este nga baybayon han Dagat han Galilea nahimumutang an rehiyon han Gerasa. Gintatawag liwat ini nga Decapolis. An mga syudad han Decapolis sentro han Griego nga kultura, bisan kon damu nga Judio an naukoy didto.

May nakakita han pagbaya ni Jesus ha Capernaum. Nakaupod nira an iba nga mga baluto ha pagtabok ha dagat. (Marcos 4:36) Diri hirayo hinduro an pagtabok. An Dagat han Galilea daku nga linaw, nga mga 21 ka kilometro an kahilaba ngan mga 12 ka kilometro an kahilapad. Pero diri ito hamabaw.

Bisan kon perpekto hi Jesus, natural la nga makapoy hiya tungod han iya pagin okupado ha ministeryo. Salit han nagbibiyahe na hira, humigda hiya ha ulin han baluto, ngan kumaturog nga may ulonan.

An pipira han mga apostol maaram gud magmaniobra hin baluto, pero diri ini magigin masayon nga pagbiyahe. Napapalibotan hin bukid an Dagat han Galilea, ngan an bawbaw nga tubig hito kasagaran nga mapaso-paso. Usahay, an mas mahagkot nga hangin tikang ha kabukiran nahuyop ha mapaso-paso nga tubig ha bawbaw han dagat, nga nagriresulta hin tigda ngan makusog nga subasko. Ito an nahitatabo yana. Waray pag-iha, an baluto ginpupusakan na hin mga balud. Nagtikang ito ‘masudlan hin tubig salit nameligro hira.’ (Lucas 8:23) Pero, nakaturog la gihapon hi Jesus!

An mga parapanagat natatarantar na pagmaniobra han baluto, ngan ginbubuhat an ira mahihimo basado han ira eksperyensya ha pagnabigar kon may subasko. Pero makusog gud ini nga subasko. Tungod kay nahadlok hira nga mamatay, ira ginpukaw hi Jesus ngan suminggit: “Ginoo, talwasa kami kay magkakamatay na kami!” (Mateo 8:25) Nahadlok an mga disipulo nga malunod!

Pagmata ni Jesus, iya ginsidngan an mga apostol: “Kay ano nga nahahadlok kamo? Kagutiay han iyo pagtoo.” (Mateo 8:26) Katapos ginsaway ni Jesus an hangin ngan an dagat: “Husto na! Maglinaw ka!” (Marcos 4:39) An makusog nga hangin inundang ngan an dagat kumalma. (Igin-asoy nira Marcos ngan Lucas inin makatirigamnan nga panhitabo, siyahan ira ginpabug-atan nga milagroso nga ginpakalma ni Jesus an subasko, ngan katapos ira gin-unabi an kakulang hin pagtoo han mga disipulo.)

Hunahunaa la an epekto hini ha mga disipulo! Nakita pa la nira nga an makusog nga subasko kumalma gud. Tungod hito, nahadlok hira hinduro ngan nag-uruistorya: “Hin-o gud ba ini, kay bisan an hangin ngan an dagat nasugot ha iya?” Ha urhi, talwas nga nakatabok hira ha dagat. (Marcos 4:41–5:1) Bangin an iba nga mga baluto nga nakadto ha lawod binalik ha weste nga baybayon.

Nagpapasarig gud ini ha aton nga an Anak han Dios may gahum pagkontrol ha kahimtang han panahon! Kon magpokus na hiya ha tuna durante han iya pagmando ha Ginhadian, an ngatanan nga tawo mag-uukoy nga may seguridad, kay mawawara na an mga kalamidad!